ពុករលួយ៖ កម្ពុជា ជាប់ចំណាត់១៦១ ក្នុងចំណោម១៨០ប្រទេស

ជាតិ

ពុករលួយ៖ កម្ពុជា ជាប់ចំណាត់១៦១ ក្នុងចំណោម១៨០ប្រទេស

22, Feb 2018 , 10:13 am

រូបភាព

ដោយ: ថ្មីៗ

ភ្នំពេញ៖ របាយការណ៍សកលទាក់ទងនឹងសន្ទស្សន៍នៃការយល់ឃើញពីអំពើពុករលួយ (The Corruption Perceptions Index ) ដែលផ្សាយដោយអង្គការតម្លាភាពអន្តរជាតិ (Transparency International Cambodia) នៅថ្ងៃទី២២ កុម្ភៈនេះ បានបង្ហាញថា កម្ពុជាស្ថិតក្នុងចំណាត់ថ្នាក់ទី១៦១ ក្នុងចំណោម១៨០ប្រទេស ស្មើសាធារណៈរដ្ឋកុងហ្គោ ,សាធារណៈរដ្ឋប្រជាធិបតេយ្យកុងហ្គោ និងតាហ្ស៊ីគីស្ថាន។

កម្ពុជាទទួលបាន២១ ពិន្ទុ សម្រាប់សន្ទស្សន៍នៃការយល់ឃើញពីអំពើពុករលួយ ឆ្នាំ២០១៧ ។ ពិន្ទុនេះមិនមានការផ្លាស់ប្ដូរនោះទេ ក្នុងរយៈពេល៤ឆ្នាំចុងក្រោយនេះ ដែលបង្ហាញថា កម្ពុជានៅតែជាប្រទេសដែលមានកម្រិតអំពើពុករលួយខ្ពស់ ហើយនៅតែឈរក្នុងចំណាត់ថ្នាក់ទាបបំផុតក្នុងចំណោមប្រទេសជាសមាជិកអាស៊ាន ។ នេះបើតាមរបាយការណ៍សកលទាក់ទងនឹងសន្ទស្សន៍នៃការយល់ឃើញពីអំពើពុករលួយ។

របាយការណ៍ដដែល បន្ថែមថា បើទោះបីជារដ្ឋាភិបាលបានខិតខំប្រឹងប្រែងអនុវត្តច្បាប់ប្រឆាំងអំពើពុករលួយជាវិជ្ជមានច្រើនក្តី ប៉ុន្តែការខំប្រឹងប្រែងទាំងនេះ ហាក់មិនទាន់គ្រប់គ្រាន់ក្នុងការផ្លាស់ប្ដូរផ្នត់គំនិតរបស់ក្រុមអ្នកជំនាញ និងអ្នកជំនួញ ពីការប្រព្រឹត្តពុករលួយ នៃវិស័យសាធារណៈនៅឡើយទេ។

របាយការណ៍សកលទាក់ទងនឹងសន្ទស្សន៍ឆ្នាំ២០១៧ នូវែលសេឡង់ ប្រទេសដែលស្អាតស្អំជាងគេលើពិភពលោក បន្ទាប់មកមាន ដាណឺម៉ាក ហ្វាំងឡង់ ន័វែស ស្វីស សិង្ហបុរី ស៊ុយអែត កាណាដា ហូឡង់ អាល្លឺម៉ង់ លុចសំបួរ និងចក្រភពអង់គ្លេស។ ជាមួយគ្នានេះ ហ្គីណេ ហ្គីណេប៊ីស្សូ អាហ្វហ្គានីស្ថាន លីប៊ី ស៊ូដង់ យេមែន ស៊ីរី កូរ៉េខាងជើង ស៊ូដង់ខាងត្បូង និងសូម៉ាលី ជាប្រទេសដែលមានស្ថានភាពពុករលួយខ្លាំងជាងគេ។

កាលពីឆ្នាំ២០១៧ កម្ពុជាជាប់ចំណាត់ថ្នាក់១៥៦ ក្នុងចំណោម១៧៦ប្រទេស។ ចំណែកឆ្នាំ២០១៥ កម្ពុជាស្ថិតក្នុងចំណាត់ថ្នាក់ទី១៥០ ក្នុងចំណោម១៦៨ ប្រទេស ស្មើប៊ូរុនឌី និងស៊ីមបាវ៉េ និងឆ្នាំ២០១៤ ស្ថិតក្នុងចំណាត់ថ្នាក់ទី១៥៦ ស្មើមីយ៉ាន់ម៉ា និងស៊ីមបាវ៉េក្នុងចំណោម១៧៥ប្រទេស៕