ក្រសួងសុខាភិបាលព្រមានពីគ្រោះថ្នាក់ដល់ជីវិត ពីការប្រើឱសថបំប៉នផ្លូវភេទ«GOOD MAN»

ជាតិ

សុខភាព

ក្រសួងសុខាភិបាលព្រមានពីគ្រោះថ្នាក់ដល់ជីវិត ពីការប្រើឱសថបំប៉នផ្លូវភេទ«GOOD MAN»

20, Feb 2018 , 9:34 pm

រូបភាព

ឱសថបំប៉នផ្លូវភេទបុរស ដែលផ្សព្វផ្សាយលក់ក្នុងបណ្តាញសង្គមហ្វេសប៊ុក

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ក្រសួងសុខាភិបាល បានព្រមានពីការខាតបង់ប្រាក់កាស ប៉ះពាល់ដល់សុខភាព និងអាចគ្រោះថ្នាក់ដល់ជីវិត ចំពោះអ្នកប្រើប្រាស់ឱសថបំប៉នផ្លូវភេទបុរស «GOOD MAN» ដែលបានផ្សព្វផ្សាយលក់អួតអាងបំផ្លើសហួសការពិត ពេញបណ្តាញសង្គមហ្វេសប៊ុកនោះ។ ក្រសួងសុខាភិបាល ក៏គូសបញ្ជាក់ដែរថា ផលិតផលនេះ គ្មានចុះបញ្ជីការ គ្មានការត្រួតពិនិត្យ និងការអនុញ្ញាតឲ្យនាំចូលនោះឡើយ។

ឱសថបំប៉នផ្លូវភេទបុរស «GOOD MAN» ដែលចរាចរនៅលើទីផ្សារកម្ពុជា មិនមានចុះបញ្ជីកា គ្មានការត្រួតពិនិត្យ និងការអនុញ្ញាតឲ្យនាំចូលឡើយ។ នេះបើតាមសេចក្តីជូនដំណឹងរបស់ក្រសួងសុខាភិបាល ដែលបានចេញផ្សាយ នៅថ្ងៃទី២០ ខែកុម្ភៈ បន្ទាប់ពីឃើញផលិតផលនេះ ត្រូវបានផ្សព្វផ្សាយលក់យ៉ាងគគ្រឹកគគ្រេង នៅក្នុងបណ្តាញសង្គមហ្វេសប៊ុក។

ក្រសួងជំនាញដដែល បញ្ជាក់ថា ការផ្សព្វផ្សាយលក់ឱសថនេះ គឺបានអួតអាងបំផ្លើសហួសការពិត ដែលថាអាចព្យាបាលក្រលៀន តម្រង់នោម ក្រពេញប្រ៉ូស្តាត អ័រម៉ូន ពិសេសបង្កើនចំណង់ផ្លូវភេទនោះ។

ក្រៅតែពីអាចខាតបង់ប្រាក់កាស ក្រសួងសុខាភិបាល ក៏បានព្រមានពីការប៉ះពាល់ដល់សុខភាព និងអាចគ្រោះថ្នាក់ដល់ជីវិតដល់អ្នកប្រើប្រាស់ឱសថបំប៉នផ្លូវភេទបុរស ដែលក្រសួងថាខុសច្បាប់មួយនេះផងដែរ។ តាមរយៈសេចក្តីជូនដំណឹងដដែល ក្រសួងសុខាភិបាលសង្ឃឹមថា សាធារណជន ឈប់ជឿការឃោសនា ដែលក្រសួងចាត់ទុកថា ជាការឃោសនាបោកប្រាស និងបំផ្លើសការពិតនោះ។

ចំពោះក្រុមហ៊ុន ឬជនណា ដែលនាំចូល និងចែកចាយឱសថបំប៉នផ្លូវភេទបុរស GOOD MAN នេះ ក្រសួង នឹងមានវិធានការតឹងរឹងតាមផ្លូវច្បាប់។ ក្រសួងសុខាភិបាល ក៏ស្នើឲ្យពលរដ្ឋ ផ្ដល់ព័ត៌មាន ដល់នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាង តាមរយៈទូរសព្ទលេខ ០៩៥ ៣៥៩ ៣៩៩/ ០១៧ ៤៦៦ ៧៦០ ដែរ បើសិនឃើញការចែកចាយលក់ឱសថខុសច្បាប់ខាងលើ៕