ជាតិ
នយោបាយជាតិ
តុលាការកំពូល បើកសវនាការនៅព្រឹកនេះ លើការសម្រេចឲ្យលោក អ៊ុំ សំអាន ជាប់ឃុំពីរឆ្នាំកន្លះ
× ភ្នំពេញ៖ តុលាការកំពូល នឹងបើកសវនាការនៅព្រឹកថ្ងៃទី៩ ខែកុម្ភៈ ឆ្នាំ២0១៨នេះ ដើម្បីជំនុំជម្រះលើបណ្តឹងសាទុក្ខរបស់លោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ ដែលកំពុងជាប់ពន្ធនាគារ ដោយសាររិះគន់ពីបញ្ហាព្រំដែនកម្ពុជា-វៀតណាម។ បណ្តឹងសាទុក្ខរបស់អតីតតំណាងរាស្ត្របក្សប្រឆាំង ដែលមានជំនាញផ្នែកព្រំដែនរូបនេះ គឺដើម្បីសុំប្រឆាំងនឹងតុលាការជាន់ទាប ដែលកាត់ទោសលោក ឲ្យជាប់ពន្ធនាគាររយៈពេលពីរឆ្នាំកន្លះ។
សមត្ថកិច្ច បានដឹកលោក អ៊ុំ សំអាន ទៅដល់សវនាការនៃតុលាការកំពូលហើយ។ សវនាការ នឹងចាប់ផ្តើមនៅបន្តិចទៀតនេះ។
មុននឹងឈានទៅដល់តុលាការកំពូល លោក អ៊ុំ សំអាន ធ្លាប់ពឹងមេធាវី ឲ្យដាក់បណ្តឹងទៅកាន់សាលាឧទ្ធរណ៍រួមមកហើយ ដើម្បីសុំប្រឆាំងនឹងការដាក់ទោសលើរូបលោក។ ប៉ុន្តែសាលាឧទ្ធរណ៍បានច្រានចោលការជំទាស់របស់លោក ដោយលើកឡើងថា ការសម្រេចរបស់សាលាដំបូងរាជធានីភ្នំពេញ គឺសមហេតុផល និងត្រឹមត្រូវតាមផ្លូវច្បាប់។
សូមរម្លឹកថា កាលពីអំឡុងខែតុលា ឆ្នាំ២0១៦ សាលាដំបូងរាជធានីភ្នំពេញ បានកាត់ទោសលោក អ៊ុំ សំអាន ឲ្យជាប់ពន្ធនាគាររយៈពេលពីរឆ្នាំកន្លះ និងពិន័យជាប្រាក់ចំនួនបួនលានរៀល ពីបទ«ញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងការបញ្ចេញទស្សនៈពីបញ្ហាព្រំដែនតាមហ្វេសប៊ុក។ មកដល់ពេលនេះ លោក បានជាប់ឃុំក្នុងពន្ធនាគារអស់រយៈពេលជិតមួយឆ្នាំកន្លះហើយ៕
Tag:
តុលាការ
មេធាវី
អ៊ុំ សំអាន
© រក្សាសិទ្ធិដោយ thmeythmey.com