កីឡាជាតិ
កីឡាហែលទឹកឆ្លងទន្លេ និងកីឡា៧ផ្សេងទៀតនឹងបង្ហាញខ្លួនក្នុងបុណ្យទន្លេឆ្នាំនេះ
ការប្រកួតកីឡាចំបាប់មហាជនក្នុងបុណ្យទន្លេលើកទី៣នៅខេត្តស្ទឹងត្រែង
×![]()
គណៈកម្មាធិការជាតិអូឡាំពិកកម្ពុជា(NOCC)បានកំណត់ដាក់កីឡាចំនួន៨ប្រភេទឲ្យចូលរួមប្រកួតនិងសម្តែងដើម្បីអបអរបុណ្យទន្លេលើកទី៤ ដែលរៀបចំចាប់ពីថ្ងៃទី៩-១១ ខែមីនា ឆ្នាំ២០១៨ នៅក្រុងតាខ្មៅ ខេត្តកណ្តាល។ ក្នុងចំណោមកីឡាទាំងនេះ គេឃើញមានកីឡាថ្មី១ប្រភេទ គឺកីឡាហែលទឹកឆ្លងទន្លេ(១គីឡូម៉ែត្រ)។
កីឡាហែលទឹកឆ្លងទន្លេ ដែលជាប្រភេទកីឡាថ្មី រួមទាំងកីឡា៧ផ្សេងទៀតដូចជារត់កម្សាន្ត, ប្រណាំងកង់, បាល់ទាត់, បាល់ទះ, ប្រដាល់គុនខ្មែរ, ចំបាប់បុរាណមហាជន និងទូកកានូ ត្រូវបាន NOCC ដាក់ឲ្យប្រកួតនិងសម្តែង ដើម្បីអបអរបុណ្យទន្លេឆ្នាំនេះ។ បុណ្យទន្លេលើកទី៤ឆ្នាំនេះ នឹងប្រព្រឹត្តទៅចាប់ពីថ្ងៃទី៩-១១ ខែមីនា នៅដងទន្លេបាសាក់ក្នុងក្រុងតាខ្មៅខេត្តកណ្តាល។ តែយ៉ាងណា កីឡាទាំងនេះ អាចមានការប្រែប្រួលតាមភាពជាក់ស្តែង។
ពិធីបុណ្យទន្លេជាផលិតផលទេសចរណ៍មួយ ដែលរៀបចំឡើង ដើម្បីទាក់ទាញភ្ញៀវទេសចរណ៍ជាតិ និងអន្តរជាតិឲ្យមកទស្សនាតំបន់អេកូទេសចរណ៍ ក៏ដូចជាផ្សព្វផ្សាយតំបន់ទេសចរណ៍កម្ពុជាទៅកាន់ពិភពលោក។ ថ្នាក់ដឹកនាំក្រសួងទេសចរណ៍រំពឹងថា បុណ្យទន្លេឆ្នាំនេះ នឹងអាចទាក់ទាញភ្ញៀវទេសចរជាង១លាននាក់ ដោយសារឆ្នាំនេះរៀបចំនៅក្បែររាជធានីភ្នំពេញ។
ក្រៅពីគោលបំណងទាក់ទាញទាក់ទាញភ្ញៀវទេសចរ ពិធីបុណ្យបែបទេសចរណ៍មួយនេះ ក៏ដើម្បីបញ្ជ្រាបការយល់ដឹងដល់ប្រជាពលរដ្ឋ ក៏ដូចជាអាជីវករពីរបៀបផ្តល់សេវាកម្មទេសចរណ៍ដល់ភ្ញៀវទេសចរ និងការការពារបរិស្ថានផងដែរ។ លើសពីនេះ ដើម្បីទាក់ទាញយុវជនឲ្យចូលរួមលេងកីឡាកាន់តែច្រើនក្នុងដំណើរឆ្ពោះទៅកាន់កីឡាស៊ីហ្គេមឆ្នាំ២០២៣ ដែលកម្ពុជាធ្វើម្ចាស់ផ្ទះ។
បើយោងតាមតារាងកម្មវិធីរបស់ NOCC កីឡារត់ប្រណាំងកម្សាន្ត៣គីឡូម៉ែត្រ និង៥គីឡូម៉ែត្រ ធ្វើឡើងនៅថ្ងៃទី៩ មីនា នៅមាត់ទន្លេក្បែរផ្លូវអ្នកតាចិន រីឯកីឡាបាល់ទាត់ដែលជាការប្រកួតមិត្តភាពកម្ពុជាវៀតណាម និងកីឡាហែលទឹកឆ្លងទន្លេ(១គីឡូម៉ែត្រ)រៀបនៅថ្ងៃទី១០ មីនា។ ចំណែកីឡាប្រណាំងកង់២០គីឡូម៉ែត្រ និង៤០គីឡូម៉ែត្រ, បាល់ទះ និងប្រដាល់គុនខ្មែរនៅថ្ងៃទី១១ មីនា ខណៈកីឡាចំបាប់ និងទូកកានូធ្វើឡើងចាប់ពីថ្ងៃទី១០ ដល់ថ្ងៃទី១១ មីនា។
គូររំលឹកថា ពិធីបុណ្យទន្លេលើកទី៣ ដែលធ្វើឡើងក្រោមប្រធានបទ«ទន្លេ ផ្សារភ្ជាប់ប្រជាជន និងវប្បធម៌»នៅខេត្តស្ទឹងត្រែង NOCC បានដាក់កីឡាចំនួន១១ប្រភេទឲ្យចូលរួមប្រកួត និងសម្តែង។ កីឡាទាំងនោះរួមមានរត់កម្សាន្ត, ប្រណាំងកង់, បាល់ទាត់, បាល់ទះ, ល្បុក្កតោ, រាំ, ប្រដាល់គុនខ្មែរ, ចំបាប់មហាជន, វាយសី, ទូកកានូ និងវាយព្រ័ត្រ៕
Tag:
ហែលទឹកឆ្លងទន្លេ
បុណ្យទន្លេ
© រក្សាសិទ្ធិដោយ thmeythmey.com
