លោក ហ៊ុន ម៉ានី ដឹកនាំរៀបចំពិធីក្រុងពលីព្រឹត្តិការណ៍អង្គរសង្ក្រាន្តឆ្នាំទី៦

ជាតិ

លោក ហ៊ុន ម៉ានី ដឹកនាំរៀបចំពិធីក្រុងពលីព្រឹត្តិការណ៍អង្គរសង្ក្រាន្តឆ្នាំទី៦

11, Feb 2018 , 2:53 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ សហភាពសហព័ន្ធយុវជនកម្ពុជា (សសយក) នៅព្រឹកថ្ងៃទី១១ ខែកុម្ភៈ បានធ្វើពិធីក្រុងពលី ដើម្បីរៀបចំដំណើរការកម្មវិធីនានាក្នុងព្រឹត្តិការណ៍អង្គរសង្ក្រាន្តឆ្នាំ២០១៨។ ពិធីក្រុងពលីនេះ រៀបចំឡើងនៅមុខព្រះលានជល់ដំរី។ នេះជាឆ្នាំទី៦ ដែលសហភាពសហព័ន្ធយុវជនកម្ពុជា បានរៀបចំឱ្យមានព្រឹត្តិការណ៍អង្គរសង្ក្រាន្តនៅលើទឹកដីអង្គរ នាខេត្តសៀមរាប។

សហភាពសហព័ន្ធយុវជនកម្ពុជា បានរៀបចំពិធីក្រុងពលីតាមទម្លាប់ មុនព្រឹត្តិការណ៍អង្គរសង្ក្រាន្តឆ្នាំ២០១៨។ ក្រោយពិធីក្រុងពលីនេះ ក្រុមការងារព្រឹត្តិការណ៍អង្គរសង្ក្រាន្ត អាចចាប់ផ្តើមរៀបចំរាល់សកម្មភាពផ្សេងៗ ពិសេសក្រុមយុវជន អាចហ្វឹកហាត់សិល្បៈ ហាត់សមលេងល្បែងប្រជាប្រិយ ដើម្បីត្រៀមខ្លួនចូលរួមក្នុងព្រឹត្តិការណ៍អង្គរសង្ក្រាន្តឆ្នាំទី៦ នាពេលខាងមុខឱ្យបានជោគជ័យ។

ពិធីក្រុងពលី ជាពិធីបែបសាសនាមួយ ដែលគេតែងធ្វើឡើងមុនការរៀបចំសាងសង់អ្វីមួយ ក្នុងបំណងដើម្បីជោគជ័យ និងទទួលផ្លែផ្កាតាមការចង់បាន។ ពិធីនេះតែងតែរៀបចំជាប្រចាំ នៅមុនពេលដំណើរការព្រឹត្តិការណ៍អង្គរសង្ក្រាន្ត ដោយពិធីនេះធ្វើឡើងតាមគន្លងប្រពៃណីទំនៀមទម្លាប់ ជំនឿ សាសនា របស់ខ្មែរក្នុងបុព្វហេតុបួងសួងសុំសេចក្តីសុខសម្រាប់ព្រឹត្តិការណ៍ទាំងមូល។

គួរបញ្ជាក់ថា ព្រឹត្តិការណ៍អង្គរសង្ក្រាន្ត ត្រូវបានរៀបចំឡើងតាំងពីឆ្នាំ២០១៣មក អំឡុងពិធីបុណ្យចូលឆ្នាំថ្មីប្រពៃណីជាតិ។ ព្រឹត្តិការណ៍នេះ ក្រៅពីដើម្បីអបអរពិធីបុណ្យចូលឆ្នាំប្រពៃណីជាតិ វាក៏ជាឱកាសដែលយុវជន និងប្រជាពលរដ្ឋកម្ពុជាប្រុសស្រី ជួបជុំគ្នាក្នុងនាមជាមហាគ្រួសារខ្មែរផងដែរ៕