អន្តរជាតិ
តុលាការកំពូលគាំទ្រលោក ឌូទើតេ ឲ្យបន្តអនុវត្តច្បាប់«អាជ្ញាសឹក»មួយឆ្នាំទៀតនៅមិនដាណាវ រូបភាព៖ AFP
× តុលាការកំពូលហ្វីលីពីនបានសម្រេចគាំទ្រការពន្យារពេលអនុវត្តច្បាប់អាជ្ញាសឹកនៅមិនដាណាវក្នុងរយៈពេលមួយឆ្នាំបន្ថែមទៀតតាមការចង់បានរបស់ប្រធាធិបតី រ៉ូឌ្រីហ្គោ ឌូទើតេ។ យ៉ាងណាក៏ដោយក្រុមសិទ្ធិមនុស្សបានអះអាងថា ការសម្រេចរបស់តុលាការនេះជាបញ្ហាធំសម្រាប់សិទ្ធិមនុស្សហ្វីលីពីន។
ចុងក្រោយក្រឹត្យពន្យារពេលអនុវត្តច្បាប់អាជា្ញសឹករយៈពេលមួយឆ្នាំទៀតនៅកោះមិនដាណាវរបស់ប្រធានាធិបតី រ៉ូឌ្រីហ្គោ ឌូទើតេ ត្រូវបានតុលាការកំពូលហ្វីលីពីនទទួលយកជាផ្លូវការហើយនៅថ្ងៃអង្គារទី ៦ ខែកុម្ភៈនេះ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន AFP។
តុលាការកំពូលហ្វីលីពីនបានថ្លែងតាមសេចក្តីថ្លែងការណ៍របស់ខ្លួនថា៖« ប្រធានាធិបតី និងសភាមានអំណះអំណាងគ្រប់គ្រាន់ដើម្បីពន្យារពេលការអនុវត្តច្បាប់អាជ្ញាសឹកនេះ។ ចលនាបះបោរដែលគំរាមកំហែងក្រុងម៉ារ៉ាវីនៅតែបន្តកើតមានឡើយ ហើយវាជារឿងចាំបាច់ដែលត្រូវពន្យារពេលអនុវត្តដើម្បីសុវត្ថិភាពសាធារណៈ»។
បន្ទាប់ពីតុលាការកំពូលសម្រេចទទួលយកក្រឹត្យប្រធានាធិបតីនេះហើយ សភាទាំងពីរថ្នាក់ក៏ប្រកាសគាំទ្រក្រឹត្យដែលមានគោលដៅពន្យារការអនុវត្តច្បាប់អាជ្ញាសឹកនេះរហូតដល់ចុងឆ្នាំ ២០១៨ ដែរ។ លោក ឌូទើតេ បានសម្រេចដាក់អនុវត្តច្បាប់អាជ្ញាសឹកនៅទូទាំងមិនដាណាវ ដែលមានប្រជាជនរស់នៅ ២០ លាននាក់ កាលពីខែឧសភាឆ្នាំ ២០១៧ នៅពេលដែលក្រុមភេរវជនដែលជាបណ្តាញក្រុមរដ្ឋឥស្លាមវាយយប្រហារនិងដណ្តើមកាន់កាប់ទីក្រុងម៉ារ៉ាវីនោះ។
រដ្ឋាភិបាលហ្វីលីពីនអះអាងថា ក្រុមនេះមានចេតនាចង់យកតំបន់ភាគខាងត្បូងហ្វីលីពីនដើម្បីបង្កើតរដ្ឋឥស្លាមនៅក្នុងតំបន់អាស៊ីអាគ្នេយ៍ផងដែរ។ គេនៅចាំបានថា យុទ្ធនាការរំដោះក្រុងម៉ារ៉ាវីនេះត្រូវចំណាយពេលវេលាប្រាំខែឯណោះដោយមានការគាំទ្រពីទាហានអាមេរិកផង ហើយការរំដោះទីក្រុងពីកណ្តាប់ដៃភេរវជនេះធ្វើឲ្យមានមនុស្សស្លាប់សរុបច្រើនជាង ១១០០នាក់ឯណោះ។
ទោះជាអាជ្ញាធរចាត់ទុកថា ការបន្តអនុវត្តច្បាប់អាជ្ញាសឹកនេះជារឿងចាំបាច់សម្រាប់រក្សាសន្តិសុខ សណ្តាប់ធ្នាប់ និងសន្តិភាពតំបន់ក៏ដោយ នៅហ្វីលីពីនច្បាប់អាជ្ញាសឹកជារឿងចម្រូងចម្រាស និងរសើបបំផុតចាប់ពីជំនាន់មេដឹកនាំផ្តាច់ការ ហ្វែរឌីណង់ ម៉ាកូស។ ខាងក្រុមអ្នករិះគន់យល់ឃើញថា ការបន្តច្បាប់អាជ្ញាសឹកនេះជាគ្រោះថ្នាក់សម្រាប់សិទ្ធិមនុស្សក្នុងប្រទេស ហើយការបន្តពន្យាការអនុវត្តនេះជាការរំលោភរដ្ឋធម្មនុញ្ញផង។
ប៉ុន្តែតុលាការកំពូលបានច្រានចោលការចោទប្រកាន់នេះដោយលើកអំណះអំណាងថា រដ្ឋធម្មនុញ្ញមិនមានចែងឡើយពាក់ព័ន្ធចំនួនដងនៃការពន្យារពេលអនុវត្តច្បាប់អាជ្ញាសឹកនោះ។ ដូច្នេះការអះអាងថា វាជាការរំលោភរដ្ឋធម្មនុញ្ញនោះជារឿង មិនត្រឹមត្រូវឡើយ៕
Tag:
ច្បាប់អាជ្ញាសឹក
ហ្វីលីពីន
មិនដាណាវ
រ៉ូឌ្រីហ្គោ ឌូទើតេ
© រក្សាសិទ្ធិដោយ thmeythmey.com