អន្តរជាតិ
ប៉ាឡេស្ទីន តតាំងជាមួយអាមេរិកនិងអ៊ីស្រាអែលក្នុងកិច្ចប្រជុំក្រុមប្រឹក្សាសន្តិសុខ
កិច្ចប្រជុំក្រុមប្រឹក្សាសន្តិសុខ (រូបភាព៖ AFP)
×![]()
ដោយ: តន ចាន់រិទ្ធារ៉ា
អាមេរិក និងអ៊ីស្រាអែល បានឆ្លើយឆ្លងសម្ដីជាមួយប៉ាឡេស្ទីនក្នុងកិច្ចប្រជុំក្រុមប្រឹក្សាសន្តិសុខនៅថ្ងៃទី២០ ខែកុម្ភៈ ជុំវិញបញ្ហានៅមជ្ឈិមបូព៌ា។ ប្រធានាធិបតីប៉ាឡេស្ទីន Mahmoud Abbas បានចោទសួរអាមេរិកពីនយោបាយការបរទេសនៅតំបន់មជ្ឈិមបូព៌ា និងស្នើបង្កើតសន្និសីទអន្តរជាតិដើម្បីបញ្ចប់បញ្ហារវាងប៉ាឡេស្ទីន និងអ៊ីស្រាអែល។ ឯតំណាងអាមេរិក និងអ៊ីស្រាអែលបានរិះគន់សម្ដីរបស់ប្រមុខដឹកនាំប៉ាឡេស្ទីនចំៗ និងថ្លែងការពារនយោបាយរបស់ខ្លួនដែរ។
កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ បានក្លាយជាវេទិកាតតាំងសម្ដីរវាងប៉ាឡេស្ទីន អាមេរិក និងអ៊ីស្រាអែល។ ប្រធានាធិបតីប៉ាឡេស្ទីន Mahmoud Abbas បាននិយាយវាយប្រហារទាំងអាមេរិក ទាំងអ៊ីស្រាអែល និងចោទប្រទេសទាំងពីរនេះថាបានបោះបង់ដំណោះស្រាយរដ្ឋពីរ ដែលបានកំណត់ពីអនាគតរបស់ប៉ាឡេស្ទីន និងការទទួលស្គាល់ទីក្រុងហ្សេរុយសាឡិមខាងកើតជារដ្ឋធានីរបស់ប៉ាឡេស្ទីន។
កំពុងតែមិនសប្បាយចិត្តនយោបាយរបស់អាមេរិកនៅមជ្ឈិមបូព៌ាស្រាប់ផង លោក Abbas បានចោទសួរពីជំហររបស់រដ្ឋបាលប្រធានាធិបតី ដូណាល់ ត្រាំ ជុំវិញវិបត្តិប៉ាឡេស្ទីន និងអ៊ីស្រាអែល ដោយសួរថា អាមេរិកចង់បានរដ្ឋពីរ ឬរដ្ឋមួយ។ ប្រមុខដឹកនាំប៉ាឡេស្ទីនក៏ប្រកាសដែរថា ការវិលទៅរកការចរចា អាចធ្វើឡើង លុះត្រាអាមេរិកឈប់ទទួលស្គាល់ទីក្រុងហ្សេរុយសាឡិមជារដ្ឋធានីអ៊ីស្រាអែល និងមិនត្រូវរើស្ថានទូតដាច់ខាត។
យោងតាមទីភ្នាក់ងារព័ត៌មាន Xinhua លោក Abbas ក៏ឆ្លៀតរិះគន់ត្រង់ៗលើចំណាត់ការរបស់ក្រុងវ៉ាស៊ីនតោនក្នុងការកាត់បន្ថយហិរញ្ញវត្ថុសម្រាប់ជនភៀសខ្លួនប៉ាឡេស្ទីនច្រើនជាង៥លាននាក់ ដែលកំពុងរស់នៅទឹកដីប៉ាឡេស្ទីន និងតាមជំរំនៅហ្ស៊កដានី លីបង់ និងស៊ីរី។ តំណាងអ៊ីស្រាអែល និងអាមេរិក ដែលអង្គុយស្ដាប់លោក Abbas វាយប្រហារធ្ងន់ៗ ក៏បានប្រតិកម្មវិញដែរ។ អគ្គរដ្ឋទូតអ៊ីស្រាអែល Danny Danon អះអាងថា លោក Abbas គ្មានតម្លៃតំណាងឲ្យប្រជាជនប៉ាឡេស្ទីនឡើយ។
តំណាងអ៊ីស្រាអែលដដែលនេះបានរិះគន់មេដឹកនាំប៉ាឡេស្ទីន ដែលចង់បានការជួយពីសហគមន៍អន្តរជាតិ តែគេចវេសមិនចរចាដោយផ្ទាល់ជាមួយអ៊ីស្រាអែល។ លោក Danon បានចោទទៀតថា លោក Abbas យកលុយជំនួយអន្តរជាតិទៅផ្គត់ផ្គង់ក្រុមភេរវកម្ម បង្កើតគំនិតស្អប់អ៊ីស្រាអែល តែមិនបានសាងសង់សាលារៀន និងមន្ទីរពេទ្យអ្វីឡើយ។ លោកក៏ប្រាប់ឲ្យប៉ាឡេស្ទីនប្ដូរមេដឹកនាំថ្មី ដែលចង់ចរចាជាមួយក្រុងតែលអាវីវ។
