មេធាវី៖ លោក កឹម សុខា មានជំងឺលើសឈាម ទឹកនោមផ្អែម និងកៀបសរសៃដៃ

ជាតិ

មេធាវី៖ លោក កឹម សុខា មានជំងឺលើសឈាម ទឹកនោមផ្អែម និងកៀបសរសៃដៃ

01, Feb 2018 , 9:59 pm

រូបភាព

ដោយ:

ភ្នំពេញ៖ លោក កឹម សុខា អតីតប្រធានគណបក្សសង្គ្រោះជាតិ ដែលបានជាប់ពន្ធនាគារអស់រយៈពេល៥ខែហើយនោះ កំពុងមានជំងឺដល់ទៅ ៣ប្រភេទឯណោះ គឺលើសឈាម ទឹកនោមផ្អែមប្រភេទធ្ងន់ និងកៀបសរសៃដៃខាងឆ្វេង។ នេះជាការលើកឡើងរបស់លោក ជូង ជូងី មេធាវីមួយរូបរបស់លោក កឹម សុខា ដោយបន្ថែមថា ចំពោះជំងកៀបសរសៃដៃ គឺទាមទារឲ្យមានការវះកាត់។

ការអះអាងខាងលើរបស់លោកមេធាវី ជូង ជូងី គឺបន្ទាប់ពីបញ្ចប់សវនាការនៃសាលាឧទ្ធរណ៍ នៅព្រឹកថ្ងៃទី១ ខែកុម្ភៈឆ្នាំ២0១៨។ ការបើកសវនាការនៃសាលាឧទ្ធរណ៍ ក៏មានវត្តមានរបស់លោក កឹម សុខា ផងដែរ។

លោកមេធាវី ជូ ជូងី ដែលហ៊ុមព័ទ្ធដោយក្រុមអ្នកសារព័ត៌មានជាតិនិងអន្តជាតិយ៉ាងច្រើន បានថ្លែងបែបនេះថា៖«នៅក្នុងសវនាការ លោក កឹម សុខា បានព្យាយាមបង្ហាញជំងឺរបស់គាត់ ដើម្បីសុំរស់នៅក្រៅពន្ធនាគារ។ ប៉ុន្តែអ្វីដែលខ្ញុំសោកស្ដាយ គឺសាលាឧទ្ធរណ៍ មិនបានពិចារណាអំពីជំងឺរបស់គាត់ និងមិនអនុញ្ញាតឲ្យគាត់ បាននៅក្រៅឃុំ»។

លោកមេធាវីរូបនេះ បន្តទៀតថា ក្នុងចំណោមជំងីទាំង៣ប្រភេទ ជំងឺសរសៃដៃខាងឆ្វេង មិនអាចធ្វើចលនាបានដូចមុនឡើយ ដែលត្រូវការការវះកាត់។ លោក សង្កត់យ៉ាងដូច្នេះថា៖«សុខភាពរបស់គាត់ មិនអាចធានាបានទេនៅក្នុងពន្ធនាគារ។ ហើយពេលនេះ គាត់មានការប្រែប្រួលច្រើន។ កាលជាប់ឃុំដំបូង ស្មារតីរបស់គាត់នៅមានភាពមាំទាំ។ ប៉ុន្តែក្នុងរយៈពេលប៉ុន្មានខែកន្លងមកនេះ សុខភាពរបស់គាត់ចុះខ្សោយ ចំណែកឯរាងកាយ ក៏មានសភាពទ្រុធទ្រោមដែរ»។

បើតាមលោកមេធាវីខាងលើ សាលាឧទ្ធរណ៍ បានលើកហេតុផលថា ការមិនអនុញ្ញាតឲ្យនៅក្រៅឃុំ គឺដើម្បីការពារសុវត្ថិភាពជូនលោក កឹម សុខា និងដើម្បីធានាដំណើរការនៃនីតិវិធី។

ខណៈសវនាការ កំពុងដំណើរការ ម្ដាយនិងភរិយារបស់លោក កឹម សុខា ដែលស្ថិតនៅខាងមុខសាលាឧទ្ធរណ៍ បានលើកដៃសំពះផង និងយំផង ដើម្បីសុំឲ្យដោះលែងលោក កឹម សុខា។ ម្តាយរបស់លោក កឹម សុខា បានមានប្រសាសន៍ទាំងទឹកភ្នែកយ៉ាងដូច្នេះថា៖«កូនរបស់ខ្ញុំមិនបានធ្វើសកម្មភាពក្បត់ជាតិ ដូចការចោទប្រកាន់នោះឡើយ»។ ក្រោយមកបន្តិច ម្តាយ និងភរិយារបស់លោក កឹម សុខា ក៏ត្រូវបានអនុញ្ញាតឲ្យចូលក្នុងសាលាឧទ្ធរណ៍។

ក្រៅពីអ្នកកាសែត និងមន្ត្រីនៃអង្គការក្រៅរដ្ឋាភិបាលនានា ប្រជាពលរដ្ឋមួយចំនួន ក៏បាននាំគ្នាទៅប្រមូលផ្តុំនៅខាងមុខសាលាឧទ្ធរណ៍ដែរ។ ប្រជាពលរដ្ឋទាំងនោះ សុំឲ្យដោះលែងលោក កឹម សុខា។ យ៉ាងណា សវនាការនេះ ធ្វើឡើងជាអសាធារណៈ ដែលមានតែវត្តមានលោក កឹម សុខា មេធាវី និងចៅក្រមសភាស៊ើបសួរនៃសាលាឧទ្ធរណ៍ ប៉ុណ្ណោះ។

ក្រោយបញ្ចប់សវនាការ សមត្ថកិច្ច ក៏ដឹកលោក កឹម សុខា ទៅកាន់ពន្ធនាគារត្រពាំងផ្លុងវិញ ដែលស្ថិតក្នុងខេត្តត្បូងឃ្មុំ។ លោក ត្រូវបានចាប់ខ្លួន កាលពីយប់ថ្ងៃទី២ ឈានចូលថ្ងៃទី៣ ខែកញ្ញា ឆ្នាំ២0១៧ ដោយសង្ស័យថា ក្បត់ជាតិ ព្រោះបានឃុបឃិតជាមួយបរទេស ដើម្បីផ្តួលរំលំរដ្ឋាភិបាល៕