អន្តរជាតិ
ថៃស៊ើបអង្កេតករណីប៉ូលិស ៦០នាក់ទទួលហុងប៉ាវពីម្ចាស់បនល្បែង រូបភាព៖ Public Radio
× ប៉ូលិសចំនួន ៦០នាក់ប្រចាំទីក្រុងបាងកក ស្ថិតក្រោមការស៊ើបអង្កេតពិសេស ដោយសារពួកគេបានទទួលហុងប៉ាវពីម្ចាស់បនល្បែងមួយកន្លែង។ រឿងអាស្រូវទទួលលុយពីម្ចាស់បនល្បែងនេះផ្ទុះឡើង ក្រោយអគ្គស្នងការប៉ូលិសជាតិថៃដាក់បទបញ្ជាមួយហាមប្រាមប៉ូលិសទាំងអស់យកហុងប៉ាវពីអ្នកជំនួញចិនឡើយ។
មេប៉ូលិសប្រចាំតំបន់ប្រាំពីរនៃក្រុងបាងកក Boonyarit Rodma បានបញ្ជាឲ្យមានការស៊ើបអង្កេតផ្ទៃក្នុងមួយពាក់ព័ន្ធករណីទទួលលុយហុងប៉ាវពីម្ចាស់បនល្បែងនេះ ក្រោយមានការផ្សព្វផ្សាយខ្សែអាត់វីដេអូមួយដែលបង្ហាញសកម្មភាពប៉ូលិសថៃតម្រង់ជួរគ្នាចាំទទួលលុយពីម្ចាស់បនល្បែងមួយក្នុងរដូវកាលចូលឆ្នាំចិននោះ។
បើតាមការចុះផ្សាយរបស់ទីភ្នាក់ងារព័ត៌មានម៉ាឡេស៊ី Bernama វីដេអូនោះត្រូវបានគេចែកចាយរាប់ពាន់ដងនៅក្នុងបណ្តាញសង្គមហ្វេសប៊ុកកាលពីថ្ងៃសុក្រចុងសប្តាហ៍កន្លងទៅចំពេលដែលចូលឆ្នាំប្រពៃណីចិន-វៀតណាមចូលមកដល់នោះ។
ចំពោះប៉ូលិសដែលពាក់ព័ន្ធការទទួលលុយអំណោយចូលឆ្នាំចិនខុសវិន័យប៉ូលិសនេះមានចំនួន ៦០នាក់ដែលមកពីប៉ុស្តិ៍ចំនួនបួននៅទូទាំងក្រុងបាងកក។ លោក Boonyarit Rodma បង្ហើបថា ប៉ុស្តិ៍ទាំងបួននោះមានដូចជានៅ Taling Chan, Thamma Sala, Ban Yikhan និងនៅ Bang Saothong។ ចំណែកមេប៉ុស្តិ៍ទាំងបួននាក់ក៏ត្រូវបានកោះហៅមកសួរនាំពាក់ព័ន្ធករណីយកលុយពីម្ចាស់បនល្បែងនេះដែរ។
តាមពិតទៅ ករណីយកលុយហុងប៉ាវពីម្ចាស់បនល្បែងនេះកើតឡើងត្រឹមមួយសប្តាហ៍ប៉ុណ្ណោះ ក្រោយអគ្គស្នងការប៉ូលិសជាតិថៃលោក Chalermkiat Sriworakhan ចេញសេចក្តីណែនាំមួយដល់គ្រប់ប៉ុសិ៍្តប៉ូលិសទាំងអស់មិនឲ្យទទួលអំណោយពីអ្នកជំនួញជាប់សែរស្រឡាយចិនឡើយ។ លោកក៏បានព្រមានអនុវត្តវិន័យប៉ូលិសចំពោះរាល់អ្នកដែលមិនអនុវត្តតាមសេចក្តីណែនាំនេះដែរ៕
Tag:
ថៃ
Boonyarit Rodma
ហុងប៉ាវ
© រក្សាសិទ្ធិដោយ thmeythmey.com