អន្តរជាតិ
តុលាការថៃបញ្ជាក់ជាថ្មីពីភាពស្របច្បាប់របស់របបសឹកដែលរឹបអូសទ្រព្យសម្បត្តិលោកស្រី យីងឡាក់
× តុលការថៃ បានបន្តទាត់ចោលបណ្តឹងមោឃភាពរបស់លោកស្រីអតីតនាយករដ្ឋមន្ត្រី យីងឡាក់ ស៊ីនណាវ៉ាត់ ពាក់ព័ន្ធនឹងសេចក្តីបង្គាប់របស់លោកនាយករដ្ឋមន្ត្រី ប្រាយុទ្ធ ចន្ទអូចា ក្នុងការរឹបអូសទ្រព្យសម្បត្តិរបស់លោកស្រី ជាសំណងចំពោះគោលនយោបាយស្រូវអង្ករ។
តុលាការរដ្ឋបាលថៃ នៅថ្ងៃ២៩ ខែមករា បានបដិសេធសំណើរបស់អតីតនាយករដ្ឋមន្ត្រី យីងឡាក់ ដែលស្នើឲ្យតុលាការមោឃភាពសេចក្តីបង្គាប់របស់របបសឹកដែលបញ្ជាឲ្យលោកស្រី ផ្តល់សំណងប្រមាណ ៣៥.៧ពាន់លានបាត (៩៩៦ លានដុល្លារ) លើការខូចខាតដ៏ច្រើនលើសលប់ពាក់ព័ន្ធបញ្ហាគោលនយោបាយស្រូវអង្ករថៃក្នុងពេលលោកស្រីដឹកនាំប្រទេស ។
នេះ គឺជាលើកទីពីរហើយ ដែលតុលាការថៃ សម្រេចបដិសេធ សំណើរបស់លោកស្រីយីងឡាក់ ។ តាមការចុះផ្សាយរបស់សារព័ត៌មានថៃ The Nation មិនខុសពីលើកទីមួយឡើយ តុលាការ បានបញ្ជាក់ថា អំណេះអំណាងរបស់លោកស្រី មិនមានលក្ខណៈគ្រប់គ្រាន់ដើម្បីបញ្ជាក់ថា សេចក្តីបង្គាប់រដ្ឋបាលរបស់របបសឹកថា ខុសច្បាប់ឡើយ ។
តាមប្រភពព័ត៌មានដដែលនោះ មេធាវីរបស់លោកស្រី យីងឡាក់ បានឲ្យដឹងថា នៅពេលនេះ ក្រុមការងារកំពុងតែបន្តការងារដើម្បីប្តឹងជំទាស់ទៅនឹងសេចក្តីបង្គាប់បញ្ជារបស់លោកនាយករដ្ឋមន្ត្រីប្រាយុទ្ធ ចន្ទ ។ មេធាវីរូបនោះ បន្ថែមថា មកទល់ពេលនេះ អាជ្ញាធរ បានបង្កកគណនីធនាគារលោកស្រីយីងឡាក់ ១២ ឬ១៣គណនី ហើយអាជ្ញាធរ ក៏កំពុងតែដាក់គោលដៅលើផ្ទះរបស់លោកស្រីផងដែរ ។
សូមរម្លឹកបន្តិចដែរថា នៅឆ្នាំ២០១៦ កន្លងទៅ រដ្ឋាភិបាលរបស់លោកនាយករដ្ឋមន្ត្រីថៃប្រាយុទ្ធ ចន្ទ អូចា បានចេញលិខិតបង្គាប់បញ្ជាដែលផ្តល់ដោយប្រការ៤៤នៃរដ្ឋធម្មនុញ្ញថៃបណ្តោះអាសន្នដើម្បីផ្តល់ភាពស្របច្បាប់សម្រាប់ខ្លួនក្នុងការរឹបអូសទ្រព្យសម្បត្តិលោកស្រី យីងឡាក់ និងអតីតមន្ត្រីក្រោមឱវាទរបស់លោកស្រី ពាក់ព័ន្ធនឹងការធ្វើឲ្យបាត់បង់ថវិកាជាតិតាមរយៈកម្មវិធីស្រូវអង្ករក្នុងពេលលោកស្រីកាន់អំណាច ។
ការបង្គាប់រឹបអូសនេះ មិនបានឆ្លងកាត់ដីកាបង្គាប់ពីតុលាការថៃ ដែលចំណុចនេះហើយ ធ្វើឲ្យលោកស្រី យីងឡាក់ ចាត់ទុកថា ជារឿងមិនយុត្តិធម៌ ។ យ៉ាងណាក៏ដោយ កន្លងមក រដ្ឋាភិបាលរបបសឹក ក៏ធា្លប់បានបកស្រាយរួចហើយថា ការរឹបអូសទ្រព្យដែលជាកម្មសិទ្ធិរបស់អតីតនាយករដ្ឋមន្ត្រី លោកស្រី យីងឡាក់ ស៊ីនណាវ៉ាត់ត្រា អាចអនុវត្តទៅបានដោយមិនចាំបាច់រង់ចាំដីកាបង្គាប់របស់តុលាការរដ្ឋបាលឡើយ ៕
© រក្សាសិទ្ធិដោយ thmeythmey.com