កីឡាជាតិ
ហាប់គីដូប្តេជ្ញាខិតខំអភិវឌ្ឍន៍ខ្លួន ដើម្បីបង្កើនឱកាសសម្រាប់ស៊ីហ្គេមឆ្នាំ២០២៣
×
កីឡាហាប់គីដូដែលមិនស្ថិតក្នុងចលនាអូឡាំពិក បាននិងកំពុងខិតខំរៀបចំហេដ្ឋារចនាសម្ព័ន្ធ ធនធានកីឡាករ គ្រូបង្វឹក និងមន្ត្រីបច្ចេកទេស ជាមួយក្តីសង្ឃឹមនឹងអាចបង្ហាញខ្លួនក្នុងការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ នេះបើតាមការបញ្ជាក់របស់ប្រធានសហព័ន្ធខ្មែរកីឡាហាប់គីដូ នាពិធីជួបជុំគ្រួសារហាប់គីដូ ប្រគល់វិញ្ញាបនបត្រ និងលិខិតថ្លែងអំណរគុណកាលពីថ្ងៃទី១១ កុម្ភៈ នៅមជ្ឈមណ្ឌលកីឡាវាយកូនបាល់និងសូហ្វតិន្នីសកម្ពុជាក្នុងពហុកីឡដ្ឋានជាតិ។
កង្វះទីលានហ្វឹកហាត់ ធនធានគ្រូបង្វឹក កីឡាករ និងមន្ត្រីបច្ចកេទេស ជាបញ្ហាប្រឈមដែលសហព័ន្ធខ្មែរកីឡាហាប់គីដូបាននិងកំពុងខិតខំស្វែងរកដំណោះស្រាយ ក្នុងការជំរុញឲ្យកីឡាហាប់គីដូមានការទទួលស្គាល់ពីគណៈកម្មាធិការជាតិអូឡាំពិកកម្ពុជា។ លើសពីនេះ ដើម្បីជំរុញឲ្យកីឡានេះបានបង្ហាញខ្លួនក្នុងការប្រកួតកីឡាស៊ីហ្គេមលើកទី៣២ដែលកម្ពុជាធ្វើជាម្ចាស់ផ្ទះ។ នេះបើតាមការបញ្ជាក់របស់ លោក ម៉ក់ សំអុល ប្រធានសហព័ន្ធខ្មែរកីឡាហាប់គីដូ។
«កីឡាហាប់គីដូមិនទាន់បានចូលក្នុងប្រព័ន្ធចលនាអូឡាំពិកនោះទេ ប៉ុន្តែ NOCC បានលើកទឹកចិត្តឲ្យយើងខិតខំអភិវឌ្ឍន៍សមត្ថភាព ជាមួយការសន្យានឹងដាក់បញ្ចូលក្នុងកីឡាស៊ីហ្គេមនៅឆ្នាំ២០២៣។ ដូច្នេះយើងកំណត់យកឆ្នាំ២០២១ ជាឆ្នាំត្រួតពិនិត្យ និងវាយតម្លៃថាតើ យើងមានហេដ្ឋារចនាសម្ព័ន្ធ ធនធានកីឡាករ គ្រូបង្វឹក និងក្លិប-សមាគមត្រឹមត្រូវហើយឬនៅ ជាពិសេសមើលលើការរីកចម្រើន និងការទទួលស្គាល់ជាលក្ខណៈអន្តរជាតិ»។ នេះជាការបន្ថែមរបស់លោក ម៉ក់ សំអុល។
ប្រធានសហព័ន្ធរូបនេះបានបញ្ជាក់បន្ថែមទៀតថា បច្ចុប្បន្នសហព័ន្ធកំពុងរៀបចំទីលានហ្វឹកហាត់មួយទំហំដី១ហិកតានៅស្រុកកណ្តាលស្ទឹង ដែលមានចម្ងាយប្រមាណ១០គីឡូម៉ែត្រពីភ្នំពេញ។ ទីលានដែលគ្រោងដាក់ឈ្មោះ«ក្លិប-សមាគមអ្នកនិយមហាត់ក្បាច់គុន»នេះ នឹងសម្ពោធដាក់ឲ្យប្រើប្រាស់ក្នុងពេលឆាប់ៗខាងមុខ។
នាពិធីជួបជុំគ្រួសារកីឡាហាប់គីដូ ក៏ដូចជាប្រគល់លិខិតថ្លែងអំណរគុណដល់អ្នកជួយឧបត្ថម្ភគាំទ្រ និងវិញ្ញាបនបត្របញ្ជាក់ដាន់ដល់សិស្សគុនហាប់គីដូកាលពីថ្ងៃទី១១ កុម្ភៈ អគ្គលេខាធិការសហព័ន្ធ លោក គង់ ចាន់ធីណា បានឲ្យដឹងថា បច្ចុប្បន្នសហព័ន្ធពុំទាន់មានធនធានកីឡាករគ្រប់គ្រាន់នៅឡើយទេ។ បញ្ហានេះ ដោយសារកីឡាករមួយចំនួនធំបានលាឈប់ ក្រោយពួកគេទទួលបានខ្សែក្រវាត់ខ្មៅ និងមួយចំនួនទៀតលាឈប់ ក្រោយហ្វឹកហាត់គ្មានការប្រកួត និងជួបវិបត្តិហិរញ្ញវត្ថុជាដើម។
«យើងកំពុងជួបបញ្ហាខ្វះខាតធនធានមនុស្ស បច្ចុប្បន្នយើងមានគ្រូបង្គោលប្រហែល៤ទៅ៥នាក់ប៉ុណ្ណោះ ព្រោះភាគច្រើនគាត់ជាប់រវល់ជាមួយការងារផ្សេង។ ដូចយើងឃើញស្រាប់ហើយ កីឡាយើងពុំមានការគាំទ្រច្រើននោះទេ ហើយក៏គ្មានការប្រកួតដណ្តើមជើងឯក ឬពានអ្វីនោះដែរ ដែលជាហេតុធ្វើឲ្យយុវជនមិនចាប់អារម្មណ៍»។ នេះជាការបញ្ជាក់របស់លោក គង់ ចាន់ធីណា ហើយលោកបានប្តេជ្ញាថា នឹងខិតខំផ្សព្វផ្សាយឲ្យបានទូលំទូលាយ ដើម្បីទាក់ទាញយុវជនចូលរួមឲ្យបានច្រើនកុះករ។
នាពិធីជួបជុំមហាគ្រួសារកីឡាហាប់គីដូនោះដែរ សហព័ន្ធបានប្រគល់វិញ្ញាបនបត្របញ្ជាក់ដាន់ដល់សិស្សគុនហាប់គីដូចំនួន៥រូប ក្នុងនោះកម្រិត១ដាន់មាន៣នាក់ និង២ដាន់មានពីរនាក់៕
Tag:
ហាប់គីដូ
ម៉ក់ សំអុល
SEA Game 2023
© រក្សាសិទ្ធិដោយ thmeythmey.com