ភ្នំពេញ៖ មុននឹងផ្ដើមពិព័ណ៌នាពីទស្សនវិស័យអចលនទ្រព្យកម្ពុជានៅឆ្នាំ២០១៨ គេគួរតែពិនិត្យមើលពីនិន្នាការសំខាន់ៗ នៅឆ្នាំ២០១៧ជាមុនសិន ដើម្បីទទួលបានចំណេះដឹងចាំបាច់មួយចំនួន សម្រាប់ការវិនិយោគនៅថ្ងៃអនាគត។ និន្នាការសំខាន់ៗ ទាំងនោះរួមមានការកើនឡើងតម្រូវការគេហដ្ឋានតម្លៃសមរម្យ ការធ្លាក់ចុះគម្រោងខុនដូថ្មីៗ ច្បាប់រឹតបន្តឹងអាជ្ញាបណ្ណសាងសង់ និងឥទ្ធិពលទេសចរចិន មកលើកម្ពុជា។ កត្តាទាំងនេះ គឺជាព័ត៌មានចាំបាច់ សម្រាប់អ្នកវិនិយោគលើវិស័យអចលនទ្រព្យកម្ពុជា នៅឆ្នាំ២០១៨នេះ។
របាយការណ៍ប្រចាំឆ្នាំ២០១៧ ដែលបានចេញផ្សាយដោយក្រសួងរៀបចំដែនដីនគរូបនីយកម្ម និងសំណង់ (MLMUPC) បង្ហាញថា តម្លៃសរុបនៃគម្រោងសាងសង់ ដែលបានអនុម័ត បានកើនឡើងដល់ ៦.៤២ ពាន់លានដុល្លារ ក្នុងឆ្នាំ២០១៧ ពោលគឺកើនឡើង ២២.៣ ភាគរយ ធៀបនឹងឆ្នាំ ២០១៦។
គម្រោងលំនៅដ្ឋានតម្លៃសមរម្យ ត្រូវបានគេមើលឃើញថា កើនឡើងខ្លាំងជាងគេនៅឆ្នាំ២០១៧។ យោងតាមរបាយការណ៍លំនៅដ្ឋានឆ្នាំ២០១៧ ដែលបានចេញផ្សាយដោយក្រុមហ៊ុន VTrust Appraisal ការផ្គត់ផ្គង់លំនៅដ្ឋាននៅទូទាំងប្រទេស បានកើនឡើង ១១ ភាគរយនៅឆ្នាំ ២០១៧ ជាមួយនឹងលំនៅដ្ឋានចំនួន ១៣,៩០០ ខ្នង ត្រូវបានផ្គត់ផ្គង់នៅក្នុងទីផ្សារ ធៀបនឹងលំនៅដ្ឋាន ១២,៥០០ ខ្នងកាលពីឆ្នាំ ២០១៦។
លោក ហ៊ឹម សីហា នាយកស្រាវជ្រាវនៅក្រុមហ៊ុន VTrust Appraisal និងជាអ្នកនិពន្ធរបាយការណ៍នេះ បាននិយាយថាឆ្នាំ២០១៧ គឺជាឆ្នាំដ៏ល្អបំផុត សម្រាប់ការសាងសង់លំនៅដ្ឋាន ដោយសារមានតម្រូវការកើនឡើងខ្លាំង។ គម្រោងលំនៅដ្ឋានជាច្រើន បានបញ្ចប់ការសាងសង់នៅឆ្នាំនេះ ជាពិសេសគម្រោងលំនៅដ្ឋានតម្លៃសមរម្យ។
ទន្ទឹមនេះ បណ្ឌិត គីម ហ៊ាង ប្រធានសមាគមន៍អ្នកវាយតម្លៃ និងភ្នាក់ងារអចលទ្រព្យកម្ពុជា បានលើកឡើងថា តម្រូវការលំនៅដ្ឋានតម្លៃសមរម្យ ដែលមានតម្លៃចន្លោះពី ៣០,០០០ ទៅ ៤០, ០០០ ដុល្លារ មានការកើនឡើងខ្លាំងនៅឆ្នាំ២០១៧ ហើយនឹងបន្តកើនឡើងនៅឆ្នាំ២០១៨ខាងមុខ។
យ៉ាងណាក៏ដោយ គម្រោងខុនដូ បានធ្លាក់ចុះពី ១៨,៥០០ យូនីត ក្នុងឆ្នាំ២០១៦ ដល់ ១០,០០០ យូនីត នៅក្នុងឆ្នាំ២០១៧ ពោលគឺធ្លាក់ចុះ ៤៥ភាគរយ ធៀបនឹងឆ្នាំ២០១៦។ នេះបើយោងតាមរបាយការណ៍ VTrust ។
