ជាតិ
អាបេ ប្រាប់សម្តេច ហ៊ុន សែន៖ ជប៉ុន បន្តសហការជាមួយកម្ពុជា ក្នុងការរក្សាសន្តិភាព
× ភ្នំពេញ៖ លោក ស៊ិនហ្សូ អាបេ នាយករដ្ឋមន្ត្រីជប៉ុន បានផ្ញើសារលិខិតមួយ មកកាន់សម្តេច ហ៊ុន សែន នាយករដ្ឋមន្ត្រីកម្ពុជា ដើម្បីអបអរសាទរខួបអនុវស្សាវរីយ៍៦៥ឆ្នាំ នៃការបង្កើតទំនាក់ទំនងការទូតរវាងប្រទេសទាំងពីរ។ ក្នុងសារលិខិតនោះ លោក ស៊ិនហ្សូ អាបេ សន្យាជាមួយសម្តេច ហ៊ុន សែន ថា ប្រទេសជប៉ុន នឹងបន្តសហការជាមួយប្រទេសកម្ពុជា ដើម្បីរួមចំណែកដល់សន្តិភាព និងវិបុលភាព ក្នុងតំបន់ រួមទាំងនៅលើពិភពលោក។
លោក ស៊ិនហ្សូ អាបេ បន្ថែមថា ក្នុងរយៈពេល៦៥ឆ្នាំមកនេះ ទំនាក់ទំងរវាងប្រទេសជប៉ុននិងប្រទេសកម្ពុជា មានការអភិវឌ្ឍយ៉ាងខ្លាំង។ លោក បានបញ្ជាក់ក្នុងសារលិខិត ដែលត្រូវបានបកប្រែជាសាភាខ្មែរយ៉ាងដូច្នេះថា៖«មិត្តភាពនិងទំនុកចិត្ត ត្រូវបានកសាងឡើងរវាងប្រទេសយើងទាំងពីរ តាមការរយៈកាចាប់ដៃគ្នា បោះជំហានរួមគ្នា ឈានដល់ការសម្រេចបាននូវសន្តិភាព ការកសាងប្រទេសឡើងវិញ និងការអភិវឌ្ឍរបស់ប្រទេសកម្ពុជា»។
ក្រៅពីលោក ស៊ិនហ្សូ អាបេ លោក តារ៉ូ កូណូ រដ្ឋមន្ត្រីការបរទេសជប៉ុន ក៏បានផ្ញើសារលិខិត មកកាន់លោក ប្រាក់ សុខុន រដ្ឋមន្ត្រីការបរទេសកម្ពុជា ផងដែរ។ ក្នុងសារលិខិតដោយឡែកនេះ រដ្ឋមន្ត្រីការបរទេសជប៉ុន បានសរសើរពីការរីកចម្រើនរបស់កម្ពុជា ប៉ុន្តែឆ្លៀតនិយាយពីការបោះឆ្នោតក្នុងឆ្នាំ២0១៨ ខាងមុខនេះ។
លោក តារ៉ូ កូណូ បានបញ្ជាក់ក្នុងសារលិខិត ដែលផ្ញើជូនលោក ប្រាក់ សុខុន បែបនេះថា៖«ក្នុងនាមជាមិត្តភក្តិ ដែលតែងតែជួយគាំទ្រចំពោះការកសាង និងស្តារឡើងវិញ ដោយឈរលើមូលដ្ឋានប្រជាធិបតេយ្យនៃប្រទេសកម្ពុជា ប្រទេសជប៉ុន សង្ឃឹមថា ប្រទេសកម្ពុជា នឹងរៀបចំការបោះឆ្នោតនៅឆ្នាំនេះ ក្នុងរបៀបមួយ ដែលឆ្លុះបញ្ចាំងនូវឆន្ទៈរបស់ប្រជាជន ដើម្បីឲ្យមានការរៀបចំប្រព័ន្ធ ដែលជំរុញការរីកចម្រើនរបស់ប្រទេសជាតិ ឲ្យកាន់តែរឹងមាំ និងប្រកបដោយសាមគ្គីភាពក្នុងចំណោមប្រជាជនទាំងមូល ហើយក្លាយជាប្រទេសមានចំណូលមធ្យមកម្រិតខ្ពស់»។
គេ សង្កេតឃើញថា ប្រទេសជប៉ុន នៅតែបន្តសហការនិងផ្តល់ជំនួយដល់ប្រទេសកម្ពុជាដដែល ទោះជាប្រទេសកម្ពុជា រងការរិះគន់ផ្ទួនៗពីសហគមន៍អន្តរជាតិ ព្រោះតែការរំលាយគណបក្សសង្គ្រោះជាតិ និងការចាប់លោក កឹម សុខា ដាក់ពន្ធានាគារ ក៏ដោយ។ ប៉ុន្មានថ្ងៃមុន ជប៉ុន ទើបនឹងផ្តល់ហិបឆ្នោត១ម៉ឺន៥ពាន់ ដែលមានតម្លៃប្រមាណ៧លានដុល្លារ ដល់គណៈកម្មាធិការជាតិរៀបចំការបោះឆ្នោត ដើម្បីបម្រើឲ្យការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២0១៨។
ដោយសារតែយល់ថារដ្ឋាភិបាលកម្ពុជា ធ្វើឲ្យប្រជាធិបតេយ្យនិងសិទ្ធិមនុស្ស ធ្លាក់ចុះ សហរដ្ឋអាមេរិកនិងសហភាពអឺរ៉ុប បានផ្តាច់ជំនួយលើការបោះឆ្នោត។ ប្រទេសធំៗទាំងពីរនេះ នឹងមិនទទួលស្គាល់ការបោះឆ្នោតនៅកម្ពុជាឡើយ បើគណបក្សសង្គ្រោះជាតិ មិនបានចូលរួមប្រកួតប្រជែង ហើយលោក កឹម សុខា ដែលជាប្រធានគណបក្សប្រឆាំងដ៏ធំមួយនេះ មិនត្រូវបានដោះលែង៕
Tag:
ស៊ិនហ្សូ អាបេ
សម្តេច ហ៊ុន សែន
© រក្សាសិទ្ធិដោយ thmeythmey.com