ប៉ូលិសដែលជ្រុលដៃសម្លាប់បុរសម្នាក់ពេលបង្ក្រាបល្បែងជល់មាន់ ត្រូវជាប់ទោស១ឆ្នាំ តែព្យួរ

ជាតិ

ប៉ូលិសដែលជ្រុលដៃសម្លាប់បុរសម្នាក់ពេលបង្ក្រាបល្បែងជល់មាន់ ត្រូវជាប់ទោស១ឆ្នាំ តែព្យួរ

14, Feb 2018 , 10:33 am

រូបភាព

មន្រ្តីនគរបាលឈ្មោះ ចន វីរៈ (ពាក់អាវពណ៌ក្រហម) ដើរឱនមុខ ពេលចូលតុលាការ។ រូបភាពពីគណនីហ្វេសបុក កញ្ចក់ ទិព្វ

ដោយ: ថ្មីៗ

ភ្នំពេញ៖ ប៉ូលិសម្នាក់ ដែលជាប់ចោទពីបទ«មនុស្សឃាតដោយអចេតនា» នៅក្នុងករណីបង្ក្រាបល្បែងជល់មាន់ ដែលបណ្ដាលឲ្យពលរដ្ឋម្នាក់ស្លាប់ កាលពីថ្ងៃទី២១ មករាកន្លងមក ត្រូវបានតុលាការសម្រេចផ្តន្ទាទោស១ឆ្នាំ។

ការផ្តន្តាទោសនេះធ្វើឡើង បន្ទាប់ពីចៅក្រមស៊ើបសួរលោក រស់ ពិសិដ្ឋ និងតំណាងអយ្យការសាលាដំបូងរាជធានីភ្នំពេញលោក សៀង សុខ បញ្ចប់ការសាកសួរលើឈ្មោះ ចន វីរៈ មន្ត្រីនគរបាល ដែលបានទទួលស្គាល់ពីកំហុសខ្លួន ក្នុងការប្រើប្រាស់អាវុធបង្ក្រាបបទល្មើសជល់មាន់ បណ្ដាលឲ្យមនុស្សស្លាប់ ដោយគ្មានការអនុញ្ញាតថ្នាក់លើនេះ។

តែយ៉ាងណាតំណាងអយ្យការលោក សៀង សុខ ស្នើឲ្យតុលាការព្យួរទោសមន្ត្រីនគរបាល ចន វីរៈ ដើម្បីទុកឱកាសឲ្យគេបានចូលបម្រើការងារវិញ។ «ផ្ដន្ទាទោសជនជាប់ចោទពីបទមនុស្សឃាតដោយអចេតនាតាមមាត្រា២០៧នៃក្រមព្រហ្មទណ្ឌ និងស្នើឲ្យលោកចៅក្រមផ្តន្ទាទោសដោយព្យួរទោស ដើម្បីឲ្យគាត់(ចន វីរៈ)ត្រឡប់ទៅបំពេញការងារវិញ»។ សំណើរបស់លោក សៀង សុខ នេះ ត្រូវបានស្រង់ដោយកាសែតភ្នំពេញប៉ុស្តិ៍ ដែលបានបន្ថែមថា គ្រួសារជនរងគ្រោះបានអនុគ្រោះដល់ជនជាប់ចោទ បន្ទាប់ពីទទួលបានសំណង៨ពាន់ដុល្លារ ពីភាគីក្រុមការងារជនជាប់ចោទខាងលើ និងថវិកាធ្វើបុណ្យសពប្តីពីអាជ្ញាធរខណ្ឌពោធិ៍សែនជ័យ ។

គួរបញ្ជាក់ថា បុរសដែលបានបាត់បង់ជីវិតក្នុងករណីបង្ក្រាបសង្វៀនជល់មាន់នេះ មានឈ្មោះ សៀក រ៉ន អាយុ៣៣ឆ្នាំ មានមុខរបរជាកម្មកររោងចក្រ។ ហេតុការណ៍នេះបានកើតឡើង នៅម្តុំផ្សារកាណាស៊ីធី សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។ ដើមចមដែលបណ្ដាលឲ្យមានមនុស្សស្លាប់នេះ នៅពេលដែលនគរបាលម្នាក់ឈ្មោះ ចន វីរៈ ចុះទៅបង្ក្រាបសង្វៀនជល់មាន់មួយកន្លែង ហើយបានយកកាំភ្លើងបាញ់ឡើងលើ ដើម្បីគំរាមជនល្មើសប្រព្រឹត្តល្បែងជល់មាន់កុំឲ្យតដៃ តែបែរជាគ្រាប់កាំភ្លើងហើរទៅចំពលរដ្ឋម្នាក់ រហូតបាត់បង់ជីវិត។ នេះបើតាមលោក លី សុផាណា អ្នកនាំពាក្យនៃអយ្យការអមសាលាដំបូងរាជធានីភ្នំពេញ ដែលប្រាប់អ្នកសារព័ត៌មានកន្លងមក៕