កីឡាអន្តរជាតិ
អន្តរជាតិ
World Cup ៖ តើក្រុមទាំង៣២ នឹងទទួលបានប្រាក់ប៉ុន្មានពី FIFA?
× សហព័ន្ធកីឡាបាល់ទាត់អន្តរជាតិ (FIFA) បានប្រកាសអំពីទឹកប្រាក់ដែលត្រូវចំណាយក្នុងព្រឹត្តិការណ៍បាល់ទាត់ពិភពលោក FIFA World Cup ឆ្នាំ ២០១៨ នៅប្រទេសរុស្ស៊ី ក្នុងចំនួនសរុប ៧៩១លានដុល្លារអាមេរិក។ ប្រាក់ទាំងអស់នោះ នឹងត្រូវគិតគូលើការចំណាយ ៣ដំណាក់កាល គឺទី១លើប្រាក់រង្វាន់សម្រាប់ក្រុមនិមួយៗ ទី២ ការបង់ទៅឲ្យក្លិបដែលកីឡាប្រកបអាជីព និងទី៣ ថ្លៃសេវាធានារ៉ាប់រងរបស់កីឡាករទាំងអស់។
ដំណាក់កាលទី១ ទឹកប្រាក់ចំនួន ៤៤៨ លានដុល្លារនៃប្រាក់សររុបនឹងត្រូវចំណាយលើប្រទេសទាំង ៣២ ដែលគិតចាប់ពីវគ្គជម្រុះតាមពូល រហូតដល់វគ្គផ្តាច់ព្រ័ត្រ។
ក្នុងវគ្គជម្រុះតាមពូលចាប់ពីពូល A ដល់ H ក្រុមនិមួយៗនឹងទទួលបានប្រាក់ពី FIFA ១.៥លានដុល្លារ ហើយសរុបទាំង៣២ក្រុមត្រូវចំណាយអស់ ៤៨លានដុល្លារ។
ក្រុមណាដែលអាចឈានដល់វគ្គ ១៦ចុងក្រោយនឹងទទួលបានក្នុងមួយក្រុម ៨លានដុល្លារទៀត សរុប ១២៨លានដុល្លារ។ ឈានដល់វគ្គ ៨ក្រុមផ្តាច់ព្រ័ត្រ ក្នុងមួយក្រុមទទួលបាន ១២លានដុល្លារ សរុប៩៦លានដុល្លារ ហើយក្រុមណាឈានដល់វគ្គពាក់កណ្តាលផ្តាច់ព្រ័ត្រនឹងទទួលបាន ១៦លានដុល្លារទៀត សរុប ៦៤លានដុល្លារ។
លើសពីនេះទៀតនោះ ប្រទេសណាដែលអាចឈ្នះតំណែងជើងឯក World Cup ឆ្នាំ២០១៨ នេះ នឹងទទួលបានប្រាក់រង្វាន់បន្ថែមចំនួន ៣៨លានដុល្លារ ខណៈក្រុមរងជើងឯកទទួលបាន ២៨លានដុល្លារ ក្រុមលេខ៣ បាន ២៤លានដុល្លារ និងចំណាត់ថ្នាក់លេខ ៤ ទទួលបាន ២២លានដុល្លារ។
ដំណាក់កាលទី២ FIFA ត្រូវចំណាយថ្លៃសេវាធានារ៉ាប់រងរបស់កីឡាករទាំងអស់ដែលមានឈ្មោះក្នុងព្រឹត្តិការណ៍ក្នុងចំនួនទឹកប្រាក់ ១៣៤លានុល្លារ។
ដំណាក់កាលទី៣ ត្រូវចំណាយទៅឲ្យក្លិបដែលកីឡាករទាំងអស់នោះប្រកបអាជីពចំនួនទឹកប្រាក់ ២០៩លានដុល្លារ។ សរុបការចំណាយទាំង ៣ដំណាក់កាលនេះ សហព័ន្ធកីឡាបាល់ទាត់អន្តរជាតិត្រូវចំណាយ ៧៩១លានដុល្លារ ដែលកើនលើសឆ្នាំ ២០១៤ នៅប្រេស៊ីល ៤០ភាគរយ ពោលគឺ ២៣៣លានដុល្លារ៕
Tag:
បាល់ទាត់
FIFA World Cup
រុស្ស៊ី
World Cup Prize Money
© រក្សាសិទ្ធិដោយ thmeythmey.com