អន្តរជាតិ
មហាយក្សចិនសាកល្បងប្រព័ន្ធស្ទាក់ចាប់មីស៊ីលរបស់ខ្លួនដោយជោគជ័យ
× ដើមសប្តាហ៍នេះ ក្រុងប៉េកាំងបានសម្រេចជោគជ័យក្នុងការសាកល្បងប្រព័ន្ធចាប់មីស៊ីលរបស់ខ្លួន ហើយរបបដឹកនាំនេះបានអះអាងថា វាជាការពង្រឹងសមត្ថភាពការពារខ្លួន មិនមានគោលដៅប្រឆាំងអ្នគណាឡើយ។ ចិនបន្តស្រាវជ្រាវប្រព័ន្ធការពារដែនអាកាសរបស់ខ្លួនស្របពេលដែលមហាអំណាចនេះជំទាស់ការដំឡើងខែលការពារមីស៊ីលអាមេរិកនៅលើទឹកដីកូរ៉េខាងត្បូងផងដែរ។
ក្រសួងការពារជាតិចិននៅថ្ងៃអង្គារទី ៦ ខែកុម្ភៈនេះបានទទួលស្គាល់ថា ខ្លួនបានសម្រេចជោគជ័យក្នុងការសាកល្បងប្រព័ន្ធស្ទាក់ចាប់មីស៊ីលកាលពីថ្ងៃចន្ទ។ នេះបើយោងតាមទីភ្នាក់ងារព័ត៌មាន AFP។
«ការសាកល្បងប្រព័ន្ធស្ទាក់ចាប់មីស៊ីលបាញ់ពីលើដីត្រូវបានរៀបចំឡើងកាលពីថ្ងៃចន្ទក្នុងដែនដីចិន។ ការសាលល្បងនេះគឺជោគជ័យស្របតាមការរំពឹងទុក»។ នេះជាការបញ្ជាក់របស់ក្រសួងការពារជាតិចិន។
រយៈពេលជាច្រើនឆ្នាំមកនេះ ក្រោមការដឹកនាំរបស់លោក ស៊ី ជិនភីង មហាយក្សចិនបន្តស្រាវជ្រាវ និងផលិតប្រព័ន្ធការពារដែនអាកាសជាពិសេសស្រាវជ្រាវមីស៊ីលច្រើនប្រភេទជាបន្តបន្ទាប់ ដើម្បីពង្រឹងសមត្ថភាពយោធារបស់ខ្លួន។ ក្នុងចំណោមនោះ ចិនក៏ស្រាវជ្រាវលើមីស៊ីលដែលអាចបាញ់ទម្លាក់ផ្កាយរណបនៅលើអាកាសដើម្បីអភិវឌ្ឍមីស៊ីលបាលីស្ទិករបស់ខ្លួនដែលអាចបំពាក់ក្បាលគ្រាប់នុយក្លេអ៊ែរផង។
ក្រៅប្រកាសពីភាពជោគជ័យរបស់ខ្លួន ក្រសួងការពារជាតិចិនក៏បានបញ្ជាក់ផងដែរថា ការមិនមែនជាការបង្អួតឬគំរាមកំហែងភាគីណាមួយឡើយ ហើយវាគ្រាន់តែជាការការពារខ្លួនប៉ុណ្ណោះ។
តាមពិតទៅរដ្ឋាភិបាលចិនបន្តស្រាវជ្រាវលើប្រព័ន្ធការពារមីស៊ីលនេះ ដោយសារខ្លួនបារម្ភខ្លាំងពីការដំឡើងខែលការពារមីស៊ីលរបស់អាមេរិក THADD នៅលើទឹកដីកូរ៉េខាងត្បូង។
ចិនខ្លាចថា ប្រព័ន្ធការពារមីស៊ីលរបស់អាមេរិក THAAD ដែលមានបំពាក់ដោយប្រព័ន្ធរ៉ាដាស៊េរីទំនើបនោះ អាចមើលឃើញចូលជ្រៅក្នុងទឹកដីចិន ហើយវាអាចគំរាមកំហែងសន្តិសុខរបស់ចិនខ្លាំងផង។ ប៉ុន្តែខាងអាមេរិក និងកូរ៉េខាងត្បូងអះអាងថា ការដំឡើងខែលការពារមីស៊ីលនេះគ្រាន់តែដើម្បីការពារសន្តិសុខ និងប្រឆាំងមីស៊ីលកូរ៉េខាងជើងប៉ុណ្ណោះ។
Tag:
ចិន
មីស៊ីល
ស៊ី ជិនភីង
© រក្សាសិទ្ធិដោយ thmeythmey.com