អន្តរជាតិ
ស្នេហ៍គម្លាតវ័យ១៥ឆ្នាំ កូនក្រមុំជាអ្នកជូនបណ្ណាការជិត៨សែនដុល្លារទៅគ្រួសារកូនកំលោះ
× ចិន៖ បុរសចំណាស់ការជាមួយនារីក្មេងគឺជាព័ត៌មានធម្មតា។ ប៉ុន្តែបណ្តាញសង្គម Weibo របស់ចិន កាលពីពេលថ្មីៗកន្លងមកនេះ មានការពិភាក្សាយ៉ាងក្តៅគគុកលើប្រធានបទស្ត្រីអ្នកមានវ័យ៣៨ឆ្នាំ រៀបការជាមួយយុវជនអាយុ២៣ឆ្នាំ។ សារព័ត៌មាន Apple Daily បានរាយការណ៍ថា កូនក្រមុំ បានជូនកាដូ និងបណ្ណាការដែលមានទឹកប្រាក់សរុបប្រមាណ៨សែនដុល្លារអាមេរិក។
ស្នេហាខុសវ័យរហូតដល់ទៅ១៥ឆ្នាំ មានការជំទាស់យ៉ាងខ្លាំងពីសំណាក់ឪពុកម្តាយខាងប្រុស។ ម្តាយខាងកូនកំលោះមានអាយុលើសខាងស្រីតែ១ឆ្នាំប៉ុណ្ណោះ។ ប៉ុន្តែទីបំផុត ពិធីអាពាហ៍ពិពាហ៍យ៉ាងអធិកអធម បានកើតឡើងកាលពីថ្ងៃទី១០ ខែមករា នៅក្រុង Qionghai ខេត្ត Hainan ប្រទេសចិន។
កាសែត Apple Daily បានផ្សាយឲ្យដឹងថា គូស្នេហ៍ដែលមិនត្រូវបានបង្ហើបឈ្មោះនោះ ភ្លាត់ស្នៀតមានកូនជាមួយគ្នា។ ដើម្បីទទួលបានពរជ័យពីមេបាខាងប្រុស ស្ត្រីមេម៉ាយដែលមានអាយុ៣៨ឆ្នាំ និងជាសេដ្ឋិនីខាងអចលនទ្រព្យផងដែរនោះ សុខចិត្តរ៉ាប់រងរាល់ការចំណាយទាំងអស់ រួមទាំងជូនបណ្ណាការជាទីគាប់ចិត្តដល់ឪពុកម្តាយក្មេក។
ចំណងដៃជាសាច់ប្រាក់ចំនួន៦៦០ ០០០យន់ (១០៤ ២៧៣ដុល្លារអាមេរិក) ផ្ទះ និងដីឡូតិ៍ រួមទាំងរថយន្ត Ferrari មួយគ្រឿង ដែលមានតម្លៃសរុប ៥លានយន់ (ជិត៨សែនដុល្លារអាមេរិក) ជាការចំណាយទាំងស្រុងរបស់កូនក្រមុំ ដែលមានកូនអាយុ១៤ឆ្នាំ ជាមួយស្វាមីមុន។
អ្នកប្រើប្រាស់បណ្តាញសង្គម Weibo បានបញ្ចេញមតិសឹងតែដូចជាគ្នាលើករណីអាពាហ៍ពិពាហ៍នេះ។ ពួកគេយល់ថា កូនកំលោះដ៏សង្ហាដែលមានអាយុ២៣ឆ្នាំនោះ មិនមានក្តីស្នេហ៍ពិតប្រាកដនោះឡើយ ពោលគឺមើលឃើញលុយភរិយាច្រើនជាង។
ទោះបីជាយ៉ាងណាក៏ដោយ មនុស្សមួយចំនួននៅតែផ្ញើរជូនពរដល់គូស្វាមីថ្មីថ្មោង ដោយពួកគេរង់ចាំមើលដំណើរទៅមុខរបស់អ្នកទាំងពីរ៕
© រក្សាសិទ្ធិដោយ thmeythmey.com