ត្រាំ សម្រេចដកបម្រាមប្រឆាំងជនភៀសខ្លួនពីប្រទេស ១១ តែរឹតបន្តឹងការត្រួតពិនិត្យឲ្យខ្លាំង

អន្តរជាតិ

ត្រាំ សម្រេចដកបម្រាមប្រឆាំងជនភៀសខ្លួនពីប្រទេស ១១ តែរឹតបន្តឹងការត្រួតពិនិត្យឲ្យខ្លាំង

30, Jan 2018 , 8:19 pm

រូបភាព

រូបភាព៖ AFP

ដោយ: ថ្មីៗ

សហរដ្ឋអាមេរិកសម្រេចដកបម្រាមជនភៀសខ្លួនដែលមកពីប្រទេសចំនួន ១១ ដែលអាមេរិកចាត់ទុកជាប្រទេសគ្រោះថ្នាក់នៅថ្ងៃចន្ទដើមសប្តាហ៍នេះ។ ប៉ុន្តែក្រសួងសន្តិសុខមាតុភូមិអាមេរិកនឹងដាក់វិធានការតឹងតែងជំនួសវិញដើម្បីត្រួតពិនិត្យរាក់ប្រជាជនដែលចង់សុំសិទ្ធិជ្រកកោននៅអាមេរិក។

ចុងក្រោយ រដ្ឋបាលអាមេរិករបស់លោក ដូណាល់ ត្រាំ សម្រេចដកការហាមឃាត់ចំពោះប្រជាជនជាជនភៀសខ្លួនមកពីប្រទេស ១១ ដែលភាគច្រើនជាប្រទេសម៉ូស្លីមដែលស្ថិតក្នុងបញ្ជីគ្រោះថ្នាក់របស់អាមេរិក។

យោងតាមទីភ្នាក់ងារព័ត៌មាន AFP ថ្វីបើមិនមានការបញ្ជាក់ច្បាស់ក៏ដោយ គេដឹងថា ប្រទេសចំនួន ១១ នោះមានប្រទេសម៉ូស្លីមធំៗចំនួន ១០ បូកប្រទេសកូរ៉េខាងជើង។ ពាក់ព័ន្ធបញ្ហានេះ មន្ត្រីអាមេរិកបានអះអាងថា ប្រជាជនពីប្រទេសទាំង ១១ នោះនឹងត្រូវឆ្លងកាត់ការត្រួតពិនិត្យយ៉ាងល្អិតល្អន់បំផុតដើម្បីធានាថា ពួកគេមិនមែនជាគ្រោះថ្នាក់សម្រាប់អាមេរិក។

រដ្ឋមន្ត្រីសន្តិសុខមាតុភូមិអាមេរិក Kristjen Nielsen បានលើកឡើងដូច្នេះ៖« វាសំខាន់ខ្លាំងដែលយើងអាចដឹងច្បាស់ថា អ្នកដែលចូលដល់ទឹកដីអាមេរិកនោះជាអ្នកណា។ វិធានការសន្តិសុខបន្ថែមនេះនឹងធ្វើឲ្យក្រុមដែលមានបំណងមិនល្អពិបាកយកឋានៈជាជនភៀសខ្លួនជាខែលដើម្បីចូលទឹកដីអាមេរិក។ ម្យ៉ាងវិធានការនេះជួយឲ្យយើងអាចធានានិងការពារទឹកដីអាមេរិកបាន»។

តាមពិតទៅប្រទេសទាំង ១១ ខាងលើត្រូវបានក្រុងវ៉ាស៊ីនតោនដាក់បម្រាមជាផ្លូវការកាលពីខែតុលាឆ្នាំមុន ប៉ុន្តែគេមិនបានបញ្ចេញឈ្មោះជាផ្លូវការថាប្រទសទាំងនោះមានប្រទេសណាខ្លះឡើយ។ ប៉ុន្តែក្រុមជនភៀសខ្លួនបានអះអាងថា ប្រទេសទាំងនោះមានអេហ្ស៊ីប, អ៊ីរ៉ង់, អ៊ីរ៉ាក់, លីប៊ី, ម៉ាលី , កូរ៉េខាងជើង, សូម៉ាលី, ស៊ូដង់ខាងត្បូង, ស៊ូដង់, ស៊ីរី និងយេម៉ែន។

ការដាក់វិធានការរឹងរ៉ឹងប្រឆាំងជនភៀសខ្លួននេះ ត្រូវបានក្រុមសិទ្ធិមនុស្សរិះគន់ជាបន្តបន្ទាប់ ប៉ុន្តែខាងមន្ត្រីរដ្ឋបាលលោក ត្រាំ បានបកស្រាយជាថ្មីថា វិធានការវាយតម្លៃផ្នែកសន្តិសុខមិនមែនបង្កើតឡើងដើម្បីសំដៅលើក្រុមប្រជាជនម៉ូស្លីមដូចគេចោទឡើយ។ មន្ត្រីដែលនិយាយដោយមិនបានបង្ហាញអត្តសញ្ញាណនោះបានបន្ថែមថា វាជារឿងចាំបាច់ដែលត្រូវផ្តោតលើប្រទេសដែលមានគ្រោះថ្នាក់ខ្លាំងនោះ។

តាមពិតទៅតាំងពីឃោសនាដល់ស្បថចូលកាន់តំណែង លោក ត្រាំ បង្ហាញជំហរឥតងាករេក្នុងការធានាសន្តិសុខ និងសុវត្ថិភាពដល់ប្រជាជនអាមេរិកតាមរយៈការរឹតបន្តឹងលំហូរចូលនៃជនភៀសខ្លួន និងជនអន្តោប្រវេសន៍ខុសច្បាប់។ លោកកែទម្រង់កម្មវិធីជនភៀសខ្លួនដោយកាត់បន្ថយចំនួនជនភៀសខ្លួនចូលមកអាមេរិក ហើយលោកក៏ស្នើលុបចោលឆ្នោតផ្សងសំណាងដើម្បីបានចូលមករស់នៅអាមេរិក (Green Card Lottery) និងជំទាស់កម្មវិធីផ្តល់សិទ្ធិរស់នៅស្របច្បាប់ដល់ជនអន្តោប្រវេសន៍ក្មេងៗដែលមានអាយុចន្លោះពី ១០ដល់ ១២ឆ្នាំ (Dreamers)ផង។

បច្ចុប្បន្ននេះសមាជិកសភាទាំងពីរបក្សនាំគ្នាចរចាលើសំណើរកែទម្រង់កម្មវិធីជនភៀសខ្លួននិងជនអន្តោប្រវេសន៍នេះ ហើយពួកគេក៏ពិភាក្សាលើសំណើរសុំលុយ ២៥ ពាន់លានដុល្លារដើម្បីសាងសង់ជញ្ជាំងភាគខាងត្បូងជាប់ព្រំដែនម៉ិកស៊ិកដើម្បីការពារជនអន្តោប្រវេសន៍ខុសច្បាប់ដែរ៕