កីឡាជាតិ
ជាតិ
កិច្ចប្រជុំជាស៊េរីរបស់ FIFA នៅកម្ពុជា រកឃើញគន្លឹះជាច្រើនក្នុងការអភិវឌ្ឍន៍បាល់ទាត់ជាសកល កិច្ចប្រជុំ FIFA Executive Football Summit លើកទី៨នៅភ្នំពេញ។ រូបថត FFC
× ភ្នំពេញ បានក្លាយម្ចាស់ផ្ទះសម្រាប់កិច្ចប្រជុំប្រតិបត្តិកីឡាបាល់ទាត់លើកទី៨របស់សហព័ន្ធកីឡាបាល់ទាត់អន្តរជាតិ (FIFA Executive Football Summit) ដែលរៀបចំជាស៊េរីសម្រាប់ឆ្នាំ២០១៧-២០១៨ ។ លោក Gianni Infantino ប្រធាន FIFA បានថ្លែងប្រាប់អ្នកសារព័ត៌មានកម្ពុជា បានអះអាងពីលទ្ធផលជាផ្លែផ្កាក្រោយកិច្ចប្រជុំពេញមួយថ្ងៃ កាលពីថ្ងៃសុក្រកន្លងមក។
ថ្នាក់ដឹកនាំនៃបណ្តារដ្ឋចំនួន១៤ដែលជាសមាជិករបស់សហព័ន្ធកីឡាបាល់ទាត់អន្តរជាតិ (FIFA) បានជួបប្រជុំគ្នាក្នុងក្របខណ្ឌ FIFA Executive Football Summit លើកទី៨នៅរាជធានីភ្នំពេញ កាលពីថ្ងៃទី៩ ខែកុម្ភៈ ឆ្នាំ២០១៨ ។ កិច្ចប្រជុំថ្នាក់ដឹកនាំប្រតិបត្តិបាល់ទាត់នេះ ជាវិធីសាស្ត្រថ្មីរបស់ FIFA ដើម្បីស្វែងយល់ និងរកដំណោះស្រាយនានាទាក់ទងនឹងបញ្ហាបាល់ទាត់ ក្រោយលោក Gianni Infantino បានកាន់តំណែងជាប្រធាន ចាប់តាំងពីថ្ងៃទី២៦ ខែកុម្ភៈ ឆ្នាំ២០១៦ ។
ថ្លែងទៅកាន់អ្នកសារព័ត៌មានក្រោយកិច្ចប្រជុំពេញមួយថ្ងៃនៅសណ្ឋាគារសូហ្វីតែលភ្នំពេញ ប្រមុខ FIFA បានបញ្ជាក់ឲ្យដឹងថា ថ្នាក់ដឹកនាំបាល់ទាត់ដែលបានចូលរួមនាំគ្នាពិភាក្សាពីអនាគតនៃការរៀបចំការប្រកួតបាល់ទាត់យុវជនកម្រិត FIFA តាមរយៈការបង្កើនចំនួនក្រុម និងការលើកទឹកចិត្តឲ្យមានការសហការគ្នាធ្វើជាម្ចាស់ផ្ទះ។
គម្រោងនៃការបង្កើតក្របខណ្ឌ «Women World League» ក៏ជារបៀបវារៈមួយដែលសំខាន់ផងដែរ ដោយសហព័ន្ធកីឡាបាល់ទាត់អន្តរជាតិ ចង់ឲ្យពង្រីកការចូលរួមឲ្យកាន់តែទូលំទូលាយពីសំណាក់កីឡាការិនីក្នុងវិស័យបាល់ទាត់។
ជាមួយគ្នានេះ លោក Infantino បានលើកឡើងពីអត្ថប្រយោជន៍នៃកម្មវិធីអភិវឌ្ឍន៍រយៈពេល៤ឆ្នាំ «Forward Program» ដែលមានទឹកប្រាក់១.៤ប៊ីលានដុល្លារអាមេរិក សម្រាប់សមាជិកទាំង២១១របស់ FIFA។ ក្នុងនោះ រាល់សមាជិក ដែលមានកម្ពុជាផងដែរនោះ ទទួលបាន ១លាន២សែន៥ម៉ឺនដុល្លារអាមេរិកក្នុង១ឆ្នាំ។
