ចិន នឹងបញ្ជូនរថក្រោះ និងឧទ្ធម្ភាគចក្រមួយចំនួនមកកម្ពុជា ដើម្បីត្រៀមធ្វើសមយុទ្ធរួមគ្នា

ជាតិ

ចិន នឹងបញ្ជូនរថក្រោះ និងឧទ្ធម្ភាគចក្រមួយចំនួនមកកម្ពុជា ដើម្បីត្រៀមធ្វើសមយុទ្ធរួមគ្នា

01, Feb 2018 , 8:39 am

រូបភាព

ដោយ: ថ្មីៗ

ភ្នំពេញ៖ ចិន នឹងបញ្ជូនរថក្រោះ ឧទ្ធម្ភាគចក្រ និងសម្ភារយោធាមួយចំនួនទៀត មកកាន់កម្ពុជា ដើម្បីត្រៀមហ្វឹកហ្វឺននិងធ្វើសមយុទ្ធរួមគ្នា នៅខេត្តកំពង់ស្ពឺ ក្នុងអំឡុងខែមីនា ឆ្នាំ២0១៨ ខាងមុខនេះ ក្រោមប្រធានបទ «ប្រឆាំងនឹងអំពើភេវរកម្ម»។ នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ បានប្រាប់សារព័ត៌មានថ្មីៗតាមទូរសព្ទថា បច្ចុប្បន្ននេះ មន្ត្រីកម្ពុជា-ចិន បានពិភាក្សាគ្នាបណ្តើរៗហើយ ដើម្បីរៀបចំបញ្ជូនគ្រឿងសព្វាវុធទាំងនោះមកកម្ពុជា។

លោក ឈុំ សុជាតិ អះអាងថា ការធ្វើសមយុទ្ធនេះ គឺដើម្បីរម្លឹកខួបលើកទី៦0 នៃទំនាក់ទំនងរវាងកម្ពុជា-ចិន។ លោក លើកឡើងយ៉ាងដូច្នេះថា៖«អ្នកខ្លះថាជាជំនួយរបស់ចិន។ ខ្ញុំសូមបញ្ជាក់ថា សម្ភារទាំងនោះ មិនមែនជាជំនួយ ដែលចិនឲ្យមក ដើម្បីបំពាក់ឲ្យយោធាទេ គឺគ្រាន់តែបញ្ជូនមកសម្រាប់ត្រៀមហ្វឹកហ្វឺននិងធ្វើសមប្រយុទ្ធរួមគ្នាប៉ុណ្ណោះ ដើម្បីជាការរម្លឹកទំនាក់ទំនងនៃប្រទេសទាំងពីរ»។

យ៉ាងណា អ្នកនាំពាក្យក្រសួងការពារជាតិរូបនេះ មិនបញ្ជាក់នោះទេថា រថក្រោះ ឧទ្ធម្ភាគចក្រ និងសម្ភារយោធា មានចំនួនប៉ុន្មាន ដែលនឹងត្រូវបញ្ជូនមកកម្ពុជា៕