ចំណែកឯលោកស្រី Nikki Haley តំណាងអាមេរិកប្រចាំអង្គការសហប្រជាជាតិ ក៏មិនស្ងៀមដែរ។ ទន្ទឹមគ្នានឹងការការពារជំហររើស្ថានទូតទៅក្រុងហ្ស៊េរុយសាឡិម លោកស្រី Haley បានប្រាប់លោក Abbas ដែលបានដើរចេញពីអង្គប្រជុំថា អាមេរិកមិនរត់តាមប៉ាឡេស្ទីនដែលមិនចង់ចរចាឡើយ តែនឹងផ្ដល់ជម្រើសដើម្បីដោះស្រាយបញ្ហា។ ហើយវាជម្រើសរបស់ប៉ាឡេស្ទីនដែលមិនចង់ឲ្យអាមេរិកជួយ ឬក៏ព្រមដើរតាមអាមេរិក៕
កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ បានក្លាយជាវេទិកាតតាំងសម្ដីរវាងប៉ាឡេស្ទីន អាមេរិក និងអ៊ីស្រាអែល។ ប្រធានាធិបតីប៉ាឡេស្ទីន Mahmoud Abbas បាននិយាយវាយប្រហារទាំងអាមេរិក ទាំងអ៊ីស្រាអែល និងចោទប្រទេសទាំងពីរនេះថាបានបោះបង់ដំណោះស្រាយរដ្ឋពីរ ដែលបានកំណត់ពីអនាគតរបស់ប៉ាឡេស្ទីន និងការទទួលស្គាល់ទីក្រុងហ្សេរុយសាឡិមខាងកើតជារដ្ឋធានីរបស់ប៉ាឡេស្ទីន។
កំពុងតែមិនសប្បាយចិត្តនយោបាយរបស់អាមេរិកនៅមជ្ឈិមបូព៌ាស្រាប់ផង លោក Abbas បានចោទសួរពីជំហររបស់រដ្ឋបាលប្រធានាធិបតី ដូណាល់ ត្រាំ ជុំវិញវិបត្តិប៉ាឡេស្ទីន និងអ៊ីស្រាអែល ដោយសួរថា អាមេរិកចង់បានរដ្ឋពីរ ឬរដ្ឋមួយ។ ប្រមុខដឹកនាំប៉ាឡេស្ទីនក៏ប្រកាសដែរថា ការវិលទៅរកការចរចា អាចធ្វើឡើង លុះត្រាអាមេរិកឈប់ទទួលស្គាល់ទីក្រុងហ្សេរុយសាឡិមជារដ្ឋធានីអ៊ីស្រាអែល និងមិនត្រូវរើស្ថានទូតដាច់ខាត។
យោងតាមទីភ្នាក់ងារព័ត៌មាន Xinhua លោក Abbas ក៏ឆ្លៀតរិះគន់ត្រង់ៗលើចំណាត់ការរបស់ក្រុងវ៉ាស៊ីនតោនក្នុងការកាត់បន្ថយហិរញ្ញវត្ថុសម្រាប់ជនភៀសខ្លួនប៉ាឡេស្ទីនច្រើនជាង៥លាននាក់ ដែលកំពុងរស់នៅទឹកដីប៉ាឡេស្ទីន និងតាមជំរំនៅហ្ស៊កដានី លីបង់ និងស៊ីរី។ តំណាងអ៊ីស្រាអែល និងអាមេរិក ដែលអង្គុយស្ដាប់លោក Abbas វាយប្រហារធ្ងន់ៗ ក៏បានប្រតិកម្មវិញដែរ។ អគ្គរដ្ឋទូតអ៊ីស្រាអែល Danny Danon អះអាងថា លោក Abbas គ្មានតម្លៃតំណាងឲ្យប្រជាជនប៉ាឡេស្ទីនឡើយ។
តំណាងអ៊ីស្រាអែលដដែលនេះបានរិះគន់មេដឹកនាំប៉ាឡេស្ទីន ដែលចង់បានការជួយពីសហគមន៍អន្តរជាតិ តែគេចវេសមិនចរចាដោយផ្ទាល់ជាមួយអ៊ីស្រាអែល។ លោក Danon បានចោទទៀតថា លោក Abbas យកលុយជំនួយអន្តរជាតិទៅផ្គត់ផ្គង់ក្រុមភេរវកម្ម បង្កើតគំនិតស្អប់អ៊ីស្រាអែល តែមិនបានសាងសង់សាលារៀន និងមន្ទីរពេទ្យអ្វីឡើយ។ លោកក៏ប្រាប់ឲ្យប៉ាឡេស្ទីនប្ដូរមេដឹកនាំថ្មី ដែលចង់ចរចាជាមួយក្រុងតែលអាវីវ។
ចំណែកឯលោកស្រី Nikki Haley តំណាងអាមេរិកប្រចាំអង្គការសហប្រជាជាតិ ក៏មិនស្ងៀមដែរ។ ទន្ទឹមគ្នានឹងការការពារជំហររើស្ថានទូតទៅក្រុងហ្ស៊េរុយសាឡិម លោកស្រី Haley បានប្រាប់លោក Abbas ដែលបានដើរចេញពីអង្គប្រជុំថា អាមេរិកមិនរត់តាមប៉ាឡេស្ទីនដែលមិនចង់ចរចាឡើយ តែនឹងផ្ដល់ជម្រើសដើម្បីដោះស្រាយបញ្ហា។ ហើយវាជម្រើសរបស់ប៉ាឡេស្ទីនដែលមិនចង់ឲ្យអាមេរិកជួយ ឬក៏ព្រមដើរតាមអាមេរិក៕
Tag:
អាមេរិក
អ៊ីស្រាអែល
ប៉ាឡេស្ទីន
UNSC
© រក្សាសិទ្ធិដោយ thmeythmey.com
