ប្រទេសក្នុងមហាអនុតំបន់ទន្លេមេគង្គ អនុម័តកម្មវិធីបរិស្ថានក្នុងទឹកប្រាក់ ៥៤០លានដុល្លារ

ជាតិ

ប្រទេសក្នុងមហាអនុតំបន់ទន្លេមេគង្គ អនុម័តកម្មវិធីបរិស្ថានក្នុងទឹកប្រាក់ ៥៤០លានដុល្លារ

04, Feb 2018 , 6:59 pm

រូបភាព

ដោយ:

ភ្នំពេញ៖ រដ្ឋមន្ត្រីក្រសួងបរិស្ថាន មកពីប្រទេសទាំង៦ នៃមហាអនុតំបន់ទន្លេមេគង្គ (GMS) បានអនុម័តលើរបៀបវារៈបរិស្ថានរយៈពេល ៥ឆ្នាំ ក្នុងទឹកប្រាក់ជាង ៥៤០លានដុល្លារ សម្រាប់គម្រោងអាទិភាពមួយចំនួន ដើម្បីជំរុញការវិនិយោគបៃតង និងបង្កើនកិច្ចសហប្រតិបត្តិការក្នុងវិស័យបរិស្ថាន។

នេះជាការអនុម័តលើក្របខណ្ឌយុទ្ធសាស្ត្រ និងផែនការសកម្មភាពនៃកម្មវិធីបរិស្ថានស្នូល (CEP) ឆ្នាំ២០១៨-២០២២។ ការអនុម័តនេះធ្វើឡើងក្នុងកិច្ចប្រជុំរដ្ឋមន្ត្រីបរិស្ថាននៃមហាអនុតំបន់ទន្លេមេគង្គលើកទី៥ ដែលរៀបចំឡើងពីថ្ងៃទី៣០ខែមករា ដល់ថ្ងៃទី១ខែកុម្ភៈ នៅទីក្រុងឈៀងម៉ៃ ប្រទេសថៃ។ កម្មវិធី CEP នេះ បានចាប់ផ្ដើមអនុវត្តតាំងពីឆ្នាំ២០០៦ និងគ្រប់គ្រងដោយធនាគារអភិវឌ្ឍន៍អាស៊ី (ADB) ដែលបច្ចុប្បន្នកម្មវិធីនេះឈានដល់ដំណាក់កាលទី៣។ កម្មវិធីបានជួយរំដោះពលរដ្ឋជាង ៣ម៉ឺននាក់ពីភាពក្រីក្រ នៅតំបន់ជនបទក្នុងតំបន់ GMS ។ នេះបើតាមសេចក្ដីប្រកាសព័ត៌មានរបស់ ADB នៅថ្ងៃទី១ខែកុម្ភៈ។

ទឹកប្រាក់ ៥៤០លានដុល្លារក្នុងកម្មវិធីនេះ នឹងត្រូវបានប្រើប្រាស់ដោយផ្ដោតលើការគ្រប់គ្រងដីធ្លី គ្រប់គ្រងកាកសំណល់ ការត្រួតពិនិត្យការបំពុលបរិស្ថាន និងកសាងហេដ្ឋារចនាសម្ព័ន្ធជនបទ។ ខ្លឹមនៃការអនុម័តខាងលើនេះ ក៏ត្រួសត្រាយផ្លូវបង្កើតគម្រោងថ្មីមួយ ដើម្បីជួយប្រទេស GMS ស្វែងរកធនធានថវិកា សម្រាប់វិនិយោគបន្ថែមលើការអភិវឌ្ឍន៍បៃតង។

លោក Ramesh Subramaniam អគ្គនាយកនៃនាយកដ្ឋានអាស៊ីអាគ្នេហ៍របស់ ADB មាប្រសាសន៍ថា៖«ចាប់តាំងពីឆ្នាំ២០០៦ មក កម្មវិធី CEP បានពង្រឹងខ្លួនជាគំនិតផ្ដួចផ្ដើមផ្នែកបរិស្ថានដ៏សំខាន់ជាងគេមួយ នៅតំបន់អនុមហាទន្លេមេគង្គនេះ។ យើងនឹងបន្តអនុវត្តសកម្មភាពសំខាន់ៗ ដែលត្រូវបានដាក់ចេញក្នុងកិច្ចប្រជុំនេះ ដើម្បីជួយសម្រេចការអភិវឌ្ឍប្រកបដោយបរិយាប័ន្ន និងចីរភាព នៅក្នុងតំបន់ GMS នេះ»៕