«Cambodia Our Home» ធ្វើឲ្យអ្នកនិពន្ធ និងអ្នកចម្រៀង មានមោទកភាព និងក្ដុកក្ដួល

ជាតិ

សិល្បះ

«Cambodia Our Home» ធ្វើឲ្យអ្នកនិពន្ធ និងអ្នកចម្រៀង មានមោទកភាព និងក្ដុកក្ដួល

11, Feb 2018 , 10:43 am

រូបភាព

ដោយ: ញឹក ស្រីល័ក្ខ (Nhek Sreyleak)

បទចម្រៀង ដែលមានរយៈពេលជាង ៥នាទី មានចំណងជើងថា «Cambodia Our Home» បានធ្វើឲ្យអ្នកនិពន្ធ និងតារាចម្រៀង មានមោទកភាព និងអារម្មណ៍ក្ដុកក្ដួល។ បទចម្រៀងជាភាសាអង់គ្លេស លាយភាសាខ្មែរ «យើងខ្មែរ» នេះ ជាបទចម្រៀង ដែលបង្ហាញពីមនោសញ្ចេតនា និងអារម្មណ៍នឹកផ្ទះ នឹកទីកន្លែងកំណើត។

ខុសពីបទចម្រៀងមនោសញ្ចេតនា និងបទចម្រៀងស្នេហាផ្សេងៗ «Cambodia Our Home» ជាបទចម្រៀងមួយ ដែលច្រៀងរៀបរាប់ពីអារម្មណ៍ និងមនោសញ្ចេតនានឹកដល់ស្រុកកំណើត ទោះបុគ្គលម្នាក់ៗទៅដល់ទីណាក៏ដោយ។ «Cambodia Our Home» ជាស្នាដៃនិពន្ធទំនុកច្រៀងរបស់លោក បណ្ឌិត សាន វឌ្ឍនា ប្រធានក្រុមការងារចលនា GoGo Cambodia ដែលបទភ្លេងនិពន្ធដោយលោក សួន ពិសិដ្ឋ និងបកស្រាយដោយកញ្ញា វី ឌីណែត។

ក្នុងឃ្លីបវីដេអូដែលមានរយៈពេលជាង ៥នាទី «Cambodia Our Home» បានបង្ហាញទាំងអត្ថន័យ និងរូបភាពរបស់ប្រជាជនខ្មែរទាំងក្មេងចាស់ប្រុសស្រី តាមរយៈស្នាមញញឹម ដែលមាននៅគ្រប់ទីកន្លែង ទាំងក្នុងនិងក្រៅប្រទេស។ បទភ្លេងព្យាណូ លាយឡំជាមួយឧបករណ៍បុរាណខ្មែរ«ប៉ីពក» បានទាញអារម្មណ៍អ្នកស្ដាប់ និងទស្សនាឲ្យដក់ជាប់ក្នុងចិត្ត។

លោក សួន ពិសិដ្ឋ អ្នកនិពន្ធបទភ្លេង «Cambodia Our Home» បានប្រាប់សារព័ត៌មានថ្មីៗ តាមទូរសព្ទថា បទចម្រៀងនេះ គឺនិយាយពីអារម្មណ៍នឹកស្រុកខ្មែរ ដែលពលរដ្ឋខ្មែរទៅរស់នៅក្រៅ ឬជាប់បេសកកម្មក្រៅប្រទេសផ្សេងៗ។ លោក សួន ពិសិដ្ឋ បន្តថា បទចម្រៀងមួយបទនេះ មានផលលំបាកច្រើនក្នុងការតែងនិពន្ធបទភ្លេង ដោយសារប្រើតែឧបករណ៍ព្យាណូ និងឧបករណ៍បុរាណខ្មែរ «ប៉ីពក» ប៉ុណ្ណោះ។ អ្នកនិពន្ធបទភ្លេងរូបនេះ រៀបរាប់យ៉ាងដូច្នេះ៖ «សម្រាប់ខ្ញុំផ្ទាល់ ពេលនិពន្ធបទភ្លេងនេះ ខ្ញុំមានអារម្មណ៍ក្ដុកក្ដួល មានភាពកក់ក្ដៅ។ ព្រោះខ្ញុំនិពន្ធប្រើទាំងអារម្មណ៍និងវិញ្ញាណដាក់ក្នុងបទនេះ»។

