អន្តរជាតិ
ដំរីមួយក្បាលដើររំលងលើរនាំងព្រំដែនឆ្លងកាត់ពីព្រំដែនចិនចូលទៅទឹកដីឡាវ
× ដំរីដ៏ធំមួយក្បាល ត្រូវបានកាមេរ៉ាត្រួតពិនិត្យប៉ុស្តិ៍ព្រំដែន ថតជាប់ពីសកម្មភាពរបស់វា ឆ្លងកាត់ព្រំដែនចិន-ឡាវ នាពាក់កណ្តាលយប់ថ្ងៃសៅរ៍ ឈានចូលថ្ងៃអាទិត្យកន្លងមក។ បើតាមការផ្សាយរបស់ទូរទស្សន៍ CCTV ដំរីនោះ បានវិលចូលទឹកដីចិនវិញ តាមច្រកដដែលនារយៈពេល២ម៉ោងក្រោយមក។
ដំរីនោះ បានចេញពីព្រំដែននៅតំបន់ស្វយ័ត Xishuangbanna នៃខេត្តយូណាន ប្រទេសចិន ឆ្ពោះទៅកាន់ក្រុង Louang Namtha ភាគខាងជើងនៃប្រទេសឡាវ។ តាមរយៈកាមេរ៉ាសុវត្ថិភាព ដំរីនោះ បានឆ្លងចូលដោយឈានជើងរំលងលើរនាំងព្រំដែន។
បន្ទាប់ពីឃើញសកម្មភាពនោះ កងកម្លាំងព្រំដែនបានបើកភ្លើងបំភ្លឺ និងតាមដានមើលដំណើរបស់វា ហើយពីរម៉ោងដំរីបានវិលត្រឡប់ចូលក្នុងទឹកដីចិនវិញ នៅតាមច្រកដដែល ប៉ុន្តែវាមិនបានរំលងរនាំងទៀតឡើយ ដោយដើរនៅច្រកផ្លូវធម្មតា។
លោក Li Zhifu មន្ត្រីព្រំដែនម្នាក់របស់ចិន បានអះអាងថា៖ «ពេលនេះជារដូវក្តៅ ដូច្នេះតំបន់ព្រៃឈើមិនសូវសំបូរចំណីរអាហារឡើយ។ យើងតែងតែឃើញជាញឹកញាប់ករណីដំរីចេញទៅរកចំណីនៅតាមតំបន់ជិតខាង»។ ជាមួយគ្នានេះផងដែរ កងកម្លាំងមានសមត្ថកិច្ច បាននាំគ្នាផ្សព្វផ្សាយទៅកាន់អ្នកភូមិឲ្យមានការប្រុងប្រយ័ត្ន ក្រែងមានគ្រោះថ្នាក់ដែលបង្កឡើងដោយសត្វដំរី។
របាយការណ៍បានបង្ហាញថា ដំរីប្រមាណ៣០០ក្បាលកំពុងរស់នៅតំបន់ព្រៃត្រូពិច ក្នុងខេត្តយូណាន ហើយវាជាប្រភេទសត្វដែលត្រូវការពារនៅក្នុងប្រទេសចិន៕
© រក្សាសិទ្ធិដោយ thmeythmey.com