អន្តរជាតិ
ចិនរិះគន់ទណ្ឌកម្មឯកតោភាគីរបស់អាមេរិកលើកូរ៉េខាងជើង រូបភាព AFP
× អាមេរិកទើបដាក់ទណ្ឌកម្មថ្មីមួយទៀតលើកូរ៉េខាងជើងនៅថ្ងៃទី២៣ ខែកុម្ភៈ។ ក្រុមហ៊ុន កប៉ាល់ដឹកជញ្ជូនទំនិញ និងបុគ្គល ដែលរកស៊ីជាមួយកូរ៉េខាងជើង ត្រូវបានដាក់ក្រោមទណ្ឌកម្មឯកតោភាគីលើកនេះ។ ចិន ដែលមានក្រុមហ៊ុនរបស់ខ្លួនរងទណ្ឌកម្មដែរនោះ បានបង្ហាញការមិនពេញចិត្តចំពោះចំណាត់ការរបស់រដ្ឋបាលប្រធានាធិបតី ដូណាល់ ត្រាំ និងបានស្នើឲ្យអាមេរិកបញ្ឈប់ការអនុវត្តច្បាប់ក្នុងស្រុករបស់ខ្លួនលើឆាកអន្តរជាតិ។
នៅថ្ងៃទី២៤ ខែកុម្ភៈ ចិនបានប្រតិកម្មដោយកំហឹងទៅនឹងការដាក់ទណ្ឌកម្មឯកតោភាគីរបស់អាមេរិកលើកូរ៉េខាងជើង។ ចិនមិនសប្បាយចិត្តឡើយ ពេលដែលក្រុមហ៊ុនរបស់ខ្លួនមួយចំនួនមានឈ្មោះក្នុងបញ្ជីទណ្ឌកម្មរបស់អាមេរិកដែរនោះ។ ក្រសួងការបរទេសចិនបាននិយាយក្នុងសេចក្ដីប្រកាសមួយថា ចិនប្រឆាំងដាច់ខាតសកម្មភាពឯកតោភាគីរបស់អាមេរិក និងការអនុវត្តច្បាប់អាមេរិកលើក្រុមហ៊ុន និងជនជាតិចិន។
បើតាមសេចក្ដីប្រកាសដដែល ក្រុងប៉េកាំងបានតវ៉ាទៅក្រុងវ៉ាស៊ីនតោនរួចហើយជុំវិញរឿងនេះ បានស្នើឲ្យអាមេរិកបញ្ឈប់ទង្វើបែបនេះជាបន្ទាន់ កុំឲ្យប៉ះពាល់ដល់ទំនាក់ទំនងទ្វេភាគីលើវិស័យផ្សេងទៀត។ ក្រុងប៉េកាំងក៏បានប្រកាសជំហររបស់ខ្លួនក្នុងការអនុវត្តដោយខ្ជាប់ខ្ជួនតាមសេចក្ដីសម្រេចរបស់ក្រុមប្រឹក្សាសន្តិសុខជុំវិញការដាក់ទណ្ឌកម្មលើកូរ៉េខាងជើង ហើយក៏មិនអនុញ្ញាតឲ្យក្រុមហ៊ុន ឬជនជាតិខ្លួនបំពានសេចក្ដីសម្រេចទាំងនោះដែរ។
ក្នុងសេចក្តីថ្លែងការណ៍របស់សេតវិមាន ចុះផ្សាយនាថ្ងៃសុក្រទី ២៣ ខែកុម្ភៈ រដ្ឋមន្ត្រីរតនាគារអាមេរិក Steven Mnunchin បានប្រកាសពីទណ្ឌកម្មថ្មីដែលធំបំផុតមិនធ្លាប់មានដើម្បីដាក់សម្ពាធលើរបបដឹកនាំកូរ៉េខាងជើង ដែលមានគោលដៅប្រឆាំងបុគ្គលផង ប្រឆាំងក្រុមហ៊ុនដែលរកស៊ីជាមួយកូរ៉េខាងជើង និងនាវាដែលត្រូវបានប្រើប្រាស់បម្រើប្រយោជន៍កូរ៉េខាងជើងផង។ ក្រុមហ៊ុន និងកប៉ាល់ដឹកជញ្ជូននេះកំពុងស្ថិតនៅ និងចុះបញ្ជីនៅប្រទេសមួយចំនួនក្នុងនោះមានកូរ៉េខាងជើង ចិន សិង្ហបុរី តៃវ៉ាន់ ហុងកុង កោះ ម៉ាសាល់ តង់ហ្សានី ប៉ាណាម៉ា និងប្រទេសកូម័រ។
នេះជាមិនមែនជាលើកដំបូងទេដែលចិនប្រតិកម្មទៅនឹងវិធានការរបស់អាមេរិកនោះ។ តាមពិតទៅ ចិនតែងប្រឆាំងដាច់ខាតការដាក់ទណ្ឌកម្មលើកូរ៉េខាងជើង ដែលមិនបានឆ្លងកាត់ក្រុមប្រឹក្សាសន្តិសុខនោះ។ ជាមួយគ្នានោះ ចិនបានក៏ផ្អាកទំនាក់ទំនងពាណិជ្ជកម្មជាច្រើនជាមួយកូរ៉េខាងជើងដែរក្នុងពេលច្រើនខែមកនេះ។ បើតាមរបាយការណ៍ខែមករា ការផ្លាស់ប្ដូរទំនិញរវាងចិន និងកូរ៉េខាងជើងបានធ្លាក់គួរឲ្យកត់សម្គាល់ដែរ៕
រាប់ទាំងទណ្ឌកម្មលើកនេះ អាមេរិកបានដាក់ទណ្ឌកម្ម៤៥០លើកូរ៉េខាងជើង បើគិតតាំងពីឆ្នាំ២០០៥មក។ ប៉ុន្តែអ្វីដែលគួរឲ្យកត់សម្គាល់នោះគឺ ទណ្ឌកម្មពាក់កណ្តាលត្រូវបានដាក់ចេញដោយរដ្ឋបាលលោក ដូណាល់ ត្រាំ ចាប់ពីឆ្នាំមុនមក។ អាមេរិក និងសម្ព័ន្ធមិត្តបានបន្តយុទ្ធនាគារពង្រឹងការដាក់ទណ្ឌកម្មប្រឆាំងរបបដឹកនាំកូរ៉េខាងជើងជាពិសេសធានាកាត់ផ្តាច់ចរន្តហិរញ្ញវត្ថុដែលត្រូវបានប្រើប្រាស់ផ្គត់ផ្គង់ការសាកល្បង និងស្រាវជ្រាវមីស៊ីលនិងនុយក្លេអ៊ែរ៕
Tag:
ចិន
អាមេរិក
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com