ក្រៅពីការផ្លាស់ប្តូរបទពិសោធន៍ និងរៀនសូត្រពីគ្នាទៅវិញទៅមក ថ្នាក់ដឹកនាំសហព័ន្ធកីឡាបាល់ទាត់នៃប្រជាជាតិដែលបានចូលរួម ក៏បានពីពិភាក្សាគ្នាលើគោលការណ៍នៃការផ្ទេរកីឡាករ រួមទាំងការរៀបចំកាលវិភាគសម្រាប់ក្រុមជម្រើសជាតិផងដែរ។
ការប្រជុំជាស៊េរី FIFA Executive Football Summit ឆ្នាំ២០១៧-២០១៨ នេះ ចាប់ផ្តើមដំបូងនៅក្រុងបាគូ ប្រទេសអាសែប៊ៃហ្សង់ ហើយបន្តទៅក្រុងអ៊ីស្តង់ប៊ុល (តួកគី) ក្រុង Noumea (នូវែល កាលេដូនី) ក្រុងហុងកុង ក្រុងអាំស្ទែរដាម (ហូឡង់) ក្រុង Montego Bay (ហ្សាម៉ៃអ៊ីក) និងក្រុង Muscat (អូម៉ង់)។
៥ថ្ងៃក្រោយប្រជុំនៅអូម៉ង់ លោក Infantino បន្តមកដឹកនាំកិច្ចប្រជុំនៅកម្ពុជា ដែលជាជំនួបលើកទី៨ បន្ទាប់មកទៀត កិច្ចប្រជុំជាស៊េរីនេះ បន្តរៀបចំនៅប្រទេសម៉ូរីតានី ក្រុង Lagos (នីហ្សេរីយ៉ា) ប្រទេសតង់ហ្សានី មុននឹងប្រជុំចុងក្រោយនៅក្នុងលីម៉ា ប្រទេសប៉េរូ នៅខែមីនា។
ក្នុងចំណោមកិច្ចប្រជុំ FIFA Executive Football Summit ទាំង១២លើក រដ្ឋជាសមាជិកចូលរួមពីជាង១០ ដល់២០។ កិច្ចប្រជុំនៅភ្នំពេញ មានការចូលរួមពីថ្នាក់ដឹកនាំមកពី ប៊ូតង់ អូស្ត្រាលី ថៃ, ប៊ុតស្វាណា, ទីម័រខាងកើត, ហុងគ្រី, ស៊ីប, កម្ពុជា, ជប៉ុន, កូរ៉េខាងជើង, ស៊ូដង់, ហ្គំប៊ី ហ្វីលីពីន និង ឡាវ។
កម្ពុជា ជាប្រទេសទីពីរនៅតំបន់អាស៊ានដែលត្រូវបានជ្រើសរើសធ្វើជាម្ចាស់ផ្ទះនៃកិច្ចប្រជុំជាស៊េរីនេះ បន្ទាប់ពីសិង្ហបុរី។ កាលពីឆ្នាំ២០១៦-២០១៧ កិច្ចប្រជុំបានរៀបចំចំនួន១១លើក ដោយចាប់ផ្តើមពីក្រុងប៉ារីស ប្រទេសបារាំង ហើយធ្វើឡើងជាបន្តបន្ទាប់នៅសិង្ហបុរី (២លើក) Miami សហរដ្ឋអាមេរិក (២លើក) ដូហា ប្រទេសកាតា (២លើក) Addis Ababa ប្រទេសអេក្យូពី (២លើក) និងក្រុងឡុងដ៍ ប្រទេសអង់គ្លេស (២លើក)។
លោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា (FFC) បានវាយតម្លៃពីការវិវត្តឆ្ពោះទៅមុខរបស់វិស័យបាល់ទាត់ក្នុងក្របខណ្ឌពិភពលោក ជាពិសេសបន្តប្រទេសដែលកំពុងលូតលាស់ដូចជាកម្ពុជា។ «ជាមោទកភាពដែលកម្ពុជាបានក្លាយជាម្ចាស់ផ្ទះក្នុងការរៀបចំ FIFA Executive Football Summit ដោយក្រៅពីទទួលបានបទពិសោធន៍ពីគ្នាទៅវិញទៅមក យើងក៏ទទួលបានផលប្រយោជន៍ពី FIFA ស្មើៗគ្នាផងដែរ បើគិតចាប់តាំងពីលោក Infantino ចូលកាន់តំណែង»៕
Tag:
FIFA
FFC
Gianni Infantino
© រក្សាសិទ្ធិដោយ thmeythmey.com