មានជីវិត១ខែ១០ថ្ងៃ ដង្កូវនាងប្ដូរពណ៌៦ដង ហើយផលិតសរសៃសូត្រគុណភាពល្អលេខ១

ជាតិ

មានជីវិត១ខែ១០ថ្ងៃ ដង្កូវនាងប្ដូរពណ៌៦ដង ហើយផលិតសរសៃសូត្រគុណភាពល្អលេខ១

18, Feb 2018 , 3:00 pm

រូបភាព

ដោយ: ប៉ូ សាគុន

ដង្កូវនាងគឺជាសត្វមួយប្រភេទដែលគេចិញ្ចឹមដើម្បីយកសរសៃសូត្រ ទៅត្បាញក្រមា សំពត់ហូល ឬផាមួង ជាដើម ហើយសូត្រដែលចេញពីដង្កូវនាងមានគុណភាពល្អលេខ១។ អាយុកាលរបស់ដង្កូវនាងមានរយៈពេលតែ១ខែ១០ថ្ងៃតែប៉ុណ្ណោះ វានឹងងាប់ទៅវិញ ហើយក្នុងរយៈពេលនេះ ខ្លួនរបស់វាប្ដូរពណ៌រហូតទៅដល់៦ទៅ៧ដង។

មានបទពិសោធន៍ចិញ្ចឹមដង្កូវនាងរយៈពេល៤ឆ្នាំ អ្នកស្រី ថន ស្រីថា បានរៀបរាប់ប្រាប់សារព័ត៌មាន ThmeyThmey ទាក់ទងនឹងការវិវត្តរបស់សត្វដ៏មានប្រយោជន៍មួយនេះ។ អ្នកស្រីបានបញ្ជាក់ថា ជីវិតរបស់ដង្កូវនាងមានរយៈពេលតែ១ខែ១០ថ្ងៃតែប៉ុណ្ណោះវានឹងងាប់ទៅវិញ។ ក្នុងរយៈពេលនេះ ដង្កូវនាងប្ដូរពណ៌រហូតទៅដល់៦ដង។ កាលនៅជាពងមេអំបៅនៅឡើយវាប្ដូរពណ៌៣ដង មានពណ៌លៀង ពណ៌ស និងពណ៌ខ្មៅ ដល់ញាស់ជាកូនដង្កូវនាងវាប្ដូរពណ៌៣ដងទៀត គឺពណ៌ខ្មៅ ស និង លឿងវិញ។

បើដង្កូនាងឈឺ វានឹងប្ដូរទៅពណ៌ក្រហម ដំណើរការនៃការធំលូតលាស់របស់វា គឺមានរយៈពេលតែ១ខែ៨ថ្ងៃតែប៉ុណ្ណោះ ហើយវានឹងប្ដូរទៅពណ៌លឿងដែលគេអាចយកវាទៅដាក់ក្នុងសម្បុក ដើម្បីឲ្យវាបញ្ចេញទឹកមាត់ផលិតជាសរសៃសូត្រ។

អ្នកស្រី ស្រីថា បានពន្យល់ថា ក្នុងដំណាក់កាលនេះ គេត្រូវចាប់ដង្កូវនាងទៅដាក់ក្នុងសម្បុកដែលគេបានចងទុករួចជាស្រេច ហើយដង្កូវនាងជាអ្នករកកន្លែងកាច់សម្បុក ដែលចេញពីទឹកមាត់របស់វាដោយខ្លួនឯង។ ប្រសិនបើដល់អាយុដង្កូវនាងអាចផលិតសរសៃសូត្របានហើយ គេមិនបានយកវាទៅដាក់ក្នុងសម្បុកទេ នោះដង្កូវនាងនឹងបញ្ចេញទឹកមាត់ មកខាងក្រៅដោយមិនអាចកាច់ជាសម្បុកបាន ហើយទឹកមាត់នោះមានពណ៌ស ដែលវាមានគុណភាពទាប។

អ្នកស្រី ថន ស្រីថា បញ្ជាក់៖ « ពេលដង្កូវនាងបាន១ខែ៨ថ្ងៃ ខ្លួនវាឡើងពណ៌លឿង យើងយកទៅដាក់ក្នុងសម្បុកដែលចងស្រាប់ នោះវានឹងបញ្ចេញទឹកមាត់ពណ៌លឿង បើមិនដាក់ក្នុងសម្បុកទេ វានឹងខ្ជាក់ទឹកមាត់ចេញមកពណ៌សគុណភាពអត់ល្អទេ»។

