បង់ក្លាដែសមិនទាន់អាចកំណត់ពេលជាថ្មី ក្រោយពន្យារពេលបញ្ជូនជនភៀសខ្លួនរ៉ូហ៊ីងយ៉ាទៅមីយ៉ាន់ម៉ា

អន្តរជាតិ

បង់ក្លាដែសមិនទាន់អាចកំណត់ពេលជាថ្មី ក្រោយពន្យារពេលបញ្ជូនជនភៀសខ្លួនរ៉ូហ៊ីងយ៉ាទៅមីយ៉ាន់ម៉ា

28, Jan 2018 , 8:19 pm

រូបភាព

ដោយ:

គឺរយៈពេលជិតមួយសប្តាហ៍ហើយ ដែលរដ្ឋាភិបាលបង់ក្លាដែស នៅមិនទាន់អាចបញ្ជាក់ពីពេលកំណត់ថ្មីក្នុងបញ្ជូនជនភៀសខ្លួន រ៉ូហ៊ីងយ៉ាទៅមីយ៉ាន់ម៉ាវិញ ។ រដ្ឋាភិបាលបង់ក្លាដែស កំពុងស្ថិតនៅក្នុងការពិចារណា ដ៏លំបាកបំផុត ដ្បិត ការអនុវត្តគោលនយោបាយលើជនភៀសខ្លួនមកពីមីយ៉ាន់ម៉ានេះ ក៏បាននិងកំពុងតែស្ថិតក្រោមក្រសែភ្នែក និងការយកចិត្តទុកដាក់សហគមន៍អន្តរជាតិបំផុត ។

មន្ត្រីជាន់ខ្ពស់បង់ក្លាដែសលោក Abul Kalam នៅថ្ងៃ២២ មករា កន្លងទៅ បានប្រកាសពន្យាពេលក្នុងការបញ្ជូនជនភៀសខ្លួនរ៉ូហ៊ីងយ៉ាទៅមីយ៉ាន់ម៉ាវិញ ក្រោមហេតុផលថា នីតិវិធីនៃការរៀបបញ្ជូននោះនៅមានការខ្វះចន្លោះច្រើន ។ សេចក្តីប្រកាសនេះ ត្រូវបានធ្វើឡើងមុនមួយថ្ងៃប៉ុណ្ណោះ ដែលការបញ្ជូនជនភៀសខ្លួនត្រូវចាប់ផ្តើម ពោលគឺ ការវិលត្រលប់របស់ជនភៀសខ្លួនទៅមីយ៉ាន់ម៉ាវិញ ត្រូវចាប់ផ្តើមនៅថ្ងៃ២៣ មករា ។

អ្វីគួរចាប់អារម្មណ៍នោះ មុនពេលនៃការប្រកាសផ្អាកនីតិវិធីនេះ មានអង្គការពាក់ព័ន្ធវិស័យសិទ្ធិមនុស្ស ដែលរួមទាំងអគ្គលេខាធិការដ្ឋានអង្គការសហប្រជាជាតិផងដែរនោះ បានសម្តែងការព្រួយបារម្ភ និងថែមទាំងព្រមានពាក់ព័ន្ធការមិនទាន់អាចធានាទាំងសុវត្ថិភាព និងតម្រូវការរបស់ជនភៀសខ្លួន នៅពេលត្រលប់ទៅប្រភពដើមនោះ ។ នោះក៏ព្រោះតែ តាមរបាយការណ៍ ភូមិនិងផ្ទះរបស់ពួកគេ ត្រូវបានដុតបំផ្លាញស្ទើរតែអស់ទៅហើយ ។

យ៉ាងណាមិញ ការពន្យារពេលនេះដែរ បានបង្កើតជារឿងទោមនស្សសម្រាប់មីយ៉ាន់ម៉ា ។ ក្នុងនោះ មីយ៉ាន់ម៉ា នៅថ្ងៃ២៣ មករា ថែមបានចេញថ្លែងការណ៍បន្ទោសបង់ក្លាដែស ដែលបានពន្យារពេល ដោយមិនមានហេតុផលច្បាស់លាស់គ្រប់គ្រាន់ ដែលធ្វើឲ្យមីយ៉ាន់ម៉ាអាចទទួលយកបាន ។ បើតាមភ្នាក់ងារព័ត៌មានReuters រដ្ឋមន្ត្រីទំនាក់ទំនងអន្តរជាតិមីយ៉ាន់ម៉ា ក៏បានបញ្ជាក់ដែរថា មីយ៉ាន់ម៉ា បានត្រៀមខ្លួន និងរៀបចំរួចជាស្រេចហើយសម្រាប់ជនភៀសខ្លួន ។

អ្វីដែលគួរឲ្យកត់សម្គាល់មួយទៀតនោះ មកទល់ពេលនេះដែរ រដ្ឋាភិបាលបង់ក្លាដែស ដែលបាននិងកំពុងតែមានបន្ទុកយ៉ាងធ្ងន់ក្នុងការមើលថែជនភៀសខ្លួនជាងរាប់សិបម៉ឺននាក់ មកពីមីយ៉ាន់ម៉ា នៅមិនទាន់អាចកំណត់ថ្ងៃដែលបង់ក្លាដែសត្រូវបញ្ជូនជនភៀសខ្លួន តាមកិច្ចព្រមព្រៀងជាមួយនឹងមីយ៉ាន់ម៉ាឡើយ ៕