កីឡាអន្តរជាតិ
អន្តរជាតិ
PSG ផ្តល់ប្រាក់ឈ្នួលដ៏ច្រើនដល់កីឡាករ ក្នុងនោះ Neymar បានជិត៤លានដុល្លារក្នុង១ខែ
× Paris Saint-Germain បានចំណាយប្រាក់ឈ្នួលខ្ពស់បំផុតទៅកាន់កីឡាករ១២នាក់ ក្នុងចំណោមក្រុមទាំងអស់នៃលីកបាល់ទាត់កំពូលបារាំង ដែលក្នុងនោះ Neymar ស្ថិតនៅចំណាត់ថ្នាក់ទី១ មានថ្លៃពលកម្ម ៣.០៧លានអឺរ៉ូ (៣.៨លានដុល្លារ) ក្នុងមួយខែ។
បើតាមការផ្សាយរបស់ទីភ្នាក់ងារព័ត៌មាន AFP ក្រៅពី Neymar កីឡាកររបស់ PSG ចំនួន១១រូបទៀត រួមមាន ខ្សែប្រយុទ្ធអ៊ុយរូហ្គាយ Edinson Cavani រកចំណូលបាន ១.៥៤លានអឺរ៉ូក្នុងមួយខែ ខ្សែប្រយុទ្ធវ័យក្មេង Kylian Mbappe រកបាន ១.៥ លានអឺរ៉ូ និងខ្សែការពារប្រេស៊ីល Thiago Silva រកបាន ១.៣៣ លានអឺរ៉ូ។
បន្ទាប់មកខ្សែបម្រើអាហ្សង់ទីន Angel Di Maria និងខ្សែការពារប្រេស៊ីល Marquinhos ទទួលបានប្រាក់ឈ្នួល ១.១២ លានអឺរ៉ូក្នុង១ខែ ខ្សែបម្រើអន្តរជាតិអ៊ីតាលី Thiago Mottaat ៨៧៥.០០០ អឺរ៉ូ និង Javier Pastore ៧៧០.០០០ អឺរ៉ូ។
ខ្សែការពារប្រេស៊ីល Dani Alves ទទួលបាន ៧០០.០០០ អឺរ៉ូ ខ្សែប្រយុទ្ធអន្តរជាតិអាល្លឺម៉ង់ Julian Draxler និងខ្សែបម្រើអន្តរជាតិអ៊ីតាលី Marco Verratti សុទ្ធតែរកបាន ៦០០.០០០ អឺរ៉ូក្នុង១ខែ។ ខ្សែប្រយុទ្ធសញ្ជាតិបារាំងម្នាក់ទៀត Hatem Ben Arfa ទទួលបានប្រាក់ឈ្នួល ៥០០.០០០ អឺរ៉ូក្នុងមួយខែ។
ក្រៅពីកីឡាករ អ្នកចាត់ការទូទៅរបស់ក្រុមដែលមានមូលដ្ឋានក្នុងក្រុងប៉ារីស លោក Unai Emery ក៏មានប្រាក់ឈ្នួលប្រចាំខែខ្ពស់ជាងគេផងដែរ ដោយទទួលបាន ៤៥០.០០០អឺរ៉ូ តាមពីក្រោយដោយអ្នកចាត់ការ Monaco លោក Leonardo Jardim ទទួលបាន ៣៥០.០០០អឺរ៉ូ និងទី៣ អ្នកចាត់ការក្រុម Nantes គឺលោក Claudio Ranieri រកបាន ៣៤០.០០០អឺរ៉ូ៕
Tag:
បាល់ទាត់
ប្រាក់ឈ្នួលខ្ពស់បំផុត
Paris Saint-Germain
Neymar
© រក្សាសិទ្ធិដោយ thmeythmey.com