ជាតិ
សេដ្ឋកិច្ច
កញ្ចប់ថវិកាពិសេសសម្រាប់វិស័យស្រូវអង្ករ ត្រូវបានប្រើប្រាស់ជាង៣០លានដុល្លារ
× ភ្នំពេញ៖ កញ្ចប់ថវិកាពិសេសរបស់រដ្ឋាភិបាលចំនួន ៥០លានដុល្លារ ត្រូវបានធនាគារអភិវឌ្ឍន៍ជនបទ (RDB) ផ្ដល់កម្ចីដល់រោងម៉ាស៊ីនកិនស្រូវអស់ ៣១លានដុល្លារ មកទល់ពេលនេះ។ នេះបើតាមលោក កៅ ថាច អគ្គនាយក RDB ដែលបានថ្លែងប្រាប់សារព័ត៌មានថ្មីៗ នៅថ្ងៃទី២៩ខែមករា។
លោក កៅ ថាច បញ្ជាក់ថា ឥណទានដែលត្រូវបានបញ្ចេញចំនួន ៣១លានដុល្លារនេះ ភាគច្រើនត្រូវបានផ្ដល់ទៅរោងម៉ាស៊ីនកិនស្រូវនៅខេត្តបាត់ដំបង បន្ទាយមានជ័យ និងខេត្តពោធិ៍សាត់។ លោកបន្ថែមថា ឥណទាន នឹងត្រូវបញ្ចេញច្រើនជាងនេះទៀត ព្រោះរដូវប្រមូលផលស្រូវនឹងបន្តដល់ខែមីនា ទៅខែមេសា។
កញ្ចប់ថវិកា ៥០លានដុល្លារ ត្រូវបានរដ្ឋាភិបាល កាលពីខែសីហាឆ្នាំ២០១៧ ទម្លាក់ជួយដោះស្រាយបញ្ហាទីផ្សារស្រូវរបស់កសិករ តាមរយៈការផ្ដល់ឥណទានដល់បណ្ដារោងម៉ាស៊ីនកិនស្រូវ ដែលខ្វះខាតឥណទាន យកទៅប្រមូលទិញស្រូវពីកសិករ។ ឥណទាននេះ ត្រូវបានកំណត់អត្រាការប្រាក់ ៥ភាគរយក្នុងមួយឆ្នាំ។ ជាគោលការណ៍ RDB ត្រូវបង្វិលកញ្ចប់ថវិកានេះទៅរដ្ឋាភិបាលវិញ ក្នុងអំឡុងខែឧសភា ខាងមុខនេះ។
ក្រៅពីកញ្ចប់ថវិកាសម្រាប់ប្រមូលទិញស្រូវ រដ្ឋាភិបាលក៏បានផ្ដល់ឥណទានដល់វិស័យឯកជនប្រមាណ ៣០លានដុល្លារ ដើម្បីសាងសង់ឃ្លាំងស្តុក និងឡសម្ងួតស្រូវចំនួនបួនកន្លែង។ ឡ សម្ងួតទាំងបួននេះ ត្រូវបានរំពឹងថានឹងបញ្ចប់ការស្ថាបនាឲ្យរួចរាល់ត្រឹមខែកុម្ភៈឆ្នាំនេះ ខណៈឃ្លាំងស្តុកត្រូវការពេលវេលាដាក់ឲ្យប្រើប្រាស់យូរជាងនេះ។
ក្នុងឆ្នាំ២០១៧ កន្លងទៅ កម្ពុជាបាននាំចេញអង្ករទៅទីផ្សារអន្តរជាតិចំនួនជាង ៦៣ម៉ឺនតោន កើនឡើងជិត ១០ម៉ឺនតោន បើធៀបនឹង ៥៤ម៉ឺនតោននៅឆ្នាំ២០១៦៕
© រក្សាសិទ្ធិដោយ thmeythmey.com