ជាតិ
លោក សុខ ឥសាន ចំអករបាយការណ៍អាមេរិក ដែលថា មេដឹកនាំកម្ពុជា និងហ្វីលីពីន ជាអ្នកគំរាមកំហែងប្រជាធិតេយ្យ
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន និងលោកប្រធានាធិបតីហ្វីលីពីន ឌូទើតេ ជាប់ឈ្មោះជាមេដឹកនាំគំរាមកំហែង នៅក្នុងរបាយការណ៍វាយតម្លៃការគំរាមកំហែងប្រជាធិបតេយ្យនៃសហគមន៍ចារកម្មអាមេរិក (STATEMENT FOR THE RECORD WORLDWIDE THREAT ASSESSMENT of the US INTELLIGENCE COMMUNITY)។ អ្នកនាំពាក្យគណបក្សប្រជាជនកម្ពុជា ចាត់ទុករបាយការណ៍អាមេរិកដែលផ្សាយកាលពីថ្ងៃទី១៣ ខែកុម្ភៈកន្លងមកនេះ ថា វាយតម្លៃដោយគ្មានវិជ្ជាជីវៈ និងលម្អៀងផ្នែកនយោបាយ ក្នុងគោលបំណងវាយប្រហារមកលើសម្ដេច ហ៊ុន សែន។
របាយការណ៍អាមេរិក មានចំនួន២៨ ទំព័រ បានវាយតម្លៃទៅលើប្រទេសច្រើនជាង១០ ដោយផ្ដោតលើបញ្ហាគំរាមកំហែងសិទ្ធិមនុស្ស ការបង្ក្រាបដោយខុសច្បាប់ និងរិតត្បិតសិទ្ធិបញ្ចេញ រួមទាំងបញ្ហាផ្សេងៗទៀត។ ក្នុងរបាយការណ៍ ក៏បានវាយតម្លៃមកលើប្រទេសចំនួន៤ ក្នុងតំបន់អាស៊ីអាគ្នេយ៍ ដោយក្នុងនោះរួមមាន ប្រទេសថៃ មីយ៉ាន់ម៉ា កម្ពុជា និងហ្វីលីពីន។
តាមរយៈការវាយតម្លៃរបស់របាយការណ៍អាមេរិកនេះ សម្ដេចនាយករដ្ឋមន្ត្រី ហ៊ុន សែន និងប្រធានាធិបតីហ្វីលីពីនលោក ឌូទើតេ ត្រូវបានចាត់ទុកថា ជាមេដឹកនាំគំរាមកំហែងប្រជាធិបតេយ្យ។ របាយការណ៍ដដែល បានលើកទឡ្ហីករណ៍ពីយុទ្ធនាការបង្ក្រាបគ្រឿងញៀន និងការប្រកាសប្រើច្បាប់អាជ្ញាសឹករបស់រដ្ឋាភិបាលលោកឌូទើតេ ខណៈរដ្ឋាភិបាលប្រើប្រាស់អំណាច ដើម្បីគំរាមកំហែងដល់អ្នកប្រឆាំងខ្លួន។
របាយការណ៍វាយតម្លៃការគំរាមកំហែងប្រជាធិបតេយ្យនៃសហគមន៍ចារកម្មអាមេរិក ដែលលើកឡើងពីការដឹកនាំរបស់រដ្ឋាភិបាលកម្ពុជា បានបញ្ជាក់ដូច្នេះថា៖«រដ្ឋាភិបាលដឹកនាំដោយសម្ដេច ហ៊ុន សែន នឹងកៀបសង្កត់លើស្ថាប័នឯករាជ្យ និងសង្គមស៊ីវិល។ ហើយសម្ដេច ហ៊ុន សែន ជាអ្នកចាត់ចែងរដ្ឋាភិបាល និងស្ថាប័នយុត្តិធម៌ ហើយប្រើអំណាចនិងអំពើហិង្សាក្នុងនយោបាយ ដើម្បីធានាដល់ការឈ្នះឆ្នោតកាន់អំណាចនៅក្នុងឆ្នាំ២០១៨។ សម្ដេច ហ៊ុន សែន កំពុងបំផ្លាញទំនាក់ទំនងជាមួយដៃគូលោកខាងលិច ហើយងាកទៅពឹងផ្អែកលើគោលនយោបាយក្រុងបេកាំង និងការទទួលហិរញ្ញវត្តុគាំទ្រពីចិន ដែលបង្ហាញពីភាពស្និទ្ធស្នាលជាមួយចិន»។
