កីឡាអន្តរជាតិ
អន្តរជាតិ
ក្រោយប្តឹង IOC អត្តពលិករុស្ស៊ី ២៨រូបទៀត អាចចូលរួមប្រកួតអូឡាំពិកឆ្នាំ២០១៨ វិញបាន
× តុលាការមជ្ឈត្តកម្មកីឡា (CAS) បានប្រកាសនៅថ្ងៃព្រហស្បតិ៍ទី១ ខែកុម្ភៈនេះថា បានលុបចោលការហាមឃាត់អត្តពលិករុស្ស៊ីចំនួន ២៨ នាក់ ក្នុងចំណោម ៤៣នាក់ ដែលត្រូវចោទប្រកាន់ពីបទប្រើសារធាតុហាមឃាត់ (Doping) ដោយអនុញ្ញាតឲ្យចូលរួមក្នុងព្រឹត្តិការណ៍កីឡាអូឡាំពិករដូវរងា ឆ្នាំ ២០១៨ នេះវិញ។
កន្លងមក គណៈកម្មាធិការអូឡាំពិកអន្តរជាតិ (IOC) បានសម្រេចហាមឃាត់អត្តពលិករុស្ស៊ីចំនួន ៤៣នាក់ចូលរួមក្នុងព្រឹត្តិការណ៍កីឡាអូឡាំពិករដូវរងាឆ្នាំ២០១៨ នៅទីក្រុងព្យុងឆាង ប្រទេសកូរ៉េខាងត្បូង ក្រោយរកឃើញថាពួកគេបានប្រើប្រាសសារធាតុហាមឃាត់អំឡុងការប្រកួតអូឡាំពិកកាលពីឆ្នាំ២០១៤ នៅទីក្រុងសជី ប្រទេសរុស្ស៊ី។
ប៉ុន្តែក្រោយការប្រកាសរបស់ IOC នេះ អត្តពលិករុស្ស៊ី ៤២ នាក់បានដាក់ពាក្យបណ្តឹងឧទ្ធរណ៍ ប្រឆាំងនឹងបទចោទរបស់គណៈកម្មាធិការអូឡាំពិកអន្តរជាតិវិញ។ បើយោងតាមទីភ្នាក់ងារសារព័ត៌មាន AFP ករណីនេះ តុលាការមជ្ឈត្តកម្មកីឡា (CAS) បានយកសុំណុំរឿងខាងលើទៅពិនិត្យឡើងវិញម្តងទៀត ហើយក៏សម្រេចដកការហាមឃាត់អត្តពលិករុស្ស៊ីមួយចំនួន ដើម្បីឲ្យពួកគេអាចទៅចូលរួមក្នុងព្រឹត្តិការណ៍អូឡាំពិកដែលចាប់ផ្តើមនៅថ្ងៃទី ៩ ខែកុម្ភៈ ឆ្នាំ២០១៨នេះ។
CAS បានលើកឡើងថា នៅក្នុង ២៨ករណី ភ័ស្តុតាងដែលប្រមូលបាន រកឃើញថាមិនគ្រប់គ្រាន់ដើម្បីបញ្ជាក់ពីការប្រើប្រាស់សារធាតុហាមឃាត់ពីសំណាក់អត្តពលិករុស្ស៊ីចំនួន២៨រូបនេះឡើយ។ ហើយភ័ស្តុតាងដែលបានដាក់ចេញដោយ IOC ទាក់ទងនឹងបញ្ហានេះមិនមានទម្ងន់ដូចគ្នាចំពោះករណីនីមួយៗទេ។
យ៉ាងណាក៏ដោយ អត្តពលិករុស្ស៊ីដែលស្អាតស្អំដែលមានសិទ្ធិទៅចូលរួមប្រកួតក្នុងព្រឹត្តិការណ៍នេះនឹងស្ថិតក្រោមលក្ខខណ្ឌតឹងរ៉ឹងបំផុត គឺក្រោមទង់អព្យាក្រឹត្យ។
បើទោះបីមានការរឹតបន្តឹងលើអត្តពលិកខ្លួនក្តី ប៉ុន្តែអ្នកនាំពាក្យរបស់ប្រធានាធិបតីរុស្ស៊ីវ្លាឌីមៀរពូទីននៅតែសារទរជាមួយការសម្រេចនេះ៕
Tag:
កីឡាអូឡាំពិក
IOC
CAS
រុស្ស៊ី
© រក្សាសិទ្ធិដោយ thmeythmey.com