កូរ៉េខាងជើងមិនចង់ជួបមន្ត្រីអាមេរិកនៅកូរ៉េខាងត្បូង ខណៈអាមេរិកត្រៀមដាក់ទណ្ឌកម្មថ្មីទៀត

អន្តរជាតិ

កូរ៉េខាងជើងមិនចង់ជួបមន្ត្រីអាមេរិកនៅកូរ៉េខាងត្បូង ខណៈអាមេរិកត្រៀមដាក់ទណ្ឌកម្មថ្មីទៀត

08, Feb 2018 , 12:16 pm

រូបភាព

ដោយ: តន ចាន់រិទ្ធារ៉ា

នៅថ្ងៃទី៨ ខែកុម្ភៈ សារព័ត៌មានរដ្ឋកូរ៉េខាងជើង KCNA បានផ្សាយថា មន្ត្រីកូរ៉េខាងជើងគ្មានគម្រោងជួបប្រតិភូអាមេរិកអំឡុងព្រឹត្តិការណ៍អូឡាំពិករដូវរងារនៅកូរ៉េខាងត្បូងឡើយ។ ជំហររបស់កូរ៉េខាងជើង បានបង្អាក់ក្ដីសង្ឃឹមថា ព្រឹត្តិការណ៍កីឡារៀបចំរៀងរាល់បួនឆ្នាំម្ដងនេះ នឹងក្លាយជាវេទិកាដែលសត្រូវទាំងពីរអាចជួបចរចាគ្នាបានលើសំណុំរឿងនុយក្លេអ៊ែរកូរ៉េខាងជើង។ ចំណែកអាមេរិកវិញក៏ត្រៀមប្រកាសទណ្ឌកម្មថ្មីលើកូរ៉េខាងជើងដែរ។

គ្មានឡើយជំនួបរវាងមន្ត្រីកូរ៉េខាងជើង និងអាមេរិកក្នុងព្រឹត្តិការណ៍អូឡាំពិករដូវរងារឆ្នាំ២០១៨ នៅកូរ៉េខាងត្បូង ដែលចាប់ផ្ដើមនៅថ្ងៃទី៩ ខែកុម្ភៈ។ កូរ៉េខាងជើងបានបញ្ជូនប្រតិភូជាន់ខ្ពស់ដឹកនាំលោក គីម យ៉ុងណាម ប្រធានសភា ដែលអមដំណើរដោយលោកស្រី គីម យ៉ូចុង ប្អូនស្រីបង្កើតលោក គីម ជុងអ៊ុន ។ ឯប្រតិភូអាមេរិកវិញមានវត្តមានលោកអនុប្រធានាធិបតី ម៉ៃ ផេន និងមានកូនស្រីលោក ដូណាល់ ត្រាំ ផង។

ទីភ្នាក់ងារព័ត៌មានរដ្ឋកូរ៉េខាងជើង KCNA បានស្រង់សម្ដីមន្ត្រីក្រសួងការបរទេសម្នាក់ថា កូរ៉េខាងជើងមិនបានអង្វរសុំជួបចរចាជាមួយអាមេរិកឡើយ ហើយក៏មិនខ្ចីអង្វរនៅថ្ងៃពេលខាងមុខដែរ។ បើតាមទីភ្នាក់ងារព័ត៌មានកូរ៉េខាងត្បូង Yonhap មន្ត្រីដដែលនេះប្រកាសច្បាស់ៗថា កូរ៉េខាងជើងគ្មានឆន្ទៈជួបមន្ត្រីអាមេរិកអំឡុងទស្សនកិច្ចនៅកូរ៉េខាងត្បូងឡើយ។

វត្តមានរួមគ្នារបស់មេដឹកនាំជាន់ខ្ពស់អាមេរិក និងកូរ៉េខាងជើងនៅក្នុងព្រឹត្តិការណ៍តែមួយ គឺជារឿងកម្រ ដែលនេះបង្កក្ដីរំពឹងថា នឹងមានជួបគ្នាមិនខាន។ ទន្ទឹមនឹងការបដិសេធរបស់កូរ៉េខាងជើង ក្រសួងការបរទេសអាមេរិកក៏ធ្លាប់និយាយដែរថា ប្រតិភូអាមេរិកមិនទាន់គម្រោងជួបមន្ត្រីកូរ៉េខាងជើងដែរ។ លោកអនុប្រធានាធិបតី ផេន លើកឡើងថា អាមេរិកមិនអនុញ្ញាតឲ្យកូរ៉េខាងជើងប្រើប្រាស់ព្រឹត្តិការណ៍នេះដើម្បីប្រយោជន៍ខ្លួនឡើយ។

មុនចូលរួមកម្មវិធីបើកអូឡាំពិកនៅទីក្រុងព្យុងយ៉ាង លោក ផេន បានប្រកាសពីទីក្រុងតូក្យូថា អាមេរិកដាក់ទណ្ឌកម្មសេដ្ឋកិច្ចដ៏ធ្ងន់បំផុតលើកូរ៉េខាងជើង។ នៅជប៉ុន អនុប្រធានាធិបតីអាមេរិករូបនេះបានប្រកាសពីការប្ដេជ្ញាចិត្តរបស់ក្រុងវ៉ាស៊ីនតោនដើម្បីដាក់សម្ពាធអតិបរមាលើកូរ៉េខាងជើង និងការពារសម្ព័ន្ធមិត្តតំបន់អាស៊ី។ លោក ផេន និយាយថា ជម្រើសទាំងអស់ត្រូវដាក់លើតុ ហើយអាមេរិកបានបញ្ជូនសព្វាវុធទំនើបៗរបស់ខ្លួនទៅជប៉ុន និងតំបន់ទាំងមូលដើម្បីរក្សាសន្តិសុខ។

តាមពិតទៅ អាមេរិកមិនជឿថា កូរ៉េខាងជើងមានបំណងសុទ្ធចិត្តក្នុងការចូលរួមព្រឹត្តិការណ៍អូឡាំពិកចាប់ពីថ្ងៃទី៩ ដល់ថ្ងៃទី២៥ ខែកុម្ភៈនេះឡើយ និងអះអាងថា កូរ៉េខាងជើងប្រើប្រាស់វត្តមានរបស់ខ្លួនដើម្បីកេងចំណេញប៉ុណ្ណោះ។ អនុប្រធានាធិបតីអាមេរិកបញ្ជាក់ថា អាមេរិកមិនអនុញ្ញាតឲ្យកូរ៉េខាងជើងយកកម្មវិធីអូឡាំពិកដើម្បីលាក់សកម្មភាពបំពានប្រជាជន និងបង្កការគំរាមកំហែងដល់សន្តិសុខតំបន់ឡើយ៕