តែយ៉ាងណាអ្នកនាំពាក្យគណបក្សប្រជាជនកម្ពុជា ចាត់ទុករបាយការណ៍អាមេរិកនេះ វាយតម្លៃដោយគ្មានមូលដ្ឋានគ្រិះ និងលម្អៀងផ្នែកនយោបាយ ក្នុងគោលបំណងវាយប្រហារមកលើសម្ដេច ហ៊ុន សែន ប៉ុណ្ណោះ។ លោក សុខ ឥសាន បកស្រាយថា សកម្មភាពរបស់រដ្ឋាភិបាល អនុវត្តវិធានទៅលើក្រុមអង្គការសង្គមស៊ីវិល និងអ្នកប្រឆាំងមួយចំនួនកន្លងមក គឺស្របទៅតាមទិដ្ឋភាពច្បាប់ ក្នុងទិសដៅទប់ស្កាត់ចលនាបះបោល និងបដិវត្តព័ណ៌ ដើម្បីការពារនីតិរដ្ឋឲ្យបានរឹងមាំ។
ថ្លែងប្រាប់សារព័ត៌មានថ្មីៗ លោក សុខ ឥសាន បានបញ្ជាក់ដូច្នេះថា៖«របាយការណ៍នេះមិនផ្អែកសច្ចៈធម៌ទេ គ្មានវិជ្ជាជីវៈអ្វីទាំងអស់ គឹផ្អែកលើការលម្អៀងនយោបាយ។ ការកាន់កាប់តំណែងជានាយករដ្ឋមន្ត្រីរបស់សម្ដេច គឺតាមឆន្ទៈរបស់ប្រជាពលរដ្ឋដែលបោះឆ្នោតឲ្យឈ្នះ ។ អំណាចរបស់សម្ដេច ហ៊ុន សែន នេះ គឺតំណាងឲ្យអំណាចរបស់ប្រជាពលរដ្ឋ ដូច្នេះក្នុងនាមជានាយករដ្ឋមន្ត្រី លោកត្រូវពង្រឹងអំណាចរបស់ប្រជាពលរដ្ឋ ដើម្បីដឹកនាំនិងគ្រប់គ្រងប្រទេស ស្របទៅតាមគោលការលទ្ធិប្រជាធិបតេយ្យ និងនីតិរដ្ឋ។ ហើយជនណាប្រព្រឹត្តបទល្មើសច្បាប់ ត្រូវទទួលខុសត្រូវចំពោះមុខច្បាប់ ដោយមិនមានការគំរាមកំហែងពីសម្ដេច ហ៊ុន សែន ទេ»។
សូមស្ដាប់សំឡេង៖
កន្លងមកអ្នកតាមដានស្ថានការណ៍សង្គម និងអ្នកវិភាគនយោបាយ បានបង្ហាញក្តីព្រួយបារម្ភពីបញ្ហាសិទ្ធិមនុស្ស និងនយោបាយកម្ពុជា បន្ទាប់ពីមានការចាប់ខ្លួន និងបិទស្ថាប័នសង្គមស៊ីវិល ដែលរដ្ឋាភិបាលអះអាងថា ជាការអនុវត្តច្បាប់ទៅលើអ្នកប្រព្រឹត្តខុសច្បាប់ ដើម្បីការពារសុវត្ថិភាព សន្តិភាព និងនីតិរដ្ឋនេះ។
ក្រៅពីវាយតម្លៃលើការដឹកនាំរបស់រដ្ឋាភិបាលកម្ពុជា និងហ្វីលីពីននេះ របាយការណ៍អាមេរិក ក៏បានវាយតម្លៃទៅលើបញ្ហារៀបចំច្បាប់ក្នុងប្រទេសថៃ និងបញ្ហាជនភៀសខ្លួនរ៉ូហ៊ីងយ៉ា នៅប្រទេសមីយ៉ានម៉ា ក៏ដូចជាបញ្ហាអាវុធនុយក្លេអ៊ែរ ក្នុងប្រទេសកូរ៉េខាងជើងជាដើម៕
© រក្សាសិទ្ធិដោយ thmeythmey.com