ជាតិ
នយោបាយជាតិ
គ្រួសារ៖ លោក កឹម សុខា នឹងមានវត្តមានក្នុងសវនាការ នាព្រឹកស្អែក
× ភ្នំពេញ៖ លោក កឹម សុខា អតីតប្រធានគណបក្សសង្គ្រោះជាតិ ដែលជាប់ឃុំជិត៥ខែមកហើយនោះ នឹងត្រូវនាំខ្លួនពីពន្ធនាគារត្រពាំងផ្លុង ក្នុងខេត្តត្បូងឃ្មុំ មកកាន់រាជធានីភ្នំពេញ ដើម្បីចូលរួមសវនាការនៃសាលាឧទ្ធរណ៍ នាព្រឹកថ្ងៃទី១ ខែកុម្ភៈ ឆ្នាំ២0១៨។ នេះបើតាមសារនៅលើទំព័រហ្វេសប៊ុករបស់លោក កឹម សុខា។
កញ្ញា កឹម មនោវិទ្យា កូនស្រីច្បងរបស់លោក កឹម សុខា បានសរសេរសារបន្ថែមលើគណនីហ្វេសប៊ុកយ៉ាងដូច្នេះថា៖«លោក កឹម សុខា នឹងមកដល់ សាលាឧទ្ធរណ៍ នៅព្រឹកថ្ងៃស្អែក ដើម្បីចូលរួមសវនាការ»។
រីឯ លោក ផែង ហេង មេធាវី១រូប ក្នុងចំណោមមេធាវីទាំង៨រូប ដែលការពារក្តីឲ្យលោក កឹម សុខា បានបញ្ជាក់ប្រាប់សារព័ត៌មានថ្មីៗតាមទូរសព្ទ នៅរសៀលថ្ងៃទី៣១ មករា បែបនេះថា៖«ខ្ញុំ មិនឮផ្ទាល់ពីលោក កឹម សុខា នោះទេ។ ប៉ុន្តែ ឮតាមភរិយារបស់គាត់ ដែលបានចូលទៅសួរសុខទុក្ខនៅព្រឹកមិញ ថា គេនឹងនាំគាត់ទៅចូលរួមសវនាការ»។ លោក បន្តថា ក្រុមមេធាវី ក៏នឹងចូលរួមសវនាការ នៅថ្ងៃស្អែកដែរ។
លោក នុត សាវនា អ្នកនាំពាក្យនៃអគ្គនាយកដ្ឋានពន្ធនាគារ មិនបង្ហើបនោះទេថា សមត្ថកិច្ច នឹងដឹកលោក កឹម សុខា មកកាន់សាលាឧទ្ធរណ៍ ឬមិនក៏អត់ ដោយលោក លើកហេតុផលថា ដើម្បីរក្សាសុវត្ថិភាពជូនជនត្រូវចោទ។ លោក បានប្រាប់សារព័ត៌មានថ្មីៗ យ៉ាងដូច្នេះថា៖«រឿងផ្សេងប្រហែលជាខ្ញុំ អាចបកស្រាយបាន។ តែរឿងនេះ ខ្ញុំមិនអាចនិយាយអ្វីឲ្យលើសពីហ្នឹងបានទេ ព្រោះវាជាការរក្សាសុវត្ថិភាពសម្រាប់ជនត្រូវចោទ»។
ការបើកសវនាការរបស់សាលាឧទ្ធរណ៍ គឺធ្វើឡើងតាមសំណើរបស់ក្រុមមេធាវី ដែលសុំឲ្យលោក កឹម សុខា រស់នៅក្រៅឃុំជាបណ្តោះអាសន្ន។ មុនឈានដល់សាលាឧទ្ធរណ៍ ក្រុមមេធាវី ធ្លាប់ស្នើនៅសាលាដំបូងរាជធានីភ្នំពេញម្តងរួចមកហើយ ប៉ុន្តែ ត្រូវបានច្រានចោល។
នេះ ជាលើកទីមួយហើយ ដែលលោក កឹម សុខា នឹងត្រូវបាននាំខ្លួនឲ្យចូលរួមក្នុងសវនាការ ដើម្បីតតាំងតាមផ្លូវច្បាប់។ កន្លងមកតុលាការ តែងបើកសវនាការ ដោយគ្មានវត្តមានរបស់លោក កឹម សុខា។
មកដល់ពេលនេះ សំណុំរឿងរបស់លោក កឹម សុខា កំពុងស្ថិតក្នុងដំណាក់កាលនៃការស៊ើបសួរ។ លោក គី ឫទ្ធី ចៅក្រមស៊ើបសួរនៃសាលាដំបូងរាជធានីភ្នំពេញ បានទៅជួបលោក កឹម សុខា ដោយផ្ទាល់នៅក្នុងពន្ធនាគារត្រពាំងផ្លុង ខេត្តត្បូងឃ្មុំ ចំនួនបីលើករួចមកហើយ ដើម្បីសាកសួរពីបទឃុបឃិតជាសម្ងាត់ជាមួយបរទេស ដើម្បីផ្តួលរំលំរដ្ឋាភិបាល ដែលអាចចាត់ទុកថាជាអំពើក្បត់ជាតិ។
សមត្ថកិច្ចនិងតុលាការ បានដាក់ឯកឧត្តម កឹម សុខា ឲ្យស្ថិតក្រោមការសង្ស័យថា ពាក់ព័ន្ធនឹងអំពើក្បត់ជាតិ ព្រោះបានឃុបឃិតជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។ សមត្ថកិច្ចនិងតុលាការ ពឹងផ្អែកលើវីដេអូឃ្លីបមួយ ដែលឯកឧត្តម កឹម សុខា បានថ្លែងសារនយោបាយទៅកាន់អ្នកគាំទ្រនៅក្រៅប្រទេស តាំងពីឆ្នាំ២០១៣មកម្ល៉េះ។ ក្នុងវីដេអូឃ្លីបនោះ ឯកឧត្តម កឹម សុខា បានលើកឡើងថា ឯកឧត្តម មានអ្នកជំនាញដែលជាជនបរទេសនៅពីក្រោយ ដើម្បីជ្រោមជ្រែងក្នុងការផ្លាស់ប្តូររដ្ឋាភិបាលកម្ពុជា។
ក្រោយវីដេអូឃ្លីបខាងលើ បានបែកធ្លាយលើបណ្តាញសង្គមហ្វេសប៊ុក សមត្ថកិច្ច ក៏បាននាំគ្នាចុះទៅចាប់ឯកឧត្តម កឹម សុខា ដល់គេហដ្ឋានតែម្តង កាលពីយប់ថ្ងៃទី២ ឈានចូលថ្ងៃទី៣ ខែតុលា ឆ្នាំ២០១៧។ ភ្លាមៗបន្ទាប់ពីចាប់ខ្លួន សមត្ថកិច្ច ក៏ដឹកឯកឧត្តម កឹម សុខា ទៅឃុំនៅពន្ធនាគារត្រពាំងផ្លុង ក្នុងខេត្តត្បូងឃ្មុំ៕
Tag:
តុលាការ
កឹម សុខា
មេធាវី
© រក្សាសិទ្ធិដោយ thmeythmey.com