ប្រមុខរដ្ឋាភិបាល៖ កសិកម្មត្រូវតែខ្លឹម ស្របពេលវិស័យសេវាកម្មយកចំណែកសេដ្ឋកិច្ចកាន់តែធំ

ជាតិ

សេដ្ឋកិច្ច

ប្រមុខរដ្ឋាភិបាល៖ កសិកម្មត្រូវតែខ្លឹម ស្របពេលវិស័យសេវាកម្មយកចំណែកសេដ្ឋកិច្ចកាន់តែធំ

01, Feb 2018 , 10:59 pm

រូបភាព

ដោយ:

ភ្នំពេញ៖ ទន្ទឹមនឹងការរួមតូចនៃចំណែកវិស័យកសិកម្មក្នុងសេដ្ឋកិច្ចជាតិ សម្ដេចនាយករដ្ឋមន្ត្រី ហ៊ុន សែន បានជំរុញការយកចិត្តទុកដាក់លើវិស័យសេវាកម្ម។ នេះជាគំរូរបស់ប្រទេសអភិវឌ្ឍន៍ ដែលសម្ដេចបានថ្លែងថា គ្រាន់តែពង្រឹងការផលិតក្នុងវិស័យកសិកម្មឲ្យល្អ ដើម្បីបម្រើឲ្យវិស័យសេវាកម្ម ពិសេសទេសចរណ៍ ក៏ផលសេដ្ឋកិច្ចមិនតិចដែរ។ ប្រមុខរដ្ឋាភិបាលបានថ្លែងដូចនេះ នៅក្នុងពិធីប្រគល់សញ្ញាបត្រដល់និស្សិតនៃវិទ្យាស្ថានបច្ចេកវិទ្យាកម្ពុជា (តិចណូ) នៅថ្ងៃទី១ខែកុម្ភៈ។

សូមស្ដាប់ប្រសាសន៍សម្ដេច ហ៊ុន សែន ខាងក្រោមនេះ៖

សម្ដេច ហ៊ុន សែន បានលើកឡើងពីការរួមចំណែកកាន់តែតិចនៃវិស័យកសិកម្មរបស់កម្ពុជា ស្របនឹងអ្វីដែលកើតឡើងនៅប្រទេសអភិវឌ្ឍន៍ ដូចជា សហរដ្ឋអាមេរិក ជប៉ុន ដោយវិស័យសេវាកម្ម និងឧស្សាហម្មកានកាប់ចំណែកសេដ្ឋកិច្ចកាន់តែធំ។ បើទោះបីរួមចំណែកតូច តែវិស័យកសិកម្មត្រូវតែខ្លឹម ដែលអាចចិញ្ចឹមតម្រូវការក្នុងស្រុកគ្រប់គ្រាន់ និងធ្វើការនាំចេញបាន ពោលគឺមិនបោះបង់វិស័យនេះឡើយ។ នេះបើតាមប្រសាសន៍របស់ប្រមុខរដ្ឋាភិបាល។

ការរួមចំណែករបស់វិស័យកសិកម្មក្នុងផលិតផលជាតិស្រុកសរុប (GDP) របស់កម្ពុជា បានថយមកនៅត្រឹមចំនួន ២៥ ភាគរយ ខណៈសេវាកម្មកាន់កាប់ដល់ ៤៥ភាគរយ និងឧស្សាហកម្ម ៣០ភាគរយ។

សម្ដេចបានជំរុញឲ្យយកចិត្តទុកដាក់លើវិស័យសេវាកម្ម ពិសេសវិស័យទេសចរណ៍ ដោយវិស័យនេះផ្ដល់ការងារច្រើនកន្លែង និងចំណូលសេដ្ឋកិច្ចជាតិ ព្រមទាំងស្រូបយកផលិតផលកសិកម្មផងដែរ។ សម្ដេចបានថ្លែងដូច្នេះថា៖«ឧទាហរណ៍ ភ្ញៀវទេសចរណ៍ ៥,៦លាននាក់ ផ្ដល់ចំណូលប៉ុន្មាន ការងារប៉ុន្មានកន្លែង ហើយបង្កើនការនាំចេញនៅនឹងកន្លែងសម្រាប់ផលិតផលរបស់យើង»។

សម្ដេចបានអះអាងថា លំហូរទេសចរណ៍អន្តរជាតិមកកម្ពុជា នឹងមិនរងសម្ពាធបរទេសណាមួយឡើយ។ «លើកលែងតែប្រទេសយើងមានសង្គ្រាម ទើបទេសចរអត់មក។ គ្មានប្រទេសណាមួយបិទសេរីភាពមិនឲ្យទេសចរទៅប្រទេសណាមួយនោះទេ។ គ្មាននរណាដាក់ទោសទណ្ឌយើងកើតនោះទេ»។ នេះជាថ្លែងរបស់សម្ដេច ហ៊ុន សែន មុននឹងសម្ដេចថ្លែងបន្តថា៖«យើងផលិតឲ្យតែបានល្អ ហើយនាំចូលទៅសណ្ឋាគារ សម្រាប់មនុស្ស ៥លាននាក់បរិភោគ មិនមែនតូចទេ ធំណាស់»។

ប៉ុន្តែសម្រាប់វិស័យឧស្សាហកម្ម សម្ដេច ហ៊ុន សែន មិនបានលើកឡើងពីការកត់សម្គាល់លម្អិតរបស់សម្ដេច ក្នុងការថ្លែងខាងលើនេះទេ៕