កីឡាអន្តរជាតិ
អន្តរជាតិ
Man Utd បន្ទោសលោក ត្រាំ ដែលធ្វើឲ្យពួកគេខាតជាង៤០លានដុល្លារនៅឆមាសដំបូង
× ក្លិប Manchester United របស់អង់គ្លេស ក៏បានរងគ្រោះផ្នែកហិរញ្ញវត្ថុដោយសារកំណែទម្រង់ពន្ធថ្មីរបស់លោកប្រធានាធិបតីអាមេរិក ដូណាល់ ត្រាំ ផងដែរ។ វាជាការខាតបង់ដ៏ធំបំផុតនារយៈពេលជិត៨ឆ្នាំចុងក្រោយ។ នេះបើតាមការផ្សាយរបស់ Daily Mail។
តួលេខហិរញ្ញវត្ថុចុងក្រោយបំផុតរបស់ក្លិបដែលមានមូលដ្ឋានក្នុងក្រុង Manchester ដែលត្រូវបានប្រកាសកាលពីថ្ងៃព្រហស្បតិ៍សប្តាហ៍មុនបង្ហាញថា ពួកគេបានបាត់បង់ប្រាក់ចំនួន ៤៨.៨លានផោន (ជិត៦៨លានដុល្លារ) ដែលនាំឲ្យខាតបង់ប្រាក់សរុប ២៩លានផោន (៤១លានដុល្លារ) ក្នុងរយៈពេល ៦ខែ គិតត្រឹមថ្ងៃទី ៣១ ខែធ្នូ ឆ្នាំ២០១៧។
នេះជាលទ្ធផលដ៏អាក្រក់បំផុតសម្រាប់ក្លិបរហស្សនាមបិសាចក្រហមចាប់តាំងពីការខាតបង់ប្រចាំត្រីមាសទី ៣ កាលពីឆ្នាំ ២០១០ ប្រមាណ ៦៥.៨ លានផោន (ជាង៩១លានដុល្លារ) ខណះក្នុងរយៈពេលដូចគ្នានេះកាលពីឆ្នាំ២០១៦ ពួកគេរកប្រាក់ចំណេញបាន ១៨.៧លានផោន (ជាង ២៦លានដុល្លារ)។
ដោយសារការខាតបង់នេះ Manchester United បានបញ្ចេញការមិនពេញចិត្តចំពោះគោលនយោបាយកាត់បន្ថយពន្ធរបស់ Trump ដែលបានទម្លាក់អត្រាពន្ធលើសាជីវកម្មរបស់អាមេរិកពីកម្រិតខ្ពស់បំផុតទៅទាបបំផុតមួយ ស្របពេលដែលប្រធានាធិបតីអាមេរិកថ្មីរូបនេះព្យាយាមធ្វើឲ្យសេដ្ឋកិច្ចប្រទេសនេះមានការផ្លាស់ប្តូរ។
តែយ៉ាងណា ប្រធានហិរញ្ញវត្ថុរបស់ក្លិបលោក Cliff Baty បានបញ្ជាក់ថា បើទោះបីជាខាតបង់ប្រាក់មួយចំនួននេះក៏ដោយ ប៉ុន្តែវាក៏មិនមានផលប៉ះពាល់ខ្លាំងអ្វីដែរសម្រាប់ក្លិបទាំងមូល៕
Tag:
បាល់ទាត់
ដូណាល់ត្រាំ
Manchester United
© រក្សាសិទ្ធិដោយ thmeythmey.com