អន្តរជាតិ
ម៉ាល់ឌីវ៖ បាតុករ ២៥នាក់ត្រូវឃុំខ្លួនព្រោះទាមទារឲ្យមានការចាប់ខ្លួនប្រធានាធិបតី
រូបភាព៖ AFP
×![]()
បាតុករប្រហែល ២៥នាក់ត្រូវបានអាជ្ញាធរម៉ាល់ឌីវចាប់ខ្លួននៅថ្ងៃសៅរ៍ទី ១៧ ខែកុម្ភៈ ដោយសារពួកគេចូលរួមចលនាបាតុកម្មទាមទារឲ្យមានការឃុំខ្លួនប្រធានាធិបតី និងដោះលែងអ្នកនយោបាយបក្សប្រឆាំង។ ការចាប់ខ្លួននេះធ្វើឡើងស្របពេលដែលម៉ាល់ឌីវបន្តស្ថិតក្រោមបញ្ជាប្រធានាធិបតីដែលបានប្រកាសដាក់ក្នុងស្ថានភាពអាសន្នកាលពីដើមខែ។
វិបត្តិនយោបាយម៉ាល់ឌីវ មិនមានថមថយកម្តៅសោះ បើទោះជាមានការអំពាវនាវពីសហគមន៍អន្តរជាតិឲ្យភាគីនយោបាយជ្រើសរើសយកការសន្ទនាគ្នាក្តី។ គេឃើញប្រជាជនម៉ាល់ឌីវដែលកើតទុក្ខមិនសុខចិត្តចំពោះទង្វើរដ្ឋាភិបាលបច្ចុប្បន្ននោះ បានចេញមុខបាតុកម្មតវ៉ា និងទាមទារឲ្យមានការចាប់ខ្លួន និងឃុំខ្លួនប្រធានាធិបតិបច្ចុប្បន្នលោក Abdulla Yameen។
បើតាមការចុះផ្សាយរបស់ទីភ្នាក់ងារព័ត៌មាន Reuters ចលនាបាតុកម្មដែលប្រមូលផ្តុំមនុស្សរាប់ពាន់នាក់នេះកើតឡើងនៅទូទាំងប្រទេសម៉ាល់ឌីវទាំងមូល ហ់យបាតុកម្មនេះចាប់ផ្តើមកាលពីថ្ងៃសុក្រមកម្ល៉េះ។ ក្រៅពីទាមទារឲ្យមានការចាប់ឃុំខ្លួនប្រធានាធិបតី ប្រជាជនទាំងនោះក៏បានស្នើឲ្យរដ្ឋាភិបាលអនុវត្តសេចក្តីសម្រេចរបស់តុលាការកំពូលកន្លងមកដែលទាមទារឲ្យដោះលែងអ្នកនយោបាយបក្សប្រឆាំង ប្រាំបួនរូបផង។
តំណាងរាស្ត្របក្សប្រឆាំងលោក Ahmed Mahloof បានថ្លែងប្រាប់អ្នកសារព័ត៌មានថា មនុស្សប្រហែល ២៥នាក់ រួមទាំងអ្នកកាសែតពីរនាក់ត្រូវបានគេចាប់ឃុំខ្លួនរួចទៅហើយ។ លោក Mahloof បានថ្លែងដូច្នេះ៖ «ប៉ូលិសបដិសេធប្រាប់យើងពី ចំនួន មនុស្សប៉ុន្មាននាក់ហើយត្រូវបានចាប់ខ្លួន។ យើងមិនអាចដឹងពីចំនួនពិតប្រាកដឡើយ ហើយយើងក៏មិនដឹងថា ពួកគេត្រូវបានឃុំខ្លួននៅទីណាដែរ។ ពួកប៉ូលិសបានប្រាប់យើងថា វាគ្មានហេតុផលដែលពួកគេរត្រូវផ្តល់ព័ត៌មានឡើយព្រោះការចាប់ខ្លួនធ្វើឡើងពេលរដ្ឋស្ថិតក្នុងគ្រាអាសន្ន»។
ពេលចាប់ផ្តើមមានចលនាបាតុកម្ម ប៉ូលិសបានប្រាប់បាតុករថា ការជួបជុំគ្នាដើម្បីធ្វើបាតុកម្មនោះត្រូវបានហាមឃាត់ជាដាច់ខាតនៅក្នុងរដ្ឋធានីម៉ាល់។ក្រោយមកប៉ូលិសក៏ចាប់ផ្តើមប្រើប្រាស់វិធានការក្តៅដើម្បីបំបែកបាតុករតែម្តង។ ក្រោយការបង្ក្រាបពួកគេបានប្រមូលផ្តុំគ្នាទៀតចំពីរកន្លែងស្ថិតនៅក្នុងរដ្ឋធានី ប៉ុន្តែពួកគេត្រូវបានប៉ូលិសបំបែកជាថ្មីទៀត។
សូមបញ្ជាក់ថា នាថ្ងៃចន្ទទី ៥ ខែកុម្ភៈ ប្រធានាធិបតី Abdulla Yameen ចេញក្រឹត្យប្រកាសដាក់រដ្ឋក្នុងភាពអាសន្ន រយៈពេល ១៥ ថ្ងៃ។ បន្ទាប់ពីដាក់រដ្ឋក្នុងភាពអាសន្នហើយ រដ្ឋាភិបាលរបស់លោក ចាប់ផ្តើមបង្ក្រាបរាល់ក្រុមអ្នកប្រឆាំងរដ្ឋាភិបាលក្នុងនោះមានការចាប់ខ្លួនចៅក្រមតុលាការកំពូល និងអ្នកនយោបាយដែលចូលរួមជាមួយគណបក្សប្រឆាំងដើម្បីត្រៀមទម្លាក់លោកពីតំណែងផង។ Yameen ត្រូវបានគេរិះគន់ និងចាត់ទុកជាអ្នកនយោបាយពុករលួយ ប្រើប្រាស់អំណាចខុសគោលដៅ និងរំលោភសិទ្ធិមនុស្សធ្ងន់ធ្ងរផងដែរ៕
អត្ថបទទាក់ទង
Tag:
ម៉ាល់ឌីវ
Abdulla Yameen
© រក្សាសិទ្ធិដោយ thmeythmey.com
