អន្តរជាតិ
ទស្សនកិច្ចនាយករដ្ឋមន្ត្រីអង់គ្លេសនៅចិន៖ ពាណិជ្ជកម្មជារឿងធំ ឯសិទ្ធិមនុស្សទំនងទុកមួយឡែក
× នាយករដ្ឋមន្ត្រីអង់គ្លេស ថេរ៉េសា ម៉េយ៍ នឹងទស្សនកិច្ចនៅចិន ចាប់ពីថ្ងៃទី៣១ ដល់ទៅថ្ងៃទី២ ខែកុម្ភៈ សំដៅពង្រឹងទំនាក់ទំនងពាណិជ្ជកម្ម និងការវិនិយោគទ្វេភាគី។ អង់គ្លេស ដែលត្រូវចាកចេញពីសហភាពអឺរ៉ុបនៅឆ្នាំ២០១៩ ពិតជាត្រូវការដៃគូរកស៊ីសម្បូរលុយដូចជាចិន ខណៈចិនក៏មើលឃើញទីផ្សាររបស់អង់គ្លេសដូចគ្នា។ មេដឹកនាំអង់គ្លេស និងចិននឹងជជែកលើបញ្ហាអន្តរជាតិផ្សេងទៀត ប៉ុន្តែបញ្ហាសិទ្ធិមនុស្សទំនងជាមិនស្ថិតក្នុងរបៀបវារៈឡើយ។
ប្រមុខរដ្ឋាភិបាលអង់គ្លេស ថេរ៉េសា ម៉េយ៍ នឹងចាកចេញទៅកាន់ចិននៅថ្ងៃទី៣០ ខែមករា ដើម្បីធ្វើទស្សនកិច្ចបីថ្ងៃ ជាមួយគោលដៅពង្រឹងទំនាក់ទំនងទ្វេភាគី។ លោកស្រី ម៉េយ៍ នឹងជួបជាមួយប្រធានាធិបតីចិន ស៊ី ជិនភីង និងនាយករដ្ឋមន្ត្រី លី ខឹឈាំង ក៏ដូចជាមេដឹកនាំក្រុមហ៊ុនធំៗរបស់ចិន។ លោកស្រីនិយាយថា ទស្សនកិច្ចលើកនេះ នឹងជំរុញយុគសម័យមាសនៃទំនាក់ទំនងអង់គ្លេស-ចិន ដើម្បីដោះស្រាយបញ្ហារួមគ្នា។
លោក ម៉េយ៍ នឹងអមដំណើរដោយពាណិជ្ជករធំៗរបស់អង់គ្លេស ដែលសំឡឹងឃើញការងើបឡើងនៃវិស័យហិរញ្ញវត្ថុរបស់ចិន។ ការចាកចេញរបស់អង់គ្លេសពីសហភាពអឺរ៉ុប តម្រូវឲ្យរដ្ឋាភិបាលលោកស្រី ម៉េយ៍ ស្វែងរកឱកាសមាសដើម្បីទ្រទ្រង់សេដ្ឋកិច្ច។ មុនការចាកចេញ នាយករដ្ឋមន្ត្រីអង់គ្លេសរូបនេះនិយាយដែរថា ទំនាក់ទំនងស៊ីជម្រៅរវាងប្រទេសទាំងពីរ នឹងបង្កលក្ខណៈដល់ការពិភាក្សាដោយស្មោះត្រង់លើបញ្ហាទាំងអស់។
បញ្ហាកូរ៉េខាងជើង បម្រែបម្រួលអាកាសធាតុ និងការបំពុលបរិយាកាស ក៏ជារបៀបវារៈសំខាន់នៃទស្សនកិច្ចរបស់លោកស្រី ម៉េយ៍ នៅចិនដែរ។ គេរំពឹងថា នាយករដ្ឋមន្ត្រីអង់គ្លេសនឹងស្នើឲ្យចិនបង្កើនការដាក់សម្ពាធលើក្រុងព្យុងយ៉ាងឲ្យបោះបង់ការអភិវឌ្ឍនុយក្លេអ៊ែរ។ យ៉ាណាមិញ គេមិនទាន់ច្បាស់ថា លោកស្រី ម៉េយ៍ នឹងលើកយកបញ្ហាសិទ្ធិមនុស្ស និងការថយចុះប្រជាធិបតេយ្យនៅហុងកុងទៅជជែកជាមួយមេដឹកនាំចិនឬយ៉ាងឡើយ។
បើតាមសារព័ត៌មាន BBC លោក Chris Patten អតីតអភិបាលក្រុងហុងកុងជនជាតិអង់គ្លេសចុងក្រោយគេ បានសរសេរលិខិតមួយផ្ញើទៅកាន់ការិយាល័យលោកស្រី ម៉េយ៍ ដោយស្នើឲ្យលោកស្រីប្រើប្រាស់ទស្សនកិច្ចនៅចិនដើម្បីផ្ដោតលើបញ្ហាសិទ្ធិមនុស្សនៅហុងកុងផង។ លោកបញ្ជាក់ថា ហុងកុងកំពុងជួបការគំរាមកំហែងខ្លាំងគោលការណ៍ប្រជាធិបតេយ្យរបស់ខ្លួន ប្រឈមមុខនឹងការលូកដៃកាន់ខ្លាំងរបស់ចិន។
ជុំវិញរឿងសិទ្ធិមនុស្សនេះ ចិនត្រៀមខ្លួនជជែកជាមួយអង់គ្លេស តែត្រូវស្ថិតក្រោមគោលការណ៍ស្មើភាព និងការគោរពគ្នាទៅវិញទៅមក។ អ្នកនាំពាក្យក្រសួងការបរទេសចិន Hua Chunying បាននិយាយក្នុងសន្និសីទសារព័ត៌មាននៅថ្ងៃទី២៩ ខែមករា ថា ចិនមានឆន្ទៈនិយាយរឿងសិទ្ធិមនុស្សជាមួយប្រទេសទាំងអស់។ លោកស្រីបន្តថា គ្មានប្រទេសអាចអះអាងថា ខ្លួនជាជើងឯកសិទ្ធិមនុស្សបានឡើយ តែត្រូវរៀនពីគ្នា និងគោរពគ្នាដើម្បីជំរុញការគោរពសិទ្ធិមនុស្ស៕
Tag:
អង់គ្លេស
ចិន
ពាណិជ្ជកម្ម
ថេរ៉េសា ម៉េយ៍
ស៊ី ជិនភីង
សិទ្ធិមនុស្ស
© រក្សាសិទ្ធិដោយ thmeythmey.com