ជាតិ
រដ្ឋបាលខេត្តកណ្តាលរងការរិះគន់ចំពោះផ្ទាំងផ្សព្វផ្សាយដែលខុសអក្ខរាវិរុទ្ធ ផ្ទាំងផ្សព្វផ្សាយពីពិធីបុណ្យទន្លេនៅខេត្តកណ្តាល ដែលរងការរិះគន់តាមបណ្តាញសង្គមហ្វេសប៊ុក
× អ្នកប្រើប្រាស់បណ្តាញសង្គមហ្វេសប៊ុក បានចែករំលែកតៗគ្នា ជាមួយនឹងការបញ្ចេញមតិរិះគន់រដ្ឋបាលខេត្តកណ្តាល ដែលប្រើប្រាស់ផ្ទាំងផ្សព្វផ្សាយ ដោយមិនបានត្រួតពិនិត្យអក្ខរាវិរុទ្ធឲ្យបានត្រឹមត្រូវ។
ខេត្តកណ្តាល នឹងក្លាយជាម្ចាស់ផ្ទះរៀបចំពិធីបុណ្យទន្លេលើកទី៤ ដែលចាប់ពីថ្ងៃទី៩ ដល់ថ្ងៃទី១១ ខែមីនា ខាងមុខ។ ប៉ុន្តែអ្វីដែលគួរឲ្យចាប់អារម្មណ៍នោះ អាជ្ញាធរ បានដាក់ផ្ទាំងផ្សព្វផ្សាយនៅក្បែរសាលាខេត្ត ដោយមិនបានត្រួតពិនិត្យឲ្យបានម៉ត់ចត់។
ជាមួយពាក្យអង់គ្លេស «Welcome» ដែលមានន័យថា «សូមស្វាគមន៍» រដ្ឋបាលខេត្តកណ្តាល បានបកប្រែថា «អបអរសាទរ»។ ការបកក្នុងន័យនេះ មិនមែនជារឿងដែលគួរឲ្យចាប់កំហុសនោះឡើយ ប៉ុន្តែសំណេរទៅវិញទេ ដែលជារឿងធំ។
តាមវចនានុក្រមសម្តេចព្រះសង្ឃរាជ ជួន ណាត ពាក្យត្រឹម គឺ «សាទរ» មិនមែន «សារទរ» នោះឡើយ។ ចំណែកខែ «មីនា» រដ្ឋបាលខេត្តកណ្តាល បែរជាសរសេរថា «មិនា» ទៅវិញ។
នេះមិនមែនជាលើកទីមួយនោះឡើយ ដែលអាជ្ញាធរ រងការរិះគន់ កន្លងមក ផ្ទាំងផ្សព្វផ្សាយនៅសាលារាជធានីភ្នំពេញ និងនៅខេត្តសៀមរាប ក៏ធ្លាប់ក្លាយជាប្រធានបទរបស់អ្នកលេងហ្វេសប៊ុករួចហើយ៕
© រក្សាសិទ្ធិដោយ thmeythmey.com