ជាតិ
បទយកការណ៍ / បទសម្ភាសន៍
កញ្ញា ឆែ ដានី ជម្នះរៀនឧបករណ៍តន្ត្រី«ខ្សែមួយ» ព្រោះយល់ថាជាអត្តសញ្ញាណរបស់ខ្មែរ
× កញ្ញា ឆែ ដានី ជានារីម្នាក់ដែលដាក់ចិត្តរៀនលេងឧបករណ៍តន្ត្រីខ្សែមួយ(ខ្សែដៀវ ឬសាដៀវ) ព្រោះយល់ថាឧបករណ៍នេះបង្ហាញពីអត្តសញ្ញាណ និងដួងព្រលឹងរបស់ខ្មែរ។ កញ្ញាបានប្រថ្នាបើកថ្នាក់បង្រៀនបន្តទៀត បើសិនជាមានឱកាស។
ដានី គឺជានិស្សិតអក្សរសាស្ត្រខ្មែរឆ្នាំទី៤ម្នាក់ ដែលចេះលេងឧបករណ៍តន្ត្រីខ្សែមួយ ដែលគេនិយមហៅថាខ្សែដៀវ ឬសាដៀវ។ បំណងចង់ចេះលេងឧបករណ៍ដែលមានទម្រង់ស្រដៀងនឹងទ្រអ៊ូ បានកើតមានក្នុងអារម្មណ៍របស់យុវតីដានី នៅក្នុងវ័យជំទង់ ពោលគឺនៅពេលដែលដានីបានឃើញការសំដែងឧបករណ៍ខ្សែមួយនៅក្នុងភាយន្តខ្មែរមួយ។ បន្ទាប់មក ដានីបានស្វែងរកសំឡេងខ្សែមួួយនៅតាមតូបបញ្ចូលបទភ្លេងក្នុងទូរសព្ទ ប៉ុន្តែគ្មានអ្នកណាស្គាល់ឧបករណ៍តន្ត្រីខ្សែមួយ ឬសំឡេងរបស់វាឡើយ។
និយាយបណ្ដើរសើចបណ្ដើរ ដានីបញ្ជាក់ថា៖«ស្ដាប់ឮដំបូង ខ្ញុំមានអារម្មណ៍ថា ភ្លេងនេះត្រូវនឹងចំណូលចិត្តរបស់ខ្ញុំណាស់ ខ្ញុំក៏ទៅផ្សាររកកន្លែងបញ្ចូលបទភ្លេងឱ្យគេដាក់ឱ្យ តែមិនមានអ្នកណាធ្លាប់ស្គាល់ភ្លេងនេះទេ ខ្ញុំមិនដឹងថាធ្វើយ៉ាងណាបាន ក៏ចេះតែចាំរហូតឡើងមករៀននៅភ្នំពេញ ទើបមានអ្នកស្គាល់»។
ក្រោយពីបានមករៀននៅភ្នំពេញបានមួយរយៈ នារីមកពីខេត្តពោធិ៍សាត់រូបនេះ ក៏មានឱកាសរៀនឧបករណ៍ខ្សែមួយដូចបំណង។ នាងថាកាលរៀនដំបូងលំបាកខ្លាំងណាស់ តែដោយហេតុស្រលាញ់ខ្លាំង នាងក៏ព្យាយាមរៀនរហូតបានកន្លះឆ្នាំ ទើបអាចចាប់បទបានខ្លះៗ។ បន្ទាប់ពីរៀនបានមួយឆ្នាំ ដានី រៀនចេះបានជាង១០បទ តែបទដែលស្ទាត់ជំនាញមាន៧បទ។ ដានីបញ្ជាក់៖ “កាលរៀនដំបូងពិបាកខ្លាំងណាស់ ដូចអូសឫស្សីបញ្ច្រាសចុងអ៊ីចឹង។ ក្នុងចំណោមសិស្សរៀនទាំងអស់ ខ្ញុំស្រីតែឯង ហើយរៀនខ្សោយជាងគេទៀត តែដោយស្រលាញ់ខ្លាំងចេះតែខំរហូតដល់សព្វថ្ងៃ»។
ការរៀនឧបករណ៍ខ្សែមួយ របស់នារីកូនច្បងក្នុងគ្រួសាររូបនេះ មិនមែនដើម្បីគ្រាន់តែចង់លេងឱ្យពីរោះនោះទេ តែយុវតីអាយុ២៣ឆ្នាំ បានឱហាតហាត់រៀនលេងឧបករណ៍មួយនេះយ៉ាងខ្លាំង ពីព្រោះដានីយល់ឃើញថាឧបករណ៍មួយនេះតំណាងឲ្យអត្ដសញ្ញាណ និងដួងព្រលឹងរបស់ខ្មែរ។ ដានីបញ្ជាក់យ៉ាងដូច្នេះ៖«ក្នុងនាមខ្ញុំជាកូនខ្មែរម្នាក់ ខ្ញុំត្រូវរៀនឧបករណ៍មួយនេះ ដើម្បីថែរក្សាមរតក ដែលជាកេរដំណែលរបស់ដូនតា និងត្រូវផ្សព្វផ្សាយបន្ត ដើម្បីឱ្យខ្មែរដទៃទៀត បានដឹងថាអ្វីជារបស់ខ្មែរខ្លះ»។
តាំងពីដានីចេះលេងឧបករណ៍ភ្លេងខ្សែ១នេះ នាងបានចូលរួមផ្សព្វផ្សាយ ទាំងតាមប្រព័ន្ធផ្សព្វផ្សាយសង្គមផ្សេងៗ និងបានទៅសម្ដែងតាមគ្រឹះស្ថានសិក្សានៅបណ្ដាខេត្តឆ្ងាយៗជាច្រើនទៀត។ និស្សិតឆ្នាំទី៤រូបនេះ មានក្ដីប្រាថ្នា ចង់បើកថ្នាក់បង្រៀនឧបករណ៍ខ្សែមួយ ដើម្បីបានចែករម្លែកចំណេះដឹងនេះ ទៅឱ្យយុវជន ក៏ដូចជាក្មេងជំនាន់ក្រោយបានចេះ ព្រមទាំងបានជួយផ្សព្វផ្សាយនិងថែរក្សាបន្ត។
អ្វីដែលកញ្ញា ឆែ ដានី ចង់ចែករម្លែកទៅកាន់យុវជនគឺ សូមឱ្យកូនខ្មែរស្គាល់ខ្លួនឯងឱ្យច្បាស់ ដឹងថាសម្បត្តិវប្បធម៌កេរមរតកខ្មែរមានអ្វីខ្លះ ឧបករណ៍ភ្លេងអ្វីខ្លះជារបស់ខ្លួន។ ដានី បញ្ជាក់៖«ខ្ញុំនៅតែចាំប្រសាសន៍របស់លោកតា ឆេង ផុន ដែលថា បើយើងឃ្វាលគោយើងត្រូវដឹងថាគោយើងមានប៉ុន្មាន ហើយពណ៌អ្វីខ្លះ បើមិនដូច្នោះទេ ច្បាស់ជាច្រឡំមិនដឹងថា គោណាជារបស់យើង គោណាជារបស់គេទេ»។
Tag:
ឆែ ដានី
ឧបករណ៍ខ្សែ១
សាដៀវ
ខ្សែដៀវ
© រក្សាសិទ្ធិដោយ thmeythmey.com