អាមេរិកបង្ហាញឈ្មោះមន្ត្រីធំៗនិងអ្នកជំនួញគ្រាក់ៗរុស្ស៊ីដែលអាចជាប់ទណ្ឌកម្ម

អន្តរជាតិ

អាមេរិកបង្ហាញឈ្មោះមន្ត្រីធំៗនិងអ្នកជំនួញគ្រាក់ៗរុស្ស៊ីដែលអាចជាប់ទណ្ឌកម្ម

30, Jan 2018 , 10:59 pm

រូបភាព

ដោយ: តន ចាន់រិទ្ធារ៉ា

ក្រសួងហិរញ្ញវត្ថុអាមេរិក នៅថ្ងៃទី៣០ បានចេញផ្សាយបញ្ជីឈ្មោះមន្ត្រីធំៗ និងអ្នកជំនួញគ្រាក់ៗរបស់រុស្ស៊ី ដែលប្រឈមមុខនឹងការដាក់ទណ្ឌកម្មជុំវិញការពាក់ព័ន្ធក្នុងការជ្រៀតជ្រែកការបោះឆ្នោតអាមេរិកឆ្នាំ២០១៦ ។ បញ្ជីឈ្មោះនេះ ជាផ្នែកមួយនៃកញ្ចប់ច្បាប់ដាក់ទណ្ឌកម្មលើរុស្ស៊ី ដែលប្រធានាធិបតី ដូណាល់ ត្រាំ ដាក់ឲ្យប្រើកាលពីខែសីហា ឆ្នាំ២០១៧ ។ ក្រុងមូស្គូចាត់ទុកបញ្ជីឈ្មោះនេះជាការកាត់ផ្ដាច់ទំនាក់ទំនងទ្វេភាគី។

លើកលែងតែប្រធានាធិបតី វ្ល៉ាឌីមៀ ពូទីន ចេញ មន្ត្រីកំពូលៗរបស់រដ្ឋាភិបាលរុស្ស៊ី និងប្រធានក្រុមហ៊ុនធំៗ សុទ្ធតែមានឈ្មោះក្នុងបញ្ជីក្រេមឡាំង (Kremlin List) របស់ក្រសួងហិរញ្ញវត្ថុអាមេរិកទាំងអស់។ ជាសរុប មន្ត្រីរុស្ស៊ីចំនួន១១៤នាក់ មានឈ្មោះក្នុងបញ្ជីនេះ ហើយសុទ្ធតែអាចប្រឈមមុខទណ្ឌកម្មរបស់រដ្ឋបាលក្រុងវ៉ាស៊ីនតោន លើសំណុំរឿងកកូរកកាយការបោះឆ្នោតប្រធានាធិបតីអាមេរិកឆ្នាំ២០១៦ ។

បើតាមសារព័ត៌មាន RT អ្នកនយោបាយរុស្ស៊ីដែលមានឈ្មោះក្នុងបញ្ជីមានលោក Dmitry Peskov អ្នកនាំពាក្យលោកពូទីន, នាយករដ្ឋមន្ត្រី ឌីមីទ្រី ម៉េដវ៉េដេវ, ឧបនាយករដ្ឋមន្ត្រីទីមួយ Igor Shuvalov ។ រដ្ឋមន្ត្រីក្នុងជួររដ្ឋាភិបាលរុស្ស៊ីទាំងអស់រាប់ទាំងលោក Sergey Lavrov រដ្ឋមន្ត្រីការបរទេស និងរដ្ឋមន្ត្រីការពារជាតិ Sergey Shoigu ផង ក៏ជាប់ឈ្មោះដូចគ្នា។ មន្ត្រីទទួលបន្ទុកសន្តិសុខជាច្រើនរូបមានប្រធានភ្នាក់ងារសម្ងាត់ និងប្រធានអង្គភាពអង្គរក្សរបស់រុស្ស៊ី ក៏គេចមិនផុតដែរ។

គេក៏ឃើញមានសេដ្ឋីគ្រាក់ៗដល់ទៅ៩៦ ចាប់ពីប្រធានក្រុមហ៊ុនឧស្ម័ន Gazprom, ក្រុមហ៊ុនប្រេង Rosneft, ក្រុមហ៊ុនដឹកជញ្ជូន Russian Railways, ក្រុមហ៊ុនអាកាសចរណ៍ Aeroflot ព្រមទាំងប្រធានធនាគារធំទាំងពីរ Sberbank និង VTB ជាដើម។ អ្នកជំនួញធំៗមួយចំនួនទៀតក្នុងវិស័យឯកជន ជាពិសេសប្រធានក្លិបបាល់ទាត់ Chelsea គឺលោក Roman Abramovich ក៏ស្ថិតក្នុងបញ្ជីរបស់អាមេរិកដែរ។

ក្នុងរបាយការណ៍ចេញផ្សាយនៅថ្ងៃទី៣០ ខែមករា បុគ្គលទាំងអស់ដែលមានឈ្មោះក្នុងបញ្ជី ត្រូវបានជ្រើសរើសដោយផ្អែកលើតួនាទីបុគ្គលនីមួយៗ ឬក៏មានទ្រព្យសម្បត្តិមួយពាន់លានដុល្លារ ឬក៏ច្រើនជាងនេះសម្រាប់មនុស្សជាន់ខ្ពស់មួយក្រុម។ យ៉ាងណាមិញ អាមេរិកបញ្ជាក់ថា នេះមិនមែនជាបញ្ជីទណ្ឌកម្មឡើយ ហើយការបញ្ចូលឈ្មោះបុគ្គល ឬក្រុមហ៊ុនណាមួយ មិនមែនមានន័យថា ពួកគេទាំងនោះសុទ្ធតែជាប់ទណ្ឌកម្មដែរ។

ក្រោយការចេញផ្សាយបញ្ជីឈ្មោះនេះ ក្រុងមូស្គូបង្ហាញការមិនសប្បាយចិត្តយ៉ាងខ្លាំង។ សមាជិកព្រឹទ្ធសភារុស្ស៊ីលោក Vladimir Dzhabarov បានប្រតិកម្មយ៉ាងខ្លាំងៗបញ្ជីឈ្មោះនេះ ព្រោះមានឈ្មោះសមាជិករដ្ឋាភិបាល រដ្ឋមន្ត្រី អនុរដ្ឋមន្ត្រី និងមន្ត្រីជាន់ខ្ពស់ជាច្រើន។ លោកចាត់ទុកបញ្ជីឈ្មោះនេះជាការផ្ដាច់ទំនាក់ទំនងរុស្ស៊ី និងអាមេរិក។ បានន័យថា ការស្ដារឡើងវិញទំនាក់ទំនងមហាអំណាចទាំងពីរ ទំនងមិនអាចកើតឡើងបានឡើយ