សម្រាប់តារាចម្រៀងវិញ កញ្ញា វី ឌីណែត ដែលជាអ្នកបកស្រាយបទចម្រៀង «Cambodia Our Home» នេះ បានប្រាប់ឲ្យដឹងថា បទនេះ មានភាពខុសប្លែកពីបទចម្រៀងដែលនាងធ្លាប់ច្រៀងកន្លងមក ដោយខុសប្លែកទាំងអត្ថន័យ និងភ្លេង ពិសេសបទនេះ ធ្វើឲ្យនាងមានអារម្មណ៍ក្ដុកក្ដួល។ កញ្ញា វី ឌីណែត បានបញ្ជាក់យ៉ាងដូច្នេះ៖ «ពេលខ្ញុំច្រៀងបទនេះ ខ្ញុំមានមោទកភាព និងក្ដុកក្ដួលណាស់។ ព្រោះអត្ថន័យ និងបទភ្លេង គឺចាក់ដោត»។ តារាចម្រៀងស្រីល្បីល្បាញរូបនេះ បន្ថែមថា ការច្រៀងបទនេះ មិនមានផលពិបាកនោះទេ ប៉ុន្តែអ្វីពិបាក គឺការដាក់អារម្មណ៍ ដោយធ្វើយ៉ាងណាឲ្យមនុស្សទូទៅមានអារម្មណ៍នឹកផ្ទះដូចគ្នា។

ចំណែកឯអ្នកនិពន្ធទំនុកច្រៀង លោកបណ្ឌិត សាន វឌ្ឍនា បានពន្យល់យ៉ាងដូច្នេះថា៖ «ការតែងនិពន្ធទំនុកច្រៀងបទនេះ គឺជាអារម្មណ៍កើតចេញពីការស្រឡាញ់កម្ពុជា ដោយព្យាយាមបង្ហាញពីកម្ពុជា។ ពិសេសអារម្មណ៍ពលរដ្ឋខ្មែរក្រៅ និងក្នុងប្រទេស ដែលមានអារម្មណ៍ស្រឡាញ់ប្រទេសដូចគ្នា ទោះទៅដល់កន្លែងណាក៏ដោយ»។ លោកបណ្ឌិត សាន វឌ្ឍនា បន្តថា ពលរដ្ឋខ្មែរគ្រប់រូប ឲ្យតែនឹកស្រុកខ្មែរ គឺនឹកដល់ផ្ទះខ្លួនឯងមុនគេ។ ប្រធានក្រុមការងារចលនា GoGoCambodia រូបនេះ ពន្យល់ថា៖ «បទនេះ មានខ្លឹមសារពីរ គឺទី១ ទោះយើងទៅដល់ណាក៏ដោយ ចាំថាកម្ពុជានៅតែជាផ្ទះរបស់យើង។ ទី២ ទោះយើងក្លាយទៅជាអ្វីក៏ដោយកម្ពុជា នៅតែជាកន្លែងសម្រាប់យើង»។

បើតាមលោកបណ្ឌិត សាន វឌ្ឍនា បទចម្រៀងនេះ នៅពេលតែងជាមួយ MV គឺព្យាយាមបង្ហាញរំលឹកពីការសម្លឹងមើលទៅថ្ងៃអនាគត។ លោកបណ្ឌិត សាន វឌ្ឍនា លើកឡើងថា៖ «សម្រាប់ខ្ញុំពេលដែលតែងបទនេះហើយ និយាយឲ្យត្រង់ទៅ ខ្ញុំរំភើប។ ហើយតាមរយៈបទនេះ យើងនឹងស្រឡាញ់កម្ពុជាខ្លាំងជាងមុន ព្រោះយើងជាខ្មែរ ខ្មែរតែមួយ។

ទាំងលោក សួន ពិសិដ្ឋ និងលោកបណ្ឌិត សាន វឌ្ឍនា សុទ្ធតែសង្ឃឹមថា ពលរដ្ឋខ្មែរ នឹងទទួលបានអត្ថន័យ និងខ្លឹមសារ ដោយយល់ពីទឹកចិត្ត និងបេះដូងក្នុងបទនោះ។ លោកបណ្ឌិត សាន វឌ្ឍនា សង្ឃឹមថា បទនេះ ទៅថ្ងៃអនាគត នឹងមានបកប្រែជាច្រើនភាសាផងដែរ៕