រថយន្ត
អន្តរជាតិ
ប៉ូលិសនៅ NSW របស់អូស្ត្រាលីចាត់វិធានការក្តៅប្រឆាំងអ្នកប្រើប្រាស់ទូរសព្ទពេលបើកបរ
× ចំណាត់ការក្តៅត្រឹមតែ១ថ្ងៃប៉ុណ្ណោះ នាំឲ្យប៉ូលិសនៅក្រុង New South Wales ប្រទេសអូស្ត្រាលី ឃាត់ និងពិន័យមនុស្សជាង១២០០នាក់ ដែលបានបើកបរផង និងប្រើទូរសព្ទដៃផង ឬហៅម្យ៉ាងថា «អ្នកបើកបរអាត្មានិយម»។
អាកប្បកិរិយាដ៏គ្រោះថ្នាក់របស់អ្នកបើកបរ រួមមានដូចជាការប្រើប្រាស់ទូរសព្ទដៃ ការមិនគោរពសិទ្ធិអាទិភាព និងការប្រើប្រាស់រថយន្តខុសប្រក្រតី។ លោក Michael Corboy ជំនួយការស្នងការប្រចាំក្រុង New South Wales បានបញ្ជាក់ថា៖ «ទោះបីជាមានការព្រមាន និងការអប់រំជាច្រើនហើយក៏ដោយ ក៏គ្រោះថ្នាក់នៅតែបន្តកើតមានឡើង ហើយការណែនាំទាក់ទងនឹងនិយាយ ឬផ្ញើរសារតាមទូរសព្ទនៅពេលបើកបរ ហាក់ដូចជាមិនមានឥទ្ធិពលទាល់តែសោះ»។
យោងតាមការផ្សាយរបស់ The News Daily សមត្ថភាពរកឃើញករណីប្រើប្រាស់ទូរសព្ទនៅពេលបើកបរ រហូតដល់ទៅជាង១២០០ករណី នាអំឡុងរយៈពេលតែមួយថ្ងៃប៉ុណ្ណោះ។ លោក Corboy បានបញ្ជាក់ថា អ្នកបើកបរសរុប១២១៥នាក់ បានប្រើប្រាស់ទូរសព្ទដៃពេលបើកបរ ដោយម្នាក់ៗរងពិន័យប្រមាណ២៦០ដុល្លារអាមេរិក និងរងការដក៤ពិន្ទុនៅលើបណ្ណបើកបរ។
ជាមួយគ្នានេះផងដែរ អាជ្ញាធរក្រុង New South Wales បានពិន័យមនុស្ស១៣៧នាក់ពីបទបើកបរមិនគោរពសិទ្ធិអាទិភាព និង៥៨៦នាក់ទៀតពីបទប្រើប្រាសយានយន្តគ្មានបទដ្ឋានត្រឹមត្រូវ ពីព្រោះករណីទាំងនោះហើយ ដែលបានធ្វើឲ្យមនុស្ស៣៩២នាក់ស្លាប់ កាលពីឆ្នាំមុន។
The News Daily បានផ្សព្វផ្សាយឲ្យដឹងផងដែរថា រដ្ឋាភិបាលអូស្ត្រាលី នឹងបំពាក់កាម៉េរាបន្ថែមដើម្បីតាមចាប់ទិដ្ឋភាពអ្នកបើកបរដែលប្រើប្រាស់ទូរសព្ទដៃ ហើយព្រមានព្យួរបណ្ណបើកបរផងដែរ សម្រាប់ម្ចាស់យានយន្តដែលស្ថិតក្នុងស្ថានភាពស្រវឹង ទោះបីបីជាមានកម្រិតតិចតួចក្តី។
អូស្ត្រាលី រំពឹងថា ពួកគេអាចសម្រេចបានផែនការគ្មានករណីស្លាប់ និងរបួសដោយសារគ្រោះថ្នាក់ចរាចរណ៍ចាប់ពីឆ្នាំ២០៥៦ទៅ ខណៈបច្ចុប្បន្ន មានមនុស្សយ៉ាងហោចម្នាក់ស្លាប់ ឬរបួសធ្ងន់ រៀងរាល់៤១នាទីម្តង ដោយសារគ្រោះថ្នាក់ចរាចរណ៍៕
© រក្សាសិទ្ធិដោយ thmeythmey.com