កម្ពុជានឹងស្នើហ្វីលីពីនដាក់គុនល្បុក្កតោនិងអុកចត្រង្គក្នុងការប្រកួតកីឡាស៊ីហ្គេមឆ្នាំ២០១៩

កីឡាជាតិ

ជាតិ

កម្ពុជានឹងស្នើហ្វីលីពីនដាក់គុនល្បុក្កតោនិងអុកចត្រង្គក្នុងការប្រកួតកីឡាស៊ីហ្គេមឆ្នាំ២០១៩

10, Feb 2018 , 4:41 pm

រូបភាព

ដោយ:

គណៈកម្មាធិការជាតិអូឡាំពិកកម្ពុជា(NOCC)នឹងស្នើសុំម្ចាស់ផ្ទះហ្វីលីពីន ដើម្បីដាក់បញ្ចូលកីឡាអត្តសញ្ញាណជាតិរួមមាន គុនល្បុក្កតោ និងអុកចត្រង្គក្នុងការប្រកួតកីឡាស៊ីហ្គេមលើកទី៣០ឆ្នាំ២០១៩។ នៅចុងឆ្នាំ២០១៨ កម្ពុជានឹងបញ្ជូនគ្រូបង្វឹកនៃប្រភេទកីឡាទាំងពីរនេះ ទៅបណ្តុះបណ្តាលក៏ដូចជាចែករំលែកបទពិសោធពាក់ព័ន្ធនឹងកីឡានេះតាមបណ្តាប្រទេសនៅតំបន់អាស៊ាន។

ដើម្បីផ្សព្វផ្សាយគុនល្បុក្កតោនិងអុកចត្រង្គដែលជាកីឡាអត្តសញ្ញាណជាតិឲ្យគេស្គាល់កាន់តែច្រើន កម្ពុជានឹងស្នើសុំម្ចាស់ផ្ទះហ្វីលីពីនដាក់បញ្ចូលកីឡាទាំងនេះក្នុងការប្រកួតកីឡាស៊ីហ្គេមលើកទី៣០ឆ្នាំ២០១៩។ ប៉ុន្តែការស្នើនេះ ក្នុងក្របខណ្ឌប្រកួតក្រៅផ្លូវការ ដោយមិនរាប់បញ្ចូលចំនួនមេដាយក្នុងតារាងផ្លូវការនោះទេ។

«យើងបាននិងកំពុងរៀបចំផែនការ ដើម្បីស្នើសុំហ្វីលីពីនដាក់កីឡាគុនល្បុក្កតោនិងអុកចត្រង្គក្នុងកីឡាស៊ីហ្គេមឆ្នាំ២០១៩ ពេលប្រទេសនេះធ្វើម្ចាស់ផ្ទះ។ យើងចង់ដាក់កីឡាទាំងនេះ ព្រោះវាជាកីឡាសក្តានុពល ដែលយើងនឹងដាក់ក្នុងការប្រកួតកីឡាហ្គេមលើកទី៣២នៅកម្ពុជា។ ការដាក់នេះ គឺដើម្បីឲ្យកីឡាករនិងមន្ត្រីបច្ចេកទេសទទួលបានបទពិសោធ ក៏ដូចជាផ្សព្វផ្សាយកីឡានេះឲ្យគេបានស្គាល់កាន់តែច្រើននៅលើឆាកអន្តរជាតិ»។ នេះជាការបញ្ជាក់របស់លោក វ៉ាត់ ចំរើន អគ្គលេខាធិការនៃ NOCC។

លោក វ៉ាត់ ចំរើន ពេលផ្តល់បទសម្ភាសដល់អ្នកសារព័ត៌មាននៅទីស្នាក់ការ NOCC

នៅចុងឆ្នាំ២០១៨ ខាងមុខ កម្ពុជានឹងបញ្ជូនគ្រូបង្វឹក និងអ្នកជំនាញផ្នែកកីឡាទាំងពីរខាងលើទៅបណ្តុះបណ្តាលបច្ចេកទេស ក៏ដូចជាចែករំលែកបទពិសោធពីរបៀបលេង ដល់បណ្តាប្រទេសក្នុងតំបន់អាស៊ានដែលលេងកីឡានេះ។ បច្ចុប្បន្នប្រទេសដែលមានកីឡាគុនល្បុក្កតោរួមមានកម្ពុជា, មីយ៉ាន់ម៉ា, ឡាវ និងវៀតណាម ខណៈអុកចត្រង្គមានកម្ពុជា, ថៃ, ឡាវ និងមីយ៉ាន់ម៉ា។ តែប្រទេសទាំងនេះមានទង្រង់ និងបែបបទនៃការលេងខុសៗគ្នា។

ទោះបីយ៉ាងនេះក្តី លោក វ៉ាត់ ចំរើន ជឿជាក់ថា៖«ចំពោះកីឡាអុកចត្រង្គប្រទេសមួយចំនួនមានការលេងខុសពីកម្ពុជា តែវាខុសគ្នាតិចតួចប៉ុណ្ណោះ យើងអាចកែប្រែបាន ព្រោះយើងកំពុងបន្ស៊ីការលេងនៃប្រទេសនីមួយៗឲ្យមានលក្ខណៈដូចគ្នា។ ខ្ញុំរំពឹងថា កីឡាអត្តសញ្ញាណជាតិយើងនឹងមានវត្តមានក្នុងស៊ីហ្គេមឆ្នាំ២០១៩»។

កីឡាគុនល្បុក្កតោនិងអុកចត្រង្គត្រូវបានថ្នាក់ដឹកនាំកីឡាកម្ពុជាចាត់ទុកជាកីឡាស្ថិតក្នុងគោលដៅយុទ្ធសាស្ត្រអាទិភាពក្នុងកីឡាស៊ីហ្គេមលើកទី៣២ ដែលកម្ពុជាត្រូវយកចិត្តទុកដាក់។ ក្រៅពីកីឡាទាំងនេះ ក៏មានកីឡាជាច្រើនទៀតផងដែររួមមានអត្តពលកម្ម ហែលទឹក បាល់ទះ, បាល់ទាត់ និងបាលបោះ។ កីឡាទាំងនេះជាកីឡាយុទ្ធសាស្ត្រគោលដៅដែលកម្ពុជាត្រូវយកចិត្តទុកដាក់និងជួយជ្រោមជ្រែង ព្រោះវាជាកីឡាអត្តសញ្ញាណជាតិ និងប្រជាប្រិយ៕