ការស្លាប់​ដោយសារតែ​ជំងឺសរសៃប្រសាទ​កើនឡើង​ដោយសារតែ​ជីវិត​សម័យ​ទំនើប​
ពីនេះ ពីនោះ / មិនយល់...!
ព័ត៍មានសុខភាព
ការស្លាប់​ដោយសារតែ​ជំងឺសរសៃប្រសាទ​កើនឡើង​ដោយសារតែ​ជីវិត​សម័យ​ទំនើប​
09, Feb 2018 , 6:59 am        
រូបភាព
ដោយ: ថ្មីៗ
​យោងទៅតាម​សេចក្តីរាយការណ៍​របស់​សារព័ត៌មាន Mail Online បាន​ឲ្យ​ដឹងថា បច្ចេកវិទ្យា អាហារ​មាន​ជាតិគីមី និង​ការបំពុល​បរិយាកាស គឺជា​មូល​ហេតុដែល​នាំ​ឲ្យ​មនុស្ស​យើង​មាន​ជំងឺ​ភ្លេចភ្លាំង​លឿន​។ ប៉ុន្តែ​ការលើកឡើង​នេះ​គឺមាន​អំណះអំណាង​គាំទ្រ​បន្តិចបន្តួច​ប៉ុណ្ណោះ​។



​ការសិក្សា​នេះ​បាន​ពី​និត្យ​ទៅលើ​អត្រា​នៃ​ការស្លាប់​របស់​ប្រទេស​អភិ​វ​ឌ្ឈ​ន៍​ចំនួន​១០ ដោយ​ក្នុងនោះ​មាន​អង់គ្លេស និង​អាមេរិក​ដែរ​។ អ្នកស្រាវជ្រាវ​បាន​ផ្តោត​សំខាន់​ជាពិសេស​ទៅលើ​អ្វីដែល​ពួកគេ​និយាយថា ការស្លាប់​ដោយសារតែ​ជំងឺសរសៃប្រសាទ​ដែល​វា​ទាក់ទង​នឹង​ខួរក្បាល និង​ប្រព័ន្ធ​សរសៃប្រសាទ​ដូចជា​ជំងឺសរសៃប្រសាទ​និង​ភ្លេចភ្លាំង​ជាដើម​។

​ការសិក្សា​នេះ​បាន​រកឃើញថា អត្រា​នៃ​ការស្លាប់​ទាំងអស់​បាន​ធ្លាក់ចុះ​ជាង​កាលពី ៣០​ឆ្នាំមុន​។ ប៉ុន្តែ​កម្រិត​នៃ​ការស្លាប់​ដោយសារ​ជំងឺសរសៃប្រសាទ​បាន​កើនឡើង​គួរ​ឲ្យ​កត់សម្គាល់​នៅពេល​ប្រៀបធៀប​ជាមួយនឹង​ទិន្នន័យ​ដែល​បានមកពី​ឆ្នាំ ២០០៨ ដល់ ២០១០ និង ឆ្នាំ ១៩៧៩ ដល់ ១៩៨១​។ វា​នៅតែ​មិនទាន់​ច្បាស់​ថា ហេតុអ្វី​បានជា​ចំនួន​អ្នកស្លាប់​ដោយសារ​ជំងឺសរសៃប្រសាទ​កើនឡើង​បែបនេះ​ឡើយ​។ អ្នកស្រាវជ្រាវ​បាន​ប៉ាន់​ស្មានថា ការពិត​ដែល​មនុស្ស​រស់នៅ​បានយូ​រ គឺមាន​ការរីកចម្រើន​ដ៏​ខ្លាំង​ទៅលើ​វិធីសាស្ត្រ​កំណត់​រោគវិនិច្ឆ័យ និង​ការផ្លាស់ប្តូរ​ដ៏​សំខាន់​ទាក់ទង​នឹង​របៀប​រស់នៅ និង​បរិ​ដ្ឋា​ន​ដូចជា ការប្រើប្រាស់​អាហារ​មាន​ជាតិគីមី​កាន់តែច្រើន ការបំពុល​កាន់តែច្រើន និង​បច្ចេកវិទ្យា​ថ្មីៗ​ដូចជា វាយ​ហ្វា​យ និង​ទូរស័ព្ទដៃ ដែល​អាច​នាំ​ឲ្យ​ចំនួន​នៃ​ការស្លាប់​កើន​ឡើយ​បាន​។

​ទោះបីជា​យ៉ាងណាក៏ដោយ វា​គ្រាន់តែ​ជាការ​ប៉ាន់ស្មាន​របស់​អ្នកស្រាវជ្រាវ​ទេ ដូច្នេះ​យក​ល្អ​គួរតែមាន​ការស្រាវជ្រាវ​កាន់តែច្រើន​បន្ថែមទៀត​ដើម្បី​ចង់ដឹងថា កត្តា​ដូចជា បច្ចេកវិទ្យា អាហារ​គីមី និង​ការបំពុល​បរិយាកាស អាចជា​ដើមហេតុ​នាំ​ឲ្យ​កើនឡើង​ការស្លាប់​ដោយសារតែ​ជំងឺសរសៃប្រសាទ​ឬ​អត់​៕

​ត្រួតពិនិត្យ​ដោយ www.health.com.kh​

© រក្សាសិទ្ធិដោយ thmeythmey.com