ជាតិ
សិល្បះ
អ្នកស្រី អ៊ុំ សុផានី ដាក់ប្រកួតប្រលោមលោក៦រឿង បានពានរង្វាន់ទាំង៦រឿង
× អ្នកស្រី អ៊ុំ សុផាន់នី គឺជាអ្នកនិពន្ធរឿងប្រលោមលោក និងកំណាព្យតាំងពីសម័យសង្គមរាស្ត្រនិយមមកម្លេះ។ អ្នកស្រីបានបោះពុម្ពសៀវភៅប្រលោមលោក៦រឿង ហើយសៀវភៅទាំងនោះសុទ្ធតែទទួលបានពានទាំងនៅក្នុងប្រទេស និងនៅក្រៅប្រទេស។ ស្នាដៃទាំង៦ដែលជាជ័យលាភីនោះ សុទ្ធតែផ្ដោតទៅលើសន្តិភាព សាមគ្គីភាព និងការរើសអើង។
នៅជិតតុទទួលភ្ញៀវគេឃើញមានទូសៀវភៅធំៗ២ សម្រាប់ដាក់សៀវភៅ និងឯកសារផ្សេងៗដែលអ្នកស្រី អ៊ុំ សុផានី បានសន្សំទុកតាំងពីសម័យសង្គមរាស្ត្រនិយម សម័យខ្មែរក្រហម និងសម័យក្រោយៗមកទៀត។ តាមការរៀបរាប់អមជាមួយការបង្ហាញឯកសារដែលត្រូវបានរៀប យ៉ាងមានរបៀបទៅតាមលំដាប់ខែឆ្នាំ អ្នកនិពន្ធប្រលោមលោកវ័យ៧២ឆ្នាំរូបនេះ បានរៀបរាប់ថា អ្នកស្រីចូលចិត្តសរសេរកំណាព្យ និងរឿងប្រលោមលោកតាំងតែពីកុមារភាព។ ដោយមានទម្លាប់សរសេរតាំងពីក្មេងនេះហើយ ទើបបានជានៅក្នុងរបបខ្មែរក្រហមអ្នកស្រី សុផានី តែងតែលួចកត់ត្រាពីសកម្មភាពការងាររបស់ខ្លួនរាល់ថ្ងៃ ហើយយកទៅលាក់យ៉ាងមានសុវត្ថិភាព។ អ្នកស្រីសុផានីបានបញ្ជាក់យ៉ាងដូច្នេះ៖«ខ្ញុំចូលចិត្តសរសេរតាំងពីក្មេង ដូច្នេះហើយបានជានៅសម័យខ្មែរក្រហម ខ្ញុំលួចសរសេរកំណាព្យ ថ្ងៃនេះខ្ញុំបានទៅនេះទៅនោះ បានធ្វើការនេះនៅឯណា ខ្ញុំសរសេររហូត ហើយយកទៅលាក់មិនឱ្យគេដឹងទេ”។
ដោយសារតែការឈឺចាប់ដែលត្រូវបានបន្សល់ទុកពីរបបវាលពិឃាតនេះហើយ ទើបអ្នកនិពន្ធរូបនេះ នឹកភ្នកសរសេរតែរឿងសន្តិភាព ការចេះយោគយល់អធ្យាស្រ័យគ្នា និងការរាប់អានមនុស្សដូចគ្នាឱ្យដូចជាបងប្អូន។ ស្នាដៃប្រលោមលោកជាប់ពានទាំង៦រឿង ដែលអ្នកនិពន្ធ អ៊ុំ សុផានី បានសរសេរមានរឿង ”ក្រោមដំណក់ទឹកភ្លៀង” ដែលនិយាយពីការរស់នៅក្នុងរបបខ្មែរក្រហម ដើម្បីអបអរបុណ្យជាតិ៧មករាខួបទី១០។ ស្នាដៃនេះបានចំណាត់ថ្នាក់លេខ៣។ រឿង ”ផ្ទៃមេឃតែមួយ” បានចំណាត់ថ្នាក់លេខ២ ក្នុងមហោស្រពតែងនិពន្ធមហាជនទូទាំងប្រទេសលើកទី៣។ រឿង “លោហិតតែ១” ដែលនិយាយពីភាពសាមគ្គីគ្នារវាងមនុស្សនិងមនុស្ស ទទួលបានរង្វាន់លេខ៤ ពីក្រសួងវប្បធម៌ ក្នុងមហោស្រពទិវាវប្បធម៌ទូទាំងប្រទេសលើកទី១។ រឿងដដែលនេះក៏ទទួលបានពានរង្វាន់កិត្តិយស ពីសមាគមអ្នកនិពន្ធខ្មែរនៅបរទេស(ប្រទេសបារាំង) ផងដែរ។ រឿង ”អ្នកណាជាម្ដាយខ្ញុំ” និយាយពីជីវិតក្មេងកំព្រា ជាប់ពានរង្វាន់សន្តិភាពចំណាត់ថ្នាក់លេខ១ ពីសមាគមអ្នកនិពន្ធខ្មែរនៅបរទេស(ប្រទេសបារាំង)។ រឿង ”សំណាញ់ជីវិត” ជាប់ពានរង្វាន់សុរាម្រិតចំណាត់ថ្នាក់លេខ៣ ពីក្រសួងវប្បធម៌ ក្នុងឱកាសមហោស្រពទិវាវប្បធម៌ទូទាំងប្រទេសលើកទី៣។ រឿង “កាលណាយើងជួបគ្នា” និយាយពីជីវិតក្នុងរបបខ្មែរក្រហម ជាប់ចំណាត់ថ្នាក់លេខ៣ ពីវេទិកាថែរក្សាប្រវត្តិសាស្ត្ររបស់កម្ពុជាប្រជាធិបតេយ្យ របស់មជ្ឈមណ្ឌលឯកសារកម្ពុជា។
ថ្វីដ្បិតស្ថិតក្នុងវ័យចំណាស់ទៅហើយក្តី អ្នកស្រី អ៊ុំ សុផានី នៅតែបន្តការសរសេររឿងប្រលោមលោក កំណាព្យ និង អត្ថបទភាពយន្តថែមទៀត។ ស្នាដៃប្រលោមលោករបស់អ្នកស្រី នៅមានច្រើនទៀតដែលមិនទាន់បានបោះពុម្ព និងដាក់ចូលរួមប្រកួតប្រជែង។ ការខិតខិប្រឹងប្រែងសរសេរប្រលោមលោក និងកំណាព្យក្ដី អ្នកស្រី សុផានី មានបំណងចង់បណ្ដុះស្មារតីសាមគ្គីគ្នា តាមរយៈអក្សរសិល្ប៍ ឱ្យដល់អ្នកដែលបានអានសៀវភៅរបស់ខ្លួន។ អ្នកនិពន្ធ អ៊ុំ សុផានី បញ្ជាក់ថា៖«តាមរយៈប្រលោមលោក និងកំណាព្យដែលខ្ញុំបានសរសេរ ខ្ញុំគ្រាន់តែចង់ឱ្យខ្មែរទាំងអស់គ្នាគិតថា យើងជាខ្មែរដូចគ្នា គួររួមសាគ្គីគ្នាឡើង។ យើងមានឈាមជាមនុស្សដូចគ្នា ជាតិសាសន៍ដូចគ្នា ចាំបាច់អីត្រូវកាប់សម្លាប់គ្នា រើសអើងគ្នា ធ្វើបាបគ្នា ហើយ ចង់រស់តែឯងនោះ?”៕
Tag:
អ៊ុំ សុផានី
ប្រលោមលោក
© រក្សាសិទ្ធិដោយ thmeythmey.com