អង្គការអុកហ្វាមបើកសិក្ខាសាលារកដំណោះស្រាយលើកកម្ពស់សេដ្ឋកិច្ចស្ត្រីជនបទ

ជាតិ

អង្គការអុកហ្វាមបើកសិក្ខាសាលារកដំណោះស្រាយលើកកម្ពស់សេដ្ឋកិច្ចស្ត្រីជនបទ

26, Jan 2018 , 9:19 pm

រូបភាព

ដោយ: ថ្មីៗ

សៀមរាប៖ អង្គការ Oxfam (អុកហ្វាម) បានរៀបចំសិក្ខាសាលាមួយ ដោយពិភាក្សារកដំណោះស្រាយដើម្បីលើកកម្ពស់ការពង្រឹងសេដ្ឋកិច្ចស្ត្រីនៅតាមជនបទ។ សិក្ខាសាលានេះ មានការចូលរួមពីបណ្តាប្រទេសក្នុងតំបន់អាស៊ី និងប៉ាស៊ីហ្វិក ដែលសរុបមានចំនួន ១២ប្រទេស។

សិក្ខាសាលាថ្នាក់តំបន់ស្តីពី ដំណោះស្រាយការអភិវឌ្ឍរួមប្រកបដោយនវានុវត្តន៍ ដើម្បីពង្រឹងភាពអង់អាចផ្នែកសេដ្ឋកិច្ចរបស់ស្ត្រី ត្រូវបានរៀបចំឡើងនៅព្រឹកថ្ងៃទី២៥ ខែមករា ឆ្នាំ២០១៨ នៅខេត្តសៀមរាប។ គោលបំណងនៃសិក្ខាសាលានេះ គឺផ្តល់ឱកាសឱ្យអ្នកចូលរួមទាំងអស់ ផ្លាស់ប្តូរបទពិសោធន៍ និងពិភាក្សាលើកិច្ចសហការក្នុងការបញ្ចូល ការពង្រឹងសេដ្ឋកិច្ចរបស់ស្ត្រី ទៅក្នុងវិស័យផ្សេងៗ មានវិស័យកសិកម្ម អំពើហិង្សាយែនឌ័រ និងភាពជាអ្នកដឹកនាំរបស់ស្ត្រី សុខភាពបន្តពូជ ការចិញ្ចឹមជីវិត និងសហគ្រាសខ្នាតតូច ការចំណាកជនបទ បរិយាបន្នហិរញ្ញវត្ថុ មីក្រូហិរញ្ញវត្ថុ និងធនាគារ ការកាត់បន្ថយគ្រោះភ័យនៃគ្រោះមហន្ថរាយ និងការបន្សុំាការប្រែប្រួលអាកាសធាតុ គោលការណ៍ណែនាំ និងគោលនយោបាយផ្សេងៗ។

នាយិកាអង្គការ អុកហ្វាម លោកស្រី លីម សូលីន បានឱ្យដឹងថា ការពង្រឹងសេដ្ឋកិច្ចស្ត្រីបានក្លាយជាបញ្ហាអាទិភាពទាំងរាជរដ្ឋាភិបាល វិស័យឯកជន និងម្ចាស់ជំនួយ យល់ពីសក្កានុពលក្នុងការជំរុញកំណើនសេដ្ឋកិច្ច និងអភិវឌ្ឍធនធានមនុស្ស។ លោកស្រីបន្ថែមថា៖« អង្គការអុកហ្វាមជឿជាក់ថា ការពង្រឹងសេដ្ឋកិច្ចប្រកបដោយប្រសិទ្ធិភាពសម្រាប់ស្ត្រីកម្ពុជាកើតឡើងនៅពេលដែលស្ត្រីទទួលបានសិទ្ធិក្នុងការគ្រប់គ្រង និងទទួលផលពីធនធានផ្សេងៗ មានពេលវេលាផ្ទាល់ខ្លួន មានលទ្ធភាពគ្រប់គ្រងហានិភ័យ និងមានស្ថានភាពសេដ្ឋកិច្ច និងការរស់នៅប្រសើរ»។

លោកស្រី ម៉ាត់ ម៉ារ៉ា រដ្ឋលេខាធិការក្រសួងអភវិឌ្ឍន៍ជនបទ ដែលបានចូលរួមក្នុងសិក្ខាសាលាខាងលើ ក៏បានសង្កត់ធ្ងន់ពីបញ្ហាការពង្រឹងសេដ្ឋកិច្ចស្ត្រីនៅតាមជនបទនេះដែរ។ លោកស្រីថា រាជរដ្ឋាភិបាលកម្ពុជាតាមរយៈក្រសួងអភិវឌ្ឍន៍ជនបទ បានចូលរួមយ៉ាងសកម្មក្នុងការអភិវឌ្ឍជនបទ សំដៅជំរុញកំណើនសេដ្ឋកិច្ចនៅជនបទ ក្នុងទិសដៅកាត់បន្ថយភាពក្រីក្រ និងបង្រួមគម្លាតរវាងទីក្រុង និងជនបទ៕