អន្តរជាតិ
បុរសបែលហ្សិកម្នាក់ក្លាយជាមហាសេដ្ឋីពិភពលោករយៈពេល២ ទៅ៣ម៉ោង
× លោក Luc Mahieux ដែលជាមន្ត្រីធម្មតាម្នាក់នៅសភាបែលហ្ស៊ិក បានក្លាយជាមហាសេដ្ឋីពិភពលោករយៈពេល៣ ទៅ៤ម៉ោង ជាមួយនឹងប្រាក់២ទ្រីលាន (២ ០០០ ០០០ ០០០ ០០០) អឺរ៉ូ ឬជាង២០០០ពាន់លានដុល្លារអាមេរិក។ ករណីនេះ បានកើតឡើងដោយសារតែកំហុសបច្ចេកទេសដែលបង្កឡើងដោយបុគ្គលិកធនាគារ។
«តើកាតឥណពន្ធ (Debit Card) និង កាតឥណទាន (Credit Card)? ហេតុអ្វីមានលេខនៅខាងមុខច្រើនម្ល៉េះ? ខ្ញុំត្រូវទូរសព្ទទៅសួរខាងធនាគារ»។ លោក Luc Mahieux បានសរសេរបែបនេះនៅលើហ្វេសប៊ុករបស់ខ្លួន ដោយភ្ជាប់របាយការណ៍ទឹកប្រាក់ក្នុងគណនីរហូតដល់ទៅ២ទ្រីលានអឺរ៉ូ។
ទឹកប្រាក់មហាសាលដែលត្រូវបានដាក់ចូលក្នុងគណនីធនាគាររបស់ លោក Luc Mahieux ជិតស្មើចំនួនកំណើនផលិតផលសរុបក្នុងប្រទេសបែលហ្ស៊ិក រហូតដល់ទៅ៥ដង។
បុរសជនជាតិបែលហ្ស៊ិកដែលមានជីវភាពដ៏សាមញ្ញនៅក្រុង Dinant បានអះអាងថា លោកបានជាវទំនិញតាមរយៈក្រុមហ៊ុនអនឡាញមួយ ហើយក្រោយមក គណនីរបស់លោករងការកាត់ទឹកប្រាក់ ៣៤.៩០អឺរ៉ូដោយស្វ័យប្រវត្តិអស់រយៈពេល៣ខែជាប់គ្នា។
ដោយយល់ថា មិនមានសុវត្ថិភាព លោក Mahieux បានទាក់ទងទៅខាងធនាគារឲ្យបញ្ឈប់ការកាត់ប្រាក់ស្វ័យប្រវត្តិចំនួន៣៤.៩០អឺរ៉ូ (ឬ៣៥អឺរ៉ូ) ពីគណនីរបស់លោក និងទាមទារប្រាក់៣៤.៩០អឺរ៉ូ នោះមកវិញ។
ភាគីធនាគារបានបញ្ជាក់ថា ហាងទំនិញអនឡាញនោះមានបញ្ហា។ ប៉ុន្តែក្រោយទាក់ទងរួច ស្រាប់តែគាត់បានឃើញប្រាក់រហូតដល់ទៅ ២ ០០០ ០០០ ០០០ ៣៤៩ អឺរ៉ូនៅក្នុងគណនីរបស់ខ្លួន ជំនួសឲ្យ ៣៤.៩០អឺរ៉ូ ដែលខ្លួនទាមទារ។
ដោយគិតថា ជាកំហុសរបស់ខ្លួន លោកបានទាក់ទងនឹងខាងធនាគារពិនិត្យឡើងវិញ ហើយក្រោយមកទើបដឹងថា វាជាកំហុសបច្ចេកទេសរបស់បុគ្គលិកធនាគារ។ ទឹកប្រាក់ដ៏មហាសាលក៏ត្រូវដកចេញពី Visa Card របស់លោក Mahieux ផងដែរ។
បច្ចុប្បន្ន លោក Mahieux បានជាប់ឈ្មោះជាមហាសេដ្ឋីពិភពលោក ផ្លេកបន្ទរ ប៉ុន្តែបុរសម្នាក់នេះ បានសម្រេចចិត្តឈប់ប្រើប្រាស់ Visa Card នោះ ដោយសារព្រួយបារម្ភពីសុវត្ថិភាពហិរញ្ញវត្ថុរបស់ខ្លួន៕
© រក្សាសិទ្ធិដោយ thmeythmey.com