ការធ្លាក់ចុះនេះ បណ្ដាលមកពីការបារម្ភ ពីចំនួនផ្គត់ផ្គង់ខុនដូច្រើនពេក នៅក្នុងទីផ្សារ។ ប្រការនេះ ជំរុញឱ្យអ្នកអភិវឌ្ឍន៍ ប្តូរមកវិនិយោគលើទីផ្សារថ្មីវិញម្ដង គឺលំនៅដ្ឋានតម្លៃសមរម្យ។ លោក សីហា បានបន្ថែមថានៅក្នុងឆ្នាំ២០១៨ អ្នកអភិវឌ្ឍន៍នឹងបញ្ចុះតម្លៃ គម្រោងលំនៅដ្ឋានរបស់ពួកគេ ដើម្បីប្រកួតប្រជែងក្នុងទីផ្សារ និងផ្តល់នូវជម្រើសទូទាត់ប្រសើរជាងនេះ ដើម្បីជំរុញការលក់។
លោក បណ្ឌិត គីំម ហ៊ាង ផ្ដល់យោបល់ថា គេគួរតែទិញអចលនទ្រព្យនៅឆ្នាំ២០១៨ នេះ ដោយសារតែវាជាពេលដែលមានអ្នកលក់ច្រើន ដូច្នេះតម្លៃនឹងធូរថ្លៃ ហើយគេអាចទិញបានអចលនទ្រព្យល្អៗ។
និន្នាការសំខាន់មួយទៀត នៅឆ្នាំ ២០១៧ នេះគឺការរឹតបន្តឹងការចេញអាជ្ញាបណ្ណគម្រោងសាងសង់ដល់អ្នកអភិវឌ្ឍន៍។ ក្រសួងសេដ្ឋកិច្ច និងហិរញ្ញវត្ថុ កាលពីចុងខែតុលាឆ្នាំ២០១៧ បានព្រាងច្បាប់ ដើម្បីធានាថា រាល់គម្រោងសាងសង់ នឹងត្រូវបញ្ចប់តាមកាលកំណត់។
លោក បណ្ឌិត គីម ហ៊ាង មានប្រសាសន៍ថា ច្បាប់ថ្មីនេះល្អសម្រាប់កម្ពុជា ព្រោះមានតែអ្នកដែលមានទុនវិនិយោគពិតប្រាកដទេ ដែលអាចវិនិយោគលើគម្រោងអចលនទ្រព្យ។ ម្យ៉ាងទៀត វានឹងជួយកាត់បន្ថយគម្រោង ដែលមិនទាន់សាងសង់ ដែលអាចប៉ះពាល់ដល់អ្នកទិញ នៅពេលដែលគម្រោងនោះ មិនបានសាងសង់ចប់ទាន់ពេល។ កន្លងមក ធ្លាប់មានក្រុមហ៊ុនដែលប្រើប្រាស់ដី ធ្វើជាទ្រព្យបញ្ចាំ ដើម្បីខ្ចីលុយធនាគារ ហើយយកថវិកានោះ មកសាងសង់លំនៅដ្ឋាន ហើយប្រកាសលក់មុនគម្រោង។ ប្រការនេះ មានហានិភ័យខ្លាំងណាស់សម្រាប់អ្នកទិញ។
ការកើនឡើងទេសចរចិននៅកម្ពុជា គឺជានិន្នាការសំខាន់មួយទៀត សម្រាប់កំណើនវិស័យអចលនទ្រព្យនៅកម្ពុជា នៅឆ្នាំ២០១៧ ។ ប្រការនេះ នឹងបន្តផ្ដល់ផលវិជ្ជមានជាច្រើនទៀតនៅឆ្នាំ ២០១៨ ខាងមុខនេះ។
នាវេទិកាថ្នាក់ជាតិលើកទី២ ស្ដីពីគោលដៅទេសចរចិនមកកម្ពុជា នៅខែតុលាឆ្នាំ២០១៧ រដ្ឋមន្ត្រីក្រសួងទេសចរណ៍ លោក ថោង ខុន គូសបញ្ជាក់ថា កម្ពុជាគ្រោងទាក់ទាញភ្ញៀវទេសចរចិន ចំនួន២លាននាក់ មកកាន់កម្ពុជានៅត្រឹមឆ្នាំ ២០២០។
«ការស្ដែងឱ្យឃើញនៅឆ្នាំ ២០១៧នេះ ទេសចរចិនមកកាន់កម្ពុជា បានកើនឡើងដល់ជាង១លាននាក់ រួចស្រេចទៅហើយ ដែលជាចំនួនច្រើនមិនធ្លាប់មានពីមុនមក នៅកម្ពុជា។ ប្រាក់ចំណូលដែលបានពីចំនួនភ្ញៀវទេសចរចិន មានចំនួនជាង៧០០លានដុល្លារ»។ នេះបើយោងតាមលោករដ្ឋមន្ត្រី។
ទស្សនកិច្ចរបស់នាយករដ្ឋមន្ត្រីចិនមកកម្ពុជា ដែលបានចុះកិច្ចព្រមព្រៀងចំនួន១៩ រវាងប្រទេសទាំង២ ជាពិសេសកិច្ចព្រមព្រៀង លើការអភិវឌ្ឍន៍ហេដ្ឋារចនាសម្ព័ន្ធបន្ថែមទៀត នៅកម្ពុជា នឹងជំរុញឱ្យវិស័យអចលនទ្រព្យ កាន់តែមានភាពរីកចម្រើនច្រើនថែមទៀត នៅឆ្នាំ២០១៨នេះ។