ជាតិ
ទូតចិន ៖លោកខាងលិចច្រណែន ទើបបង្កើតព័ត៌មានបង្ខូចឈ្មោះអ្នកវិនិយោគចិននៅកម្ពុជា
× ភ្នំពេញ៖ ស្ថានទូតចិនប្រចាំកម្ពុជា ចេញមុខបកស្រាយការពារក្រុមអ្នកវិនិយោគចិន ដែលកំពុងរងការរិះគន់ថា មករកស៊ីនៅកម្ពុជា ដើម្បីលាងលុយកខ្វក់ ។
ឯកអគ្គរដ្ឋទូតចិនប្រចាំកម្ពុជាលោក ស្យុង ប៉ អះអាងថា គ្មានជនជាតិចិនមកវិនិយោគនៅកម្ពុជា ដើម្បីលាងលុយកខ្វក់នោះទេ។ លោក ស្យុង ប៉ បដិសេធថា ព័ត៌មាននេះគឺជាបង្ខូចកេរ្តិ៍ឈ្មោះអ្នកវិនិយោគចិនប៉ុណ្ណោះ។ បើតាមលោក ស្យុង ប៉ ពាក្យចចាមអារ៉ាមទាំងនេះ កើតឡើងដោយសារការវាយតម្លៃរបស់ពួកលោកខាងលិច ដែលចង់បំបែកបំបាក់ភាពរុងរឿងរវាងចិន និងកម្ពុជា។
ថ្លែងក្នុងសន្និសីទកាសែតកាលពីថ្ងៃទី៨ កុម្ភៈ ឯកអគ្គរដ្ឋទូតចិនប្រចាំកម្ពុជារូបនេះ បានប្រើរយៈពេល២ម៉ោង ដើម្បីបកស្រាយការពារអ្នកវិនិយោគចិន តាមរយៈអ្នកបកប្រែដូច្នេះថា៖«បើសិនបើមានមតិណាមួយបាននិយាយថា វិនិយោទុនរបស់ចិននៅកម្ពុជាមួយភាគធំ គឺសុទ្ធតែជាការលាងលុយនោះ គឺមិនមិនត្រឹមត្រូវទេ វាជាការលាបពណ៌ និងមួលបង្កាច់ ចំពោះវិនិយោគិនចិននៅកម្ពុជា។ កន្លងមកខ្ញុំមានចំណាប់អារម្មណ៍ថាសារព័ត៌មានមួយចំនួនបានចុះផ្សាយថា វិនិយោគិនចិននៅកម្ពុជា ភាគច្រើនគឺលាងលុយ ខ្ញុំយល់ឃើញថា ព័ត៌មានទាំងអស់នោះភាគច្រើន គឺមកពីប្រទេសប៉ែកខាងលិច…។ ព័ត៌មានទាំងនោះចុះផ្សាយគឺមានគោលបំណងរបស់គាត់ គឺសំដៅរឿងនយោបាយ ដោយសារពួកគាត់មិនចង់មើលឃើញទំនាក់ទំនងចិន និងកម្ពុជាល្អប្រសើរ ដូចពេលបច្ចុប្បន្នទេ»។
បន្ថែមពីលើនេះលោក ស្យុង ប៉ បាននិយាយថា រដ្ឋាភិបាលចិន មានចំណាត់ការនិងត្រួតពិនិត្យតឹងរឹង ចំពោះថវិការបស់អ្នកវិនិយោគចិន មុននឹងអនុញ្ញាតឲ្យមកដាក់ទុនរកស៊ីនៅកម្ពុជា។
«បើមានវិនិយោគចិន លាងលុយនៅកម្ពុជា ភាគីចិនប្រឆាំងជាដាច់ខាតនឹងចាត់វិធានការជាដាច់ខាត។ ហើយបើគម្រោងវិនិយោគគិនណា ដែលប្រើប្រាស់សម្បទានឥណទានវិនិយោគនៅកម្ពុជានោះ គឺថវិកាទាំងនេះ គ្មានបញ្ហាទេ ។ ព្រោះថវិកានេះ មានការសម្របសម្រួលពីរដ្ឋាភិបាលចិន និងក្រសួងសេដ្ឋកិច្ចនិងហិរញ្ញវត្ថុកម្ពុជា ហើយថវិកាទាំងនេះសុទ្ធតែជាលុយមានតម្លាព»។ នេះជាការអះអាងរបស់ឯកអគ្គរដ្ឋទូតប្រចាំកម្ពុជា ដែលបានបន្តថា សូម្បីតែថវិកាចេញ-ចូលប្រទេសចិន ក៏រដ្ឋាភិបាលលោកមានវិធានការច្បាប់ត្រួតពិនិត្យតឹងរឹងផងដែរ។
កន្លងមកសារព័ត៌មានរបស់អាមេរិកThe News York Times បានចុះផ្សាយថា កម្ពុជាគឺជាទីកន្លែងមួយ ដែលប្រើប្រាស់ទុនវិនិយោគក្នុងវិស័យសេដ្ឋកិច្ច ជាមួយនឹងប្រាក់ដុល្លារអាមេរិកនៅក្នុងគណនី សម្រាប់ការបង្វិលប្រាក់ក្នុងទំហំយ៉ាងច្រើន ដែលវាអាចបង្កើតឱកាសឲ្យអ្នកវិនិយោគចិន លាងសម្អាតប្រាក់ទៀតផង។
The New York Times បានស្រង់សម្តី លោក George McLeod អ្នកជំនាញពិគ្រោះយោបល់ពីហានិភ័យនយោបាយ ដែលមានមូលដ្ឋាននៅទីក្រុងបាងកក យ៉ាងដូច្នេះថា៖«អ្នកជំនួញចិន បានដឹងយ៉ាងច្បាស់ថា កម្ពុជាជាប្រទេសមានបញ្ហាបំណុលធ្ងន់ធ្ងរ ។ អ្នកជំនួញ ដែលមកវិនិយោគទាំងនោះ ភាគច្រើនមានមូលធនប្រហែល២ ទៅ៣លានដុល្លារប៉ុណ្ណោះ ដែលកំពុងដាក់ទុនវិនិយោគនៅក្រៅប្រទេសចិន ដើម្បីគេចវេះចេញ ពីការតាមដានរបស់អាជ្ញាធរចិនផងដែរ»។
ទាក់ទងនឹងបញ្ហានេះអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន ធ្លាប់ប្រាប់សារព័ត៌មានថ្មីៗថា អ្នកវិនិយោគចិន ដែលមកដាក់ទុនរកស៊ីនៅកម្ពុជា សុទ្ធតែទទួលបានការគាំទ្រ និងលើកទឹកចិត្តពីរដ្ឋាភិបាលចិន។ ក្នុងន័យនេះ លោក ផៃ ស៊ីផាន បានពន្យល់ថា រាល់ថវិកាដែលអ្នកជំនួញចិន យកមកវិនិយោគនេះ គឺមានការត្រួតពិនិត្យពីប្រធានាធិបតីចិន លោក ស៊ី ជិនពីង ឬពីនាយករដ្ឋមន្ត្រីជាដើម មុននឹងអនុញ្ញាតឲ្យពួកគេមករកស៊ីនៅកម្ពុជា។ បើតាមលោក ផៃ ស៊ីផាន ធនាគារជាតិកម្ពុជា ក៏មានការត្រួតពិនិត្យម៉ត់ចត់ ចំពោះថវិកាដែលបង្វិលចូលគណនីអ្នកវិនិយោគបរទេសនៅកម្ពុជាទៀតផង៕
© រក្សាសិទ្ធិដោយ thmeythmey.com