ជាតិ
កម្មករសំណង់ម្នាក់ជាប់គុកអស់២ឆ្នាំ ដោយសារសមត្ថកិច្ចចាប់ច្រឡំ ប្រភពរូបថត កោះសន្តិភាព
× ភ្នំពេញ៖ «ជាប់គុក២ឆ្នាំ ដោយសារសមត្ថកិច្ចចាប់ច្រឡំ»។ រឿងរ៉ាវនេះ បានកើតឡើងចំពោះបុរសម្នាក់មានឈ្មោះ ប៉ាត់ តុល ដែលត្រូវសមត្ថកិច្ចឃាត់ខ្លួន ដោយសង្ស័យថាប្រព្រឹត្តអំពើឃាតកម្មកាលពីឆ្នាំ២០១៦ ហើយត្រូវបានតុលាការសម្រេចផ្តន្ទាទោសឲ្យជាប់ពន្ធនាគារ។
កាលពីខែមករា ឆ្នាំ២០១៦ ប្រជាពលរដ្ឋប្រទះឃើញសាកសព នៅសល់តែគ្រោងឆ្អឹងនិងសម្លៀកបំពាក់ ស្ថិតក្នុងភូមិតាឡឹក ឃុំត្រពាំងវែង ស្រុកកណ្តាលស្ទឹង ដែលសមត្ថកិច្ចសន្និដ្ឋានថា ជាករណីឃាតកម្មប្លន់សម្លាប់។ ក្រោយពីពិនិត្យសាកសពរួច សមត្ថកិច្ច បានឈានទៅឃាត់ខ្លួនជនសង្ស័យឈ្មោះ ប៉ាត់ តុល ហើយបញ្ជូនទៅតុលាការផ្តន្ទាទោស ជាប់ពន្ធនាគារអស់រយៈពេល២ឆ្នាំមកហើយ មុននឹងបន្តស៊ើបអង្កេតលើករណីដដែលនេះ ដោយកំណត់បានអត្តសញ្ញាណជនល្មើសថ្មី២នាក់ ដែលជាឃាតករពិតប្រាកដ។ នេះបើតាមការចុះផ្សាយរបស់កាសែតកោះសន្តិភាព។
កាសែតកោះសន្តិភាព បានបន្ថែមថា ជនល្មើសពិតប្រាកដទាំងពីរនាក់នេះ មានឈ្មោះ យឺន ចន្ទី ហៅ ទី និងឈ្មោះ ឆាយ ផារុត ទើបត្រូវបានសមត្ថកិច្ចចាប់ខ្លួន នៅទីតាំងផ្សេងគ្នាក្នុងខេត្តបន្ទាយមានជ័យ និងខេត្តតាកែវ កាលពីថ្ងៃ១៤ កុម្ភៈ ឆ្នាំ២០១៨ ។
ក្រោយការសាកសួរជនសង្ស័យទាំងពីរនេះ បានសារភាពថា ពួកគេពិតជាបានធ្វើសកម្មភាពជាមួយគ្នាសម្លាប់ឈ្មោះ សេង ប៊ុនលី ដើម្បីប្លន់យកម៉ូតូមួយគ្រឿង កាលពីថ្ងៃទី២៦ ខែវិច្ឆិកា ឆ្នាំ២០១៥ នៅចំណុចក្នុងព្រៃឫស្សី ក្នុងស្រុកកណ្តាលស្ទឹងពិតប្រាកដមែន។ ហើយជនសង្ស័យទាំងពីរ បានបកស្រាយបន្ថែមថា ឈ្មោះ ប៉ាត់ តុល មុខរបរកម្មករសំណង់ ដែលត្រូវបានឃុំខ្លួនបណ្តោះអាសន្នក្នុងពន្ធនាគារខេត្តកណ្តាល២ឆ្នាំកន្លងមកនេះ ពុំបានចូលរួមធ្វើសកម្មភាពក្នុងអំពើឃាតកម្មខាងលើនោះទេ ។ នេះបើតាមកោះសន្តិភាព ដែលបានស្រង់ចម្លើយសារភាពរបស់ឃាតករពិតប្រាកដខាងលើ។
តែយ៉ាងណាឈ្មោះ ប៉ាត់ តុល ដែលត្រូវចាប់ដាក់គុកជំនួសជនសង្ស័យទាំងពីរខាងលើនេះ តាំងតែពីដើមឆ្នាំ២០១៦មក នៅបន្តឃុំខ្លួនក្នុងពន្ធនាគារខេត្តកណ្តាលសិន ដោយរង់ចាំការសម្រេចជាថ្មីរបស់តុលាការខេត្តកណ្តាល ។ ប៉ុន្តែអ្វីដែលមហាជន ដាក់ជាចម្ងល់នោះត្រង់ថា តើជនរងគ្រោះឈ្មោះ ប៉ាត់ តុល ដែលជាប់ពន្ធនាគារពីរឆ្នាំ ដោយសារសមត្ថកិច្ចចាប់ខ្លួនច្រឡំនេះ នឹងទទួលបានការដោះស្រាយ ឬសំណងផ្លូវចិត្តបែបណាពីការសម្រេចរបស់តុលាការ?
Tag:
ឃាតកម្ម
ពន្ធនាគារ
© រក្សាសិទ្ធិដោយ thmeythmey.com