ជាតិ
ជប៉ុននឹងផ្តល់ជំនួយ៧លានដុល្លារដល់កម្ពុជាលើការអភិវឌ្ឍសេដ្ឋកិច្ច និងសង្គម សម្តេច នាយករដ្ឋមន្ត្រី ហ៊ុន សែន និងលោកនាយករដ្ឋមន្ត្រី ជប៉ុន នាជំនួបកន្លងមកនៅជប៉ុន។ រូបថត AFP
× ភ្នំពេញ៖ រដ្ឋាភិបាលជប៉ុននឹងផ្តល់ជំនួយឥតសំណង ៧លានដុល្លារដល់កម្ពុជា សម្រាប់ដំណើរការអភិវឌ្ឍសេដ្ឋកិច្ច និងសង្គមកម្ពុជា នៅឆ្នាំ២០១៨នេះ។
ជំនួយឥតសំណងដែលមានទឹកប្រាក់ ៨០០លានយ៉េន (ស្មើ៧លានដុល្លារអាមេរិក) នេះ នឹងត្រូវចុះហត្ថលេខាដោយរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន និងឯកអគ្គរាជទូតជប៉ុនប្រចាំកម្ពុជា លោក ហូរីណូអ៊ូជិ ហ៊ីដេហ៊ីសា លើលិខិតប្តូរសារ និងកំណត់ហេតុនៃការពិភាក្សា ស្តីពីការផ្តល់ហរិញ្ញប្បទានឥតសំណង នៅថ្ងៃទី២១ កុម្ភៈ ។
ក្រៅពីនេះរដ្ឋាភិបាលជប៉ុន នឹងផ្តល់ហិបឆ្នោត រួមទាំងសម្ភារចាំបាច់ដទៃទៀត ដល់គណៈកម្មាធិការជាតិរៀបចំការបោះឆ្នោត សម្រាប់ការបោះឆ្នោតសកល ដែលនឹងប្រព្រឹត្តទៅនៅខែកក្កដា ឆ្នាំ២០១៨ខាងមុខនេះផងដែរ។
សេចក្តីប្រកាសព័ត៌មានរបស់ក្រសួងការបរទេសកម្ពុជា នៅថ្ងៃទី២០ កុម្ភៈ បានបញ្ជាក់ដូច្នេះថា៖«ជំនួយជាបន្តបន្ទាប់របស់រដ្ឋាភិបាលជប៉ុនមកដល់កម្ពុជា និយាយជារួមនិងដល់គណៈកម្មាធិការជាតិរៀបចំការបោះឆ្នោត ។ និយាយដោយឡែក បង្ហាញពីការតាំងចិត្តរបស់ជប៉ុន ក្នុងការជួយកម្ពុជា ដើម្បីសម្រេចឲ្យបាននូវការរីកចម្រើនសេដ្ឋកិច្ច និងការអភិវឌ្ឍប្រកបដោយចិរភាព»។
ទាក់ទងនឹងជំនួយជប៉ុន គ្រោងផ្ដល់ឲ្យគណៈកម្មាធិការជាតិរៀបចំការបោះឆ្នោតនេះ មានទឹក៧,២លានដុល្លារអាមេរិក ខណៈខណៈដែលចិន គ្រោងផ្ដល់ថវិកាជាង២០លានដុល្លារ សម្រាប់ការបោះឆ្នោតសកលខាងមុខនេះ។ នេះបើតាមលោក សោម សូរីដា អគ្គលេខាធិការរងគជប ដែលបានបន្ថែមថា រដ្ឋាភិបាលជប៉ុន និងចិន ចេញមុខធានារ៉ាប់រងដំណើការបោះឆ្នោតនៅឆ្នាំ២០១៨ ផងដែរ៕
Tag:
ជប៉ុន
កម្ពុជា
ការបោះឆ្នោត
© រក្សាសិទ្ធិដោយ thmeythmey.com