កីឡាជាតិ
ជាតិ
ខ្សែបម្រើប្រយុទ្ធជម្រើសជាតិឡេសូតូ Tsotleho Jane មករួមរស់ជាមួយភ្នំពេញក្រោន រូបភាពពីហ្វេសប៊ុកក្លិបភ្នំពេញក្រោន
× ខ្សែបម្រើប្រយុទ្ធ Tsotleho Jane ដែលមានឈ្មោះក្រៅ Sunny ជាសមាជិកជម្រើសជាតិឡេសូតូ បានចុះកិច្ចសន្យារួមរស់ជាមួយក្លិបភ្នំពេញក្រោនសម្រាប់ក្របខណ្ឌលីគកំពូលកម្ពុជារដូវកាលឆ្នាំ២០១៨។ Sunny មានវ័យ២៦ឆ្នាំ បានចូលប្រឡូកក្នុងវិស័យកីឡាបាល់ទាត់តាំងពីអាយុ៤ឆ្នាំ នឹងធ្លាប់លេងឲ្យក្លិបក្របខណ្ឌលីគទី២របស់អាមេរិកទៀតផង។
កីឡាករ Tsotleho Jane វ័យ២៦ឆ្នាំ ដែលបានជាប់ជាសមាជិកជម្រើសជាតិរបស់ឡេសូតូតាំងពីឆ្នាំ២០១៤ រហូតបច្ចុប្បន្នបានចុះកិច្ចសន្យារួមរស់រយៈពេល១ឆ្នាំជាមួយក្លិបភ្នំពេញក្រោនសម្រាប់រដូវកាលឆ្នាំ២០១៨។ មុនផ្ទេរមកកាន់ទឹកដីកម្ពុជា Sunny ធ្លាប់លេងឲ្យក្លិបក្របខណ្ឌលីគទី២របស់សហរដ្ឋអាមេរិក Wilmington Hammerheads នៅឆ្នាំ២០១៤ និង ២០១៥។
ក្រោយមកកីឡាករសញ្ជាតិឡេសូតូរូបនេះ បានផ្លាស់ទៅកាន់ក្លិបក្របខណ្ឌលីគទី២របស់សហរដ្ឋអាមេរិកដូចគ្នា គឺ Richmond Kickers នៅឆ្នាំ២០១៦ និង ២០១៧ មុនមករួមរស់ជាមួយភ្នំពេញក្រោននៅឆ្នាំនេះ។
កីឡាករវ័យ២៦ឆ្នាំរូបនេះ កើតនៅឆ្នាំ១៩៩១ ក្នុងទីក្រុងម៉ាសេរុយ(Maseru)ប្រទេសឡូសូតូ(Lesotho)ដែលស្ថិតនៅក្នុងតំបន់អាហ្វ្រិកខាងត្បូង។ គេបានចូលប្រឡូកក្នុងវិស័យកីឡាបាល់ទាត់តាំងពីអាយុ៤ឆ្នាំ បន្ទាប់មកបានធ្វើជាយុវជនរបស់ក្លិបបាល់ទាត់ក្នុងស្រុកមួយ Ranger FC ពីឆ្នាំ១៩៩៥ ដល់ឆ្នាំ១៩៩៨។ ក្រោយមកគេបានផ្លាស់ទៅលេងឲ្យក្លិប Emmanuel FC ដែលមានមូលដ្ឋានក្នុងស្រុកដូចគ្នាពីឆ្នាំ១៩៩៨-២០០៣ មុនផ្លាស់ទៅរស់នៅលើទឹកដីអាមេរិកក្នុងទីក្រុង Louisville Kentucky នៅឆ្នាំ២០០៤។
នៅលើទឹកដីអាមេរិកកីឡាករសញ្ជាតិឡេសូតូរូបនេះ បានចូលរួមជាមួយក្លិបប្រចាំសាកលវិទ្យាល័យ Maryland Terrapin ពីឆ្នាំ២០១០ ដល់ពាក់កណ្តាលឆ្នាំ២០១៣ រួចបានផ្ទេរទៅកាន់ក្លិប United FC ពាក់កណ្តាលរដូវឆ្នាំ២០១៣។
កីឡាករជម្រើសជាតិឡេសូតូ Tsotleho Jane រួមជាមួយសមាជិកជាតិនិងអន្តរជាតិដទៃទៀត ត្រូវជួយភ្នំពេញក្រោនប្រជែងដណ្តើមជើងឯកក្របខណ្ឌលីគកំពូលកម្ពុជាសម្រាប់រដូវកាល២០១៨ ដែលនឹងបើកសករាជថ្មីនាថ្ងៃទី៣ មីនា ខាងមុខនេះ៕
Tag:
បាល់ទាត់
ភ្នំពេញក្រោន
Tsotleho Jane
© រក្សាសិទ្ធិដោយ thmeythmey.com