រថយន្ត
អន្តរជាតិ
ស្ត្រីមេម៉ាយម្នាក់តុបតែងរថយន្តចំណាស់ខ្លួនដើម្បីអបអរទិវានៃសេចក្តីស្រឡាញ់
× ដើម្បីអបអរទិវានៃក្តីស្រឡាញ់ ថ្ងៃទី១៤ ខែកុម្ភៈ ស្ត្រីមេម៉ាយម្នាក់ឈ្មោះ Margie Felts ដែលរស់នៅក្រុង Nashville Tennessee បានតុបតែងរថយន្ត Toyota Camry ចំណាស់របស់ខ្លួន ជាមួយផ្ទាំងបេះដូង និងតក្កុតាខ្លាឃ្មុំពណ៌ក្រហម និងពណ៌ផ្កាឈូក លាយចំរុះគ្នា។
«រថយន្តរបស់ខ្ញុំកំពុងមានភាពល្បីល្បាញយ៉ាងខ្លាំងនៅពេលនេះ ខ្ញុំពិតជារំភើបរីករាយមែនទែន»។ អ្នកស្រី Felts បានរៀបរាប់ប្រាប់ទូរទស្សន៍ WTVF ដោយបន្ថែមថា៖ «ខ្ញុំបានបង្ហាញនូវអ្វីដែលមនុស្សរាល់រូបស្រឡាញ់ពេញចិត្ត»។
ស្ត្រីរូបនេះ បានអះអាងថា គាត់តែងតែតុបតែងរថយន្តរបស់ខ្លួនបែបនេះនៅក្នុងទិវានៃសេចក្តីស្រឡាញ់ ពោលគឺចាប់តាំងពីឆ្នាំ២០១៦មក បើទោះបីជាមានការរិះគន់មួយចំនួនក៏ដោយ។ គាត់បានបញ្ជាក់ដដែលថា ការតុបតែងរថយន្តរបស់គាត់ក្នុងគោលបំណងតែមួយគត់ គឺធ្វើឲ្យទាំងអស់គ្នា មើលឃើញ ហើយសប្បាយចិត្ត។
គាត់បានបញ្ជាក់ថា៖ «មនុស្សច្រើនបំផុតលើពិភពលោកស្រឡាញ់វា។ មនុស្សជាច្រើនតាមពីក្រោយខ្ញុំ ហើយថតវីដេអូ។ នៅពេលដែលខ្ញុំបើកហួស មានអ្នកខ្លះខំប្រឹងបើកតាម ហើយសួរថា «តើខ្ញុំអាចថតរូបរថយន្តនេះបានដែរឬទេ?»។
ទោះបីជាយ៉ាងណាក៏ដោយ ដំណើររបស់អ្នកស្រី Felts ក៏មិនទទួលបាននូវការស្វាគមន៍១០០ភាគរយនោះដែរ ជាពិសេសក្នុងដំណើរទៅអាកាសយានដ្ឋានអន្តរជាតិ ដោយគាត់មិនមានឱកាសបើករថយន្តដែលខ្លួនតុបតែងចូលថតចំណតស្ថានីយ៍អ្នកដំណើរនោះឡើយ។
រថយន្តដែលតុបតែងនេះ បានធ្វើដំណើរសរុបប្រមាណជាង៦០ម៉ឺនគីឡូម៉ែត្រហើយ និងនៅតែបន្តទៅមុខ។ អ្នកស្រី Felts ដែលបានបាត់បង់ស្វាមីកាលពីឆ្នាំកន្លងទៅ បានអះអាងថា រថយន្តរបស់ខ្លួនមានបេះដូងនៃក្តីស្រឡាញ់ពិតប្រាកដ។ «ពេលនេះ ខ្ញុំក្លាយជាមនុស្សនៅលីវ។ មនុស្សជាច្រើនសួរថា តើអ្នកធ្លាប់ស្មុគស្មាញដែរឬទេ? ហើយខ្ញុំឆ្លើយថា ទេ»។
ក្រៅពីអាកាសយានដ្ឋាន អ្នកស្រី Felts បានបញ្ជាក់ថា គាត់អាចបើកបរទៅគ្រប់ទីកន្លែង ហើយបើមានក្មេងសុំស្ករគ្រាប់នៅតាមផ្លូវដែលគាត់ធ្វើដំណើរ គាត់រីករាយជូនតាមសំណើររបស់ពួកគេ៕
Tag:
ទិវានៃសេចក្តីស្រឡាញ់
© រក្សាសិទ្ធិដោយ thmeythmey.com