បន្ទាប់ពីដាក់ក្នុងសម្បុករយៈពេល១យប់១ថ្ងៃ គេអាចប្រមូលផលពីដង្កូវនាងបានហើយ។ អ្នកចិញ្ចឹមដង្កូវនាងរូបនេះបញ្ជាក់ថា ដង្កូវនាងពូជមួយចង្អេរ គេអាចប្រមូលផលមកវិញបានប្រមាណ ២០ទៅ៣០ ចង្អេរសម្បុកដង្កូវនាងវិញ។ រាល់ការប្រមូលផលសម្បុកដង្កូវនាង គេត្រូវបែងចែកពាក់កណ្ដាលនៃផលិតផលសរុបយកទៅផលិតជាសរសៃសូត្រ ហើយពាក់កណ្ដាលទៀតទុកធ្វើពូជបន្ត។

សម្បុកដង្កូវនាងដែលគេយកទៅចម្រាញ់ជាសរសៃសូត្រនោះ គឺគេយកសម្បុកដង្កូវនាងដែលមានដង្កូវនាងនៅពីក្នុង យកទៅដាំក្នុងទឹកក្ដៅឱ្យពុះ បន្ទាប់មកគេយកស្លឹកមនយកទៅជ្រលក់ក្នុងទឹកក្ដៅថ្មមៗ សរសៃសូត្រនឹងជាប់តាមមក នោះគេអាចរវៃយកសូត្របានហើយ។

អ្នកស្រី ថន ស្រីថា ពន្យល់បន្ថែមថា៖ «បន្ទាប់ពីយើងប្រមូលសម្បុកដង្កូវនាងរួចហើយ យើងយកវាទៅស្ងោរក្នុងទឹកក្ដៅ យើងអាចយកសូត្រពីវាបានហើយ។ ក្នុងមួយចង្អេរសម្បុកដង្កូវនាង អាចចម្រាញ់ជាសរសៃសូត្របានប្រមាណ៤គីឡូ»។

ចំណែកឯដង្កូវនាងដែលទុកសម្រាប់ធ្វើពូជបន្តនោះ គេទុកវានៅក្នុងសម្បុក រយៈពេល៨ថ្ងៃទៀតក្រោយពីកាច់សម្បុក។ នៅថ្ងៃទី៨មេអំបៅ នឹងខាំសម្បុកចេញដោយខ្លួនឯង បន្ទាប់ពីចេញពីសម្បុកវានឹងរកញីរកឈ្មោលដើម្បីបង្កាត់ពូជជាថ្មី។ មេអំបៅដែលក្លាយពីដង្កូវនាងនេះ ស្លាបរបស់វាទន់ មិនអាចហើយទៅណាបានឡើយ បន្ទាប់ពីពងរួចបានប្រមាណ១ឬ២ថ្ងៃ មេអំបៅទាំងអស់វានឹងងាប់ដោយខ្លួនវា។ បើតាមការបញ្ជាក់ពីអ្នកស្រី ស្រីថា ដែលមានបទពិសោធន៍ចិញ្ចឹមដង្កូវនាង៤ឆ្នាំមកហើយនោះ ថាក្នុងមេអំបៅមួយក្បាល ជាធម្មតាវាអាចពងបាន១០០ពង មិនតិចឬច្រើនជាងនេះឡើយ។

ស្ត្រីវ័យ៣៨ឆ្នាំរូបនេះបន្តថា ការថែទាំដង្កូវនាងក៏មានការលំបាកណាស់ដែរ ព្រោះសត្វនេះវាចាញ់អាកាសធាតុត្រជាក់ខ្លាំង ឬក្ដៅខ្លាំង ជាពិសេសវាចាញ់ក្លិនក្រអូប។ អាការដែលអាចសម្គាល់បានថាដង្កូវនាងកំពុងតែទទួលរងសម្ពាធនោះ គឺនៅពេលដែលខ្លួនរបស់វាឡើងពណ៌ក្រហម មកដល់ដំណាក់កាលនេះ ដង្កូវនាងអាចនឹងងាប់បាន។ នៅពេលដែលអាកាសធាតុក្ដៅពេក គេត្រូវយកចង្អេរមកគ្របពីលើ ហើយយកកំណាត់សំពត់មកគ្របពីលើឱ្យបានច្រើនជាន់ទៀត បើអាកាសធាតុត្រជាក់វិញ វាមិនសូវប៉ះពាល់ប៉ុន្មានទេ ព្រោះនៅកម្ពុជាមិនសូវត្រជាក់ខ្លាំង។

ជាធម្មតា ដង្កូវនាងស៊ីតែស្លឹកមនតែប៉ុណ្ណោះ ហើយក្នុងមួយថ្ងៃវាស៊ី៣ដង បន្ទាប់ពីបានអាយុ១ខែ៨ថ្ងៃ ពោលគឺនៅពេលគេដាក់វាក្នុងសម្បុកហើយ វាមិនស៊ីចំណីទៀតទេ គឺវាបញ្ចេញទឹកមាត់មកផលិតសរសៃសូត្រវិញម